Deuteronomy 10 - Iñupiatun Mumiksat Uqalugiksuat

Moses-gum Akuqtuaġivsaalgitkai Qulit Pitqurat

¹ “Tavra Atanġum uqallautigaaŋa, ‘Malġuugnik uyaqqagnik savavsaaġiñ taipkuak sivulliik tuvraġlugik qirugmiglu kiguunniksriuġlugik. Ullagluŋaasii iġġimun,

² Aglavsaaġniaġitka tuvraġlugik aglaaqqaatka taipkugnatun naviŋaraqtun, aasii inillaglugik kiguunniġmun.’

³ “Tavraasii kiguunniliuqługik qirugmik atiqaqtuamik Acacia-mik, uyaqqagniglu sivulliiktun ittuagnik aasii iġġimuutivlugik.

⁴ Atanġum aglakkaik uyaqqak tuvraqługik piḷiaqqaaġmisun, Qulit Pitqurat qaitkai uqausiġikkanii katinnavsi taimani iġġimun uqautimmasi igniġmiñ. Atanġum aasii qaił̣ł̣ugich aglaani uvamnun,

⁵ utinmun aasii atqaqłuŋa iġġimiñ. Tavraasii, Atanġum pitqutaatun, Kiguunniliamun ikuvlugik tavraniittuk suli taimaŋŋaqaŋa.”

⁶ (Tavra Israel-gum kiŋuvaaŋich aullaŋarut nivviagutiŋiññiñ iñuŋisa Jaakan-miut, aasii Moserah-mukłutiŋ. Tavraniasii Aaron tuqumman iḷuviqługu, iġñiŋaasii Eleazar simmausiutauvluni aŋaiyyuliqsiqpaguŋaruq.

⁷ Tavraŋŋaasii Gudgodah-mukłutiŋ aasii-suli Jotbatha-mun, imġukkagniqsuamun.

⁸ Tavrani Ataniq ilaaguaqsiŋaruq iluqaiññik Levi-m nanmiñiq iḷaŋiññik aŋutinik akigaqtautquvlugich Kiguunniġmik Sivunniuġutinik imaqaqtuamik, savautitquvluniḷu aŋaiyyuliqsautguvlugiḷḷu, God-lu apiksruġlugu iñuich aitchuqulugich anniqsuusiaksraŋiññik. Paŋmapaŋmuaglaan savaaġigaich.

⁹ Tainnamik Levi-m nanmiñiq iḷaŋich nunannayuitchut Israel-miñ kiŋuvaaqatiimiksisun. Ataniq, God naamaruq.)

Atanġum Kiugaa Aŋaiyyutaa Moses-gum

¹⁰ “Iġġimiinŋaruŋa malġukipiani (40) uvluni unnuaqtuummaisa sivuani piḷġusiqqaaġusiptun. Atanġum tusaavsaalgitkaa aŋaiyyutiga suksraunġiġumaŋaiqł̣usiasii.

¹¹ Uqallautivluŋa aasii aullatitquvlusi, nunannaktaaġiyyaġlugu taimña nuna unniqsuqłiutigiŋarani maŋŋuuvsigñun.

God-ivli Piraksriutigivlugu Apiqqutaa

¹² “Aasiuvva, Israel-mun kiŋuvaaguruasii, naalaġnisiuŋ Atanġum God-ivsi piraksriutaa ilivsigñun: Qiksigipiaġataqsiuŋ Ataniq kamagilugiḷḷu pitqutipayaaŋi. Nakuaġilugu, savautilugulu iluqaaġlugu uummativsigñik ilitqusivsigñiglu,

¹³ suli kamaksriḷusi pitqurapayaaŋiññik. Qaitkitka uvlupak suna iluaġlugi iglautquvlugu ilivsigñun.

¹⁴ Atanġumkii pimaaqtuġai qutchigñiqsraŋich unnii qiḷaich; nunalu pigigaa, supayaurallu nunamiittuat.

¹⁵ Uvvaaglaan Atanġum, nakuaqqutaa kiŋuniivsigñun saŋŋivaił̣ł̣uni naliġaktaaġiŋagaasi allaniñ iñugniñ, paŋmapaksuli pimaaġaasi.

¹⁶ Tainnamik, tavraŋŋaaglaan kamaksrirruġiksiyumausi Ataniġmun sivunmuutuvaiññiqsi aġiulugu.

¹⁷ Ataniq God-iksi anaktiksraitchuq allaniñ godiniñ suli suaŋŋatipayauraniñ. Suaŋaniqsrauruq, suli kamagiraksrauruq. Atunim iñugnik aŋalatchisiqaqtuq, naakkaqaa, uqayutauyumiñaiñmiuq.

¹⁸ Nalupqinaitchuamik aŋayuqaagitchuat, uiḷgaŋaruallu atiruamik aŋalarrusiaqaquvlugich; piqpagimmigaich allaniñ nunaniñ iñuuniaqatauliqsuat akunnavsigñi, niqiksrisimaaqługich annuġaaqaqtisimaaqługillu.

¹⁹ Tainnamik, piqpagisigik iglaat, atakkii ilivsivsauq allamiñ nunamiñ qaivḷusi iñuuniaŋammiusi Egypt-mi.

²⁰ Qutchiksuaġisaġiksi Ataniq God-iksi kisian nanġaaġilugu. Iḷumutuuġvigilugu unniqsuqłiutiqaġlusi ilaan kisian atqagun.

²¹ Nanġaġlugu God-iksikii, takkuqsraaqłusi qiñiŋagiksi kamanaqtualiqimman aliuġnaqtuatigullu ilaan savautimmasi.

²² Maŋŋuusi Egypt-muqqaaqamiŋ, piŋasukipiaq quliusiññaŋarut (70). Paŋmapakaglaan uvva Atanġum God-ivsi kisiññaitchuatun uvluġiatun siḷami iñugiaktigiliŋagaasi.