Deuteronomy 12 - Iñupiatun Mumiksat Uqalugiksuat

Nanġaiviksramaaqtauruaq

¹ “Uvva pitqurat kamagipiagaksrasi iñuuŋŋavsi nunaksrirrutaani Atanġum God-iŋata maŋŋuuvsi, qaisaŋa ilivsigñun. Naalaġnisigik!

² Nunannakkuvsi, suksraunġigaksraġigisi iñuich nanġaivikaaŋich god-imiŋnun iġġiñi qutchiksuani, qimiqqani, ataaniitkaluaqpatalu suŋauraaqtuat napaaqtut.

³ Siqumillugich ikipkaiviŋich kanuqqiḷugich salumaruaġiraich napaqutaqtuummaisa. Ikipkaġlugich sivuniqapayaaqtuat iñuuraqpaŋiññun Asherah-mun kivluġlugich nanġaivigitqikkuminaiġḷugich iniŋiññi.

⁴ “Nanġaġnagu Ataniq God-iksi nanġaisikaaŋatiktun god-imiŋñun.

⁵ Nunannaktaavsigniñ maŋŋuuruapayaaniñ Ataniq God-iksi naliġagniaqtuq inimik nanġaiyyaqtaġviksravsigñik ilaan nayuqtauviŋanun.

⁶ Tavrani aitchuigisirusi aitchuutiksravsigñik ikipkaaksrauruaniglu niġiraksraniglu, qulikuuġniġugaluaqpata aitchuutaugaluaqpata, qaisaksraugaluaqpata unniqsuqłiisigiŋavlugich Ataniġmun, naakka aitchuisiññaqtaugaluaqpata, naakka pamiqsaavsiññi aniqqaaqtuagugaluaqpata imnaigutivsigñiḷḷu.

⁷ Tavrani, sivuġaani Atanġum God-ivsi, quviasuusiaksrinŋaraasi, ilivsi iḷasiḷu nanmiñiq niġiññaraaġisigisi savaaġirasi.

⁸ “Piviksraq tikitpan, suraġaŋaiqtuksraurusi piḷġusikaavsiksun. Paŋmamun aglaan nanġairaqtusi isumavsisun,

⁹ tikiñŋaił̣ł̣ugusuli nunannaktaaġipkaqsaqtaŋa Atanġum God-ivsi, iñuuviksrautiksi tutqiksuaġusi.

¹⁰ Ikaaganikkuvsiuŋ Jordan River, Atanġum nunannaktinniaġaasi iñuuvigiluguasii. Navianniuqtinniaŋitkaasi akiḷḷiivsigñiñ, tutqigḷusi iñuuniaġniaqtusi.

¹¹ Ataniq naliġagniaqtuq inimik nanġaiviksravsigñik inmiñun, tavrani qaitkisigisi piraksriqsuutipayaatka: aitchuutit ikipkautaugaluaqpata allallu aitchuutisi, qulikuuġutisi qaisaksrautisiḷu suli aitchuutit nuimaruaġirasi unniqsuqłiutigiŋarasi aitchuutiginiaġnivḷugich Ataniġmun.

¹² Quviasualayumausi tavrani takkuani, miqłiqtusi piqatigilugich, kivgasiḷu, suli Levi-m kiŋuvaaŋich iñuuniaqatigikkasii nunaaqqivsigñi; itqaumalugu Levi-m kiŋuvaaŋich nunannagniaŋisilaaŋannik.

¹³ Aitchuiñiaġnasi aitchuutivsigñik sumipayaaq;

¹⁴ aitchuiruksraurusi kisian Atanġum naliġaaġiniakkaŋani nallivsi nunaŋanni kiŋunġuruasii. Tavranitualuk aitchuigisirusi ikipkautinik suraġaġlusiḷu supayaanik piraksriutigikkamniñ tuvraquvlugich.

¹⁵ “Tuqutchiyumiñaqtusi qanutupayaaq niġrutinik niqigiḷugiḷu iñuuniaġvivsigñi. Niġiyumiñaqtusi qanutupayaaq Atanġum aitchuġagikpasi. Salumaruanik naakka salumaruaŋiḷaanik niqigilugich niġimmatun tuttunik naakka antelope-nik.

¹⁶ Aglaan auktuqtuksrauŋitchusi; kuviraksraġigiksi nunamun imiġmik kuvirimmatun.

¹⁷ Aitchuutisi Ataniġmun niġiñiaŋitkisi aimaaġvivsigñi; qulikuuġutaugaluaqpata palauvaksraniñ, wine-niñ, olive uqsruaniñ, aniqqaaqtuaguruallu pamiqsaavsigniñ naakka imnaiḷḷu, aitchuutillu unniqsuqłiutivsiksun qaiññiaġnirasi Ataniġmun, qaitkaluaġuvsiuŋ isumavsisun, qanusiḷḷu aitchuutiksrautipayaasi.

¹⁸ Aglaan ilvich miqłiqtutillu, piqatigilugich kivgasi tamatkualu Levi-m kiŋuvaaŋich iñuuniaqatigikkasii nunaaqqivsigñi, niġigisigisi aitchuutisi takkuani Atanġum God-ivsi, taaptumani inimi nanġaiviksraqtaaŋani Atanġum God-ivsi. Quviasuglusi taamna nalautitkisigiksi.

¹⁹ Suuramik unnii, Levi-m kiŋuvaaŋich miñittaġiniaŋitkisi, iñuuniqtutillaavsigñi nunavsigñi.

²⁰ “Atanġum God-ivsi nunannavsaaqtitpasi unniqsuqłiunmisun, niġiyumiñaqtusi niqipiamik qakugupayaaq.

²¹ Nanġaiyyaġviksrautiksi uŋasikpaitpan, tavra pisukkuvsi, tuqutchiḷusi pamiqsaavsigniñ imnaigutivsigniñ unnii, Atanġum piqaqtinmasi, niqipiaqtuġumiñaqtusi aimmavivsigñi, uqallausiġiraptun.

²² Kiñapayaaq, salumaruaq salumaitkaluaqtuaq unnii, niġiyumiñaqtuq, tainna niġimmatuttauq allakaaġiikkaluaqtuanik tuttunik.

²³ Aglaan augiŋaruksrauruq, iñuggutaurukkii auk, niġiñagu niqipiaq augiqqaaŋaunnagu.

²⁴ Auktuqtuksrauŋitchusi, maqipkaġlugu aglaan auŋa imiġmik kuviriruatun.

²⁵ Kamaksriguvsi taaptumiŋa piraksriunmik Ataniq iviġagniaġiksi, sunaasii iluaġluni inniaqtuq ilivsigñun kiŋunġuruanullu.

²⁶ Nanġaivigmuutilugich ilaaguaqtaġiŋarasi suli unniqsuqłiutigiŋarasi Ataniġmun.

²⁷ Tavrani aitchuutit ikipkaivigmuglugich Ataniġmun ikipkautiksrat. Suli aitchuutigilugich niġiñiakkasii kuviḷuguasii auk ikipkaivigmun.

²⁸ Kamagipiaġlugich piraksriutipayaatka, iluaġumauq sunapayaaq ilivsigñun kiŋuniivsigñullu isuitchuamun, iluakkuaġniaqtusi iviġaglugulu Ataniq God-iksi.

Kiliktuun Akiḷḷiġivlugu Iñuuraqpaliqiniq

²⁹ “Atanġum God-ivsi suksraunġiġñiaġaich nunaaqqich aŋuyakkasii, nunannaktaaġiluguasii inillagvigilugulu.

³⁰ Atanġum suksraaganikpagich nunaqpauruat, maliksugniaġnagich nanġaisikaaŋich ukpiġunmikkun, maliksukkuvsigik suksraunġiutiginiaġmigisi. Kaŋiqsiuġnasiunnii qanuq nanġaisuummagaisali god-imignik, maliksukpiaġisi tainnali pisuglusi.

³¹ Nanġaġniaġnasiuŋ Ataniq God-iksi pilġusiŋisiktun, uvvakii god-imignun suraġaqtut naġġunaqtuanik God-ivlu uumigikkaŋiññik. Aitchuutiginnigaqtut unnii miqłiqtumignik ikipkaqługich ikipkaivigmigni.

³² “Nalautitchaġisi piraksriutipayaatka ilivsigñun kamagisaġisiḷu; iḷanasigi naakkaqaa iḷaŋŋaġnasigi piraksriutimniñ.