Colossians 4 - Iñupiatun Mumiksat Uqalugiksuat

¹ Atanġuruasii, aŋalataġisigik kivgasi nalaunŋaruakun pitqiksiġautaitchuakullu, iḷisimalusi ilivsivsauq Ataniqaqtilaavsiññik qiḷaŋmi.

Iḷisaurrutit

² Aŋaiyyusimaaġitchi tuniqsimalugu aŋaiyyuniqsi. Qiptaiḷḷusi aŋaiyyuguvsi, quyyavigilugu Ataniq.

³ Aŋaiyyutilutalu, God-mun aitchuquluta piviksramik alġaqsruiyumiñaqsiḷuta tusaayugaaġiksuanik, quliaqtuaġilugu Christ sivuani kaŋiqsiñaiñŋaruaq.

⁴ Pisigivlugu alġaqsruiñiġa tigutaaqtauruŋa. Aŋaiyyutisiŋa kaŋiqsiñaqsiḷugu uqautigiyumagiga kaŋiqsiñaiñŋaruaq Christ-kun. Taamna piraksraġigiga.

⁵ Piqataukavsi ukpiŋaitchuanun aŋalataġisitchi ilivsiññik isumattutikun, atuġlugu piviksraq quliaqtuaġilugich tusaayugaaġiksuat.

⁶ Uqaluusiqsi ataramik iviġaumanaġli, anniqsuiyumiñaġlutiŋ uqalusi iḷisimayumiñaġumausi qanuq kiggutilluataksravsiññik iñupayaamun.

Paġlasuiqsaaġutit

⁷ Tychicus quliaqtuaġutiniaġaasi iluqaanik irrusimñik. Ilaa piviuttaġirauvluni aniqatauruq ukpiġnaqłuni savaktauruq kivgauqatauvluni kivgauruanun Ataniġmun.

⁸ Tiliŋagiga ilivsiññun una sivuniġivlugu, ilivsi iḷitchuġitquvlusi qanuqitilaaptiŋnik ilaanullu qapiŋaisaaquvlusi iluqasi,

⁹ aasii piqatigimmigaa Onesimus, ukpiġnaqtuaq piviuttaġirauruaġlu aniqan, iḷauruaq ilivsiññun. Taapkuak quliaqtuaġutiniaġaasi supayaanik piŋaruanik maani.

¹⁰ Aristarchus tigutaaqtauqatiŋma paġlagaasi, Mark-guvlu aġnaqatiŋan Barnabas. Piraksriŋagivsi qanuq ilivsiññun paġlaraksraġitilaaŋanik. Qaikpan paġlayumagiksi.

¹¹ Paġlayumagiksivsauq Jesus taggisiqaqtuaq Justus-mik. Kisimik taapkua aŋutit Jew-guruat savaqataurut uvamnun akunġanni savaqanma alġaqsruikama atanniqsimmataanik God-im iñuŋnun, aasii qapiŋaisaaġutauŋarut uvamnun.

¹² Epaphras-gum iḷaummiruam ilivsiññun, kivgaŋata Christ Jesus, paġlagaasi, ataramik itqaumavlusi kipiġniuġutikun aŋaiyyunmiñi, iñuutquvlusi agliraksraiqsuatun ukpiqtuatun, suli nalupqigiŋaiġumiñaqsiḷugu pisuutaa God-im ataramik.

¹³ Iḷisimapiaġiga ilaa savaŋatilaaŋa siġḷiqivluni pisivlusi taamapkualu Laodicea-miittuat Hierapolis-miittuallu.

¹⁴ Luke-gum piviuttaġirauruam taaktim Demas-lu paġlagaasi.

¹⁵ Qaaŋiqsitchigik paġlatitka aniqatiinun Laodicea-miittuanun Nympha-mullu aŋaiyyuliqiruanullu igluani.

¹⁶ aasii ukua tuyuutit taiguaganikpatigik akunnavsiññi, taiguaqtinmiyumagisi aŋaiyyuliqiruanun Laodicea-mi, suli taiguaqsaġmigisivsauq tuyuutit Laodicea-ġmiunun,

¹⁷ uqallautilugulu Archippus, qaunagiyumaugguuq taŋŋiġuglugu savaaksriusiani Atanġum aitchuutaa ilaanun.

¹⁸ Uvaŋa Paul aglakkiga una paġlan uvamnik. Itqaumasitchi tigutaaqtautilaamnik. God naglikkutiqpaqaġli ilivsiññun.