Deuteronomy 11 - Iñupiatun Mumiksat Uqalugiksuat

Atanġum Kamanaġniŋa

¹ “Nakuaġisaġiñ Ataniq God-in kamagituiññaġlugu pitqutaiññik.

² Itqaumagisiuŋ uvlupak iḷitchaqsi Atanikkun apqusaaqtavsiksun itqatigikavsiuŋ. Ilivsi uvva, miqłiqtuŋiḷaavsi, apqusaaŋagiksi. Ilivsiññik qiñiŋagiksi Atanġum suaŋŋatiqpani qiñiqtinmauŋ,

³ aliuġnaqtuanik savagman Pharaoh-mun taputivlugich iñuŋi.

⁴ Tautuŋarusi qanuq Ataniġmun tamatkiġmagich Egypt-miut aŋuyaktiŋich, taputivlugich tuttuqpaŋich aksraktuuraqtuummaisa, ipipkaqługich Red Sea-mi malikataġmasi.

⁵ Iḷisimammiusisuli qanusiġautitilaavsigñik Ataniġmun nunagluktuamiqsiuqavsi mauŋa tikiñŋaiñŋavsi.

⁶ Itqaġlugulu suŋatilaaŋa Dathan-mun Abiram-mullu, iġñiġutiŋiññun Eliab, kiŋuvaaŋich Reuben-gum. Takkuvsiññi nuna qupiŋaruq aasii tavraniittuapayaat katakłutiŋ quppamun, nanmiñiq iḷaŋich, tupiŋich, kivgaŋiḷḷu niġrutautiŋiḷḷu.

⁷ Aaŋ ami; ilivsi tavra takkuksraaqłusi qiñiŋarusi Atanġum savaaŋiññik aliuġnaqtuanik.

Anniqsuutauniaqtilaaŋa Unniqsuqłiutauruam Nunannaktaaksrautim

⁸ “Kamaksriyumausi iluqaiññik piraksriutigiramnik uvlupak. Tainna piguvsi ikaaġumiñaqsiñiaġiksi kuuk nunannaktaaġilugulu tikitkaqsiraqsi.

⁹ Tavraasii iñuuniaqtusi sivisuruamik nunalluatami Atanġum unniqsuqłiisigiŋaraani maŋŋuuvsigñun kiŋuvaaŋiññullu.

¹⁰ Nunannaktaaġiniaqtaqsi Egypt nunaŋatun inŋitchuq, iñuuniaġvigiŋaraqsi. Taimani, nautchirriikavsi palauvaksranik, siġġaqutigiŋagisi nautchiasi imġiḷḷiuqłusi;

¹¹ aglaan nuna ullaksaqtaqsi iġġiqaqtuq natiġnaukkaqłuniḷu, nuna ayuġnaitchuq imiġmik sialuguuvluni.

¹² Atanġum God-ivsi munaġigaa nuna qaunagivlugulu ukiuqtutilaatun.

¹³ “Tainnamik, kamaksrisitchi pitqutinik uvlupak qaitchamnik ilivsigñun; nakuaġilugu Ataniq God-iksi, savautilugu iluqaaġlugu uummativsigñik ilitqusivsigñiglu.

¹⁴ Tainna piguvsi, sialuktisimaaġniaġaa aġisaksraukpan, ukiaġmi upinġaksramiḷu, palauvaksraqaqulusi, wine-miglu, olive-lu uqsruanik piqaqsimaaquvlusi,

¹⁵ ivigaaqaġluniḷu niġrutivsigñun. Niqaiḷḷiuġumiñaitchusi.

¹⁶ Asiñuurrauniaġnasi Atanivsigniñ nanġaġlugich allat god-it savautilugiḷḷu.

¹⁷ Tainna piguvsi, Atanġum qinnautiniaġaasi. Sialuŋaiqsinniaġaa, taimmaasii nuna paliqpaiḷḷuni nausunġiġñiaqtuq. Tavraasii tuqummiḷusi tavrani, nunalluataugaluaqtillugu aitchuutiksrautaa.

¹⁸ “Itqaumasaġisi pitqutauruat taapkua piviaġilugiḷḷu. Agliutilugich maqpiġaanun aasii tallivsiññullu qauvsiñullu qiḷiqsruutilugich, itqautauyumaut ilivsigñun.

¹⁹ Iḷisaurrutigilugich miqłiqtuvsigñun. Uqausiġilugich aimmiguvsi, aullaġuvsi, unaŋuiqsiaġuvsi, naaggaunnii savallavsi.

²⁰ Agliutilugich upkuavsi avaluŋiññun upkuaqpavsigñullu.

²¹ Ilivsi miqłiqtusiḷu sivisuruamik iñuuyumausi nunami Atanġum God-ivsi unniqsuqłiutaa qaiññiaġnivḷugu maŋŋuuvsigñun. Iñuusaġataġniaqtusi tavrani qiḷak siḷaqauraġniaqpan qulaani nunam.

²² “Kamaksriḷusi piraksriutigikkamniik iḷumutuuġusi: Nakuaġilugu Ataniq God-iksi, kamagilugu sutqupayaaqpasi, iḷumutuuġvigipiaġlugulu.

²³ Qimaaratchiñiaġaiḷḷu nunaqpaich sivuvsiññi, nunannaktaaqaġniaqtusiḷu nunaqpaich nunaŋiññik ilivsigniñ kamanałhaaqtuaniñ suaŋŋatiqałhaaqtuaniḷḷu.

²⁴ Nuna taimma tunmakkaqsii iglaullavsi piññaktaaġiniaġiksi. Nunannaktaaqsi aktiginiaqtuq unaŋŋamiñ nunagluktuamiñ paanitchianunaglaan Lebanon Mountains-nun, Euphrates River-miḷḷu Mediterranean Sea-muaglaan.

²⁵ Sumukkaluaġuvsi nalauttavsigñi nunami Atanġum God-ivsi iqsittualapkaġniaġaich iñuŋich ilivsiññik, unniqsuqłiunmisun, kisunun unnii nutqaqtitchumiñaiġlusi.

²⁶ “Uvlupak uvva naliġaaksritkivsi anniqsuusiaksramik naakka pimaqłuusiaksramik—

²⁷ anniqsuusiaksramik, kamagiguvsigik Atanġum God-ivsi pitqutiŋi qaitchatka uvlupak;

²⁸ aasii pimaqłuusiamik, kamaksriŋitkuvsi pitqutaiññik tunullugu nanġaiḷusiasii allanik god-inik sivuani nanġaŋaitchavsigñik.

²⁹ Atanġum tikiutipkaqpasi tikisaaksravsiññun, nunannaktaaksrautivsigñun, nivliusiġiruksraġigisi anniqsuusiasi Mount Gerazim-mi, aasiisuli pimaqłuusiasi nivliusigimmiḷugich Mount Ebal-miñ.

³⁰ (Taapkuak iġġik avaniitchianiittuk Jordan-gum nunaŋani Canaan-miut iñuuviqaqtualli natiġnaaŋani Jordan-gum, uŋasipiaŋitchuk qiksigñaqtuaġisuukkaŋiññiñ napaaqtuniñ Moreh-mi qaniłłutiŋ nunaaqqiŋaniñ Gilgal-gum.)

³¹ Ikaaġumaagaqsigiksiuvva Jordan River nunnaktaaġiyyaġlugu Atanġum God-ivsi qaisaŋa ilivsigñun. Nunannaktaaġiguvsiuŋ inillaglusi,

³² kamaksripiaġumausi pitquranik qaisamnik uvlupak ilivsigñun.