Colossians 3 - Iñupiatun Mumiksat Uqalugiksuat

¹ Christ aŋipkaqtaumman tuqqunmiñ, aŋipkaqtauŋammatun ittusi piqatigivlugu ilaa. Taamna tainnainman, kipiġniuġutigituiññaqsigik quviasaaġusiat quviasuutillu qiḷaŋmiittuat, Christ irviani, aquvititauvluni taliqpiata tuŋaanun God-im.

² Isumagituiññaqsigik sut tatpaŋmaniittuat. Isumagigiññaŋaiġḷugich sut nunamiittuat.

³ Qanuq tuquŋaruatun iñuktun ittusi iluqaiññun pigiitchuanun kipiġniuġutinun, iñuggurri iriqsimavluni piqatigivlugu Christ qiḷaŋmiittuaq, God-lu.

⁴ Christ iñuggutigikkaqput qiñiġnaqsikpan, ilivsivsauq qiñiġnaqsiqatiginiaġiksi, piqataulusi ilaan kamanautaanun.

Utuqqauruaq Iñuusiq Nutauruaġlu

⁵ Tavra tamatkua tainnainmata, iñuusitchi tuqunmatun piḷugich iluqaisa pigiitchuat iḷuvsiññi. Isummatigisitchi ilivsiññik tuquruatun naluksriḷḷugich qanusipayaat allatuutit, salumaitchuat isummatit, qanusipayaat pigiitchuat kipiġniuġutit, kaviuqqutillu. Kaviuqqutiqałhaaġniq sunun iñuŋnullu God-mun piviuttaqqunmiñ iñuuraqpaqaġniġuruq.

⁶ Pisigilugu iñuich tainnatchiñik piḷuusiqiniŋat tatavsaġniaġai God-im.

⁷ Qaŋauvlugu iñuuŋŋavsi tamatkunatun iñuktun, tamatkua pisuuŋagaluaġmigisi.

⁸ Aglaan paŋmapak, aġiusigik tamatkua piḷuutit, sunŋusuutit, qinnautit uqautikłiġñiġich pigiitchuanik, saglutillu iñuktigun, salumaitchuaniglu uqaluqaġniġich.

⁹ Sagluuŋaiġḷusi avanmun, qanuq paŋmapak aŋalataġiŋaiġaasi piḷuktuat isumavsi piḷġusivsiḷu. Tainna iñuusiqaŋaiŋarusi,

¹⁰ aasii iñuusarraqsivḷusi nutauruakun iñuutchimik, iḷitchisaiññaqłusi nalaunŋaruakun iñuutchimik, Christ-tun iḷisaiññaġuktuamik.

¹¹ Iñuusiġiliutikaptigu taamna nutauruaq iñuusiq, sumiugitchuq akunġanni iñuich, Greek-gugaluaġmata Jew-gugaluaġmatalu, nalunaiñŋutchiŋavlutiglu timimiŋni God-mun naagga nalunaiñŋutchiŋaitkaluaġmata, aglagnik nalugaluaġmata, naagga aŋuyyiqigaluaġmata Scythians-tun, naagga kivgaugaluaġmata kivgauŋitkaluaġmatalu, qanuq Christ naumałhaaqtuq iluqaiññiñ iñuuvluni iluqaiññi ilaan iñuŋmiñi.

¹² Tavra God-im iñuksraqtaaġiŋammasi, piḷuutaiqł̣usi piviuttaġivlusiḷu, kiikaa iḷunŋusuutiqaġitchi allanun, ikayuiruagulusi, kamasaaŋaiġḷusi, paaqłaktautaiḷḷusi qimmaksaliyaiḷḷusiḷu,

¹³ piaqłuktautiŋaiġḷusi avanmun. Iñuk uqaallatiksraqaġaluaġumi allamun iñuŋmun, suliqutigiŋaiġḷiuŋ itqaumaŋaiġḷugu uqaallatiksraq. Atanġuptauq suliqutigiŋaiŋammagich piḷuutivut itqaumayumiñaiqł̣ugich, tainnatulli uvagut suliqutigiŋaigaksraġigivut allat pimaqłuutiŋich uvaptiŋnun.

¹⁴ Naumałhaaqtuaq iluqaiññiñ, piviuttaqqutituiññaġitchi avanmun. Piviuttaqqutim atausiŋŋuumapkapiallakkai iñupayaat.

¹⁵ Aasii aŋuyautairrutim Christ pipkakkaŋata ataramik aŋalallisi, qanuq God-im ququaŋagaasi iḷautquvlusi ativlutiŋ aŋaiyyuliqiruanun, suli iñuuqatigiiquvlusi aŋuyautaiḷḷusi. Suli quyyatiqaġitchi ataramik.

¹⁶ Ataramik isummatigisigik iluqaisa Christ iḷisaurrutiŋi iñuusiġilugiḷḷu. Tavraasii tainna piguvsi isumattutinigniaqtusi aasii iḷisaurriyumiñaqsiḷusi siḷġiqsuutiyumiñaqsiḷusiḷu avanmun, atuutiqaġumiñaqsiḷusiḷu Psalms-nik nanġautiniglu suli atuutinik qapiŋaisaaġutauruanik ukpiqtuanun, quyyatiqaġlusi uummativsiññiñ God-mun.

¹⁷ Suli sunapayaaq piguvsiuŋ naagga uqallausiġiguvsiuŋ, pisiuŋ Atanġum Jesus pisiksraŋatun uqallausiksraŋatullu, quyyavigilugu Aapa ilaagun.

Iñuuniaqatigiigñiq Nutauruami Iñuutchimi

¹⁸ Nuliaguruasii, kamakkutiqaġitchi uivsiññun. Taamna nalaunŋaruq ukpiqtuaguruanun Ataniġmun.

¹⁹ Uiguruasii piviuttaġisigik tuvaaqatisi, suammatisuŋaiññaŋaiġḷugich.

²⁰ Miqłiqtuut, kamagisigik aŋayuqaasi ataramik, qanuq kamaksriñivsi Ataniq iviġaksimaaġaa.

²¹ Aapauruasii, suasuŋaiññaġnagich miqłiqtusi, qapiŋasiviaqtut kamaksriñiaġniġmiŋni ilivsiññik.

²² Kivgaat, kamaksrisitchi ataramik tamatkuniŋa ilivsi ataniġikkavsiññik, qiñiqtiqaġuvsi kisianik pisuŋaġnasi, iñuŋnik iviġaiñiaqtitun, aglaan ataramik savaglusi iviġaumasuglugu Ataniq.

²³ Sunapayaaq savaaġiguvsiuŋ, savagitchi piyummatiqaġlusi, savautimmatun Ataniq iñuŋił̣aat,

²⁴ iḷisimaugaġlusi Atanġum akiḷiġñiaġaasi kiŋuvaannaktaamik, qanuq savautigiksi Ataniq Christ.

²⁵ Iñuk killuliqirauruaq akiḷiqsauniaqtuq killuliqiamigun. Iñupayaat atilugich piñiaġaich.