Colossians 1 - Iñupiatun Mumiksat Uqalugiksuat

¹ Ukua tuyuutit qairut ilivsiññun Paul-miñ tilirauruamiñ alġaqsruitquvlugu tusaayugaaġiksuanik God-im pitqummani, Timothy-miḷḷu aniqatiptiŋniñ.

² Tuyuutaurut ilivsiññun ilaaguaqtauruanun God-mun, atausiŋŋuqatauŋaruanun Christ-mun, aniqatinun ukpiġnaqsiŋaruanun ilaanun Colossae-miittuanun, God Aapavut nagliktuutiqpaqaġlisuq tutqiutiqaqtillusiḷu.

Aŋaiyyunmi Quyanaaġutit

³ Aŋaiyyutikavsi quyyavigisuugikput God ataramik, Aapaŋa Atanipta Jesus Christ.

⁴ Qanuq tusaaŋagikput ukpiġnaqsiŋaniqsi Christ Jesus-mun piviuttaqsriñiqsiḷu iluqaiññik ilaaguaqtauruanik God-mun.

⁵ Aasii tainna iñuusiqaqtusi, iñuuqatigiyumavlugu God qiḷaŋmi isuitchuamun. Taamna piyumman pigiliutiqqaaŋagiksi iḷumun ittuaq tusaayugaaġiksuaq alġaqsruutaumman ilivsiññun.

⁶ Taamna tusaayugaaġiksuaq alġaqsruutauŋaruaq ilivsiññun alġaqsruutaummiuq iñuŋnun nunami iluqaani, aasii iñuvsaat ukpiliqł̣utiŋ Christ-mun, iñuugaqsivḷutiŋaasii Christ iñuutqutaagun, ilivsivsauq iñuusivsisun taimaŋŋaqaŋa tusaakavsiuŋ nagliktuutiqpaŋa God-im, kaŋiqsivḷugu iḷumun ittuaŋa.

⁷ Iḷisaaġiŋagiksi taamna tusaayugaaġiksuaq Epaphras-miñ piviuttaġikkaptiŋniñ kivgauqatiptiŋniñ Christ-mun. Ilaa ukpiġnaqtuq savakti Christ-mun alġaqsruiruaq ilivsiññun pisivluŋa.

⁸ Ilaan quliaqtuaġutiŋagaatigut Ilitqusiġiksuamun piviuttaqsripkaġnivḷusi allanik iñuŋnik.

⁹ Taimaŋŋaqaŋa uvlumiñ tusaaviptiŋniñ taavrumiŋa, aŋaiyyutigivsi-suli, apiġivlugu God ataramik ikayuquvlusi iḷitchuġipiaquvlugu qanuq God-mun pitqutilaaqsi, Ilitqusiġiksuamun isumatusipkaquvlusi kaŋiqsipkaquvlusiḷu sumik God-im pitquyumakkaŋanik ilivsiññun.

¹⁰ Suli aŋaiyyutivlusi iñuusiqaquyumavlusi nalliummatiruamik Ataniġmun, iviġaumalugu Ataniq supayaanik piguvsi, ataramik nakuurualiqilusi suli iḷitchuġisaiññaġlugu God.

¹¹ Aŋaiyyutivlusiḷu God-mun suaŋŋatiqapiaġataqtuamun, suaŋŋasiquvlusi naamaruamik, igḷutuġumiñaqsiḷugich uuktuaġusiapayaat qiñuirrutiqaġlusi, quviasuunmiglu.

¹² Suli aŋaiyyutivlusi quyyatiqaquvlusi ataramik Aapamun nallium matipkaliġmatigut piqataullasivḷuta allanun ukpiqtuanun iñuggunmi isuitchuami, iñuummatun qaummaġmi.

¹³ God-im annautiŋagaatigut atanniqsimmataaniñ Tuunġaum, iñuummatun ittuamiñ taaqtuami, nuurrutivluta atanniqsimmataanun Iġñiġmi piviuttaġirami.

¹⁴ God-im Iġñiŋata tasuŋagaatigut God-mun suliqutigiŋaiquvlugich itqaumayumiñaiġḷugich piḷuutivut.

Christ Kamanaġniqsrauruq

¹⁵ Christ God-itun ittuq tautugnaitchuatun. Ilaa inŋaruq sivuanni supayaat savaaguŋaiñŋaisa.

¹⁶ Ilaa God-itun ittuq qanuq ilaagun supayaat savaaguŋarut, sut qiḷaŋmiittuat sullu nunamiittuat, sut tautugnaqtuat sullu tautugnaitchuat, tamatkua ilitqutchich atanniqsimanniktuat, ilitqusiḷḷu suaŋŋatiqaqtuat sapiġñaqtuallu. Tamatkua iluqaisa Christ savaŋagai inmiñuksrivḷugich.

¹⁷ Christ inŋaruq sivuanni supayaat, aasii ilaan suaŋŋataata igliqtitkai atautchikun piqatigiikł̣ugich supayaat savaani.

¹⁸ Suli iñuk niaquata aŋalanmatun timaa, tainnatun Christ aŋalatkai ilaan iñuŋni aŋaiyyuliqiruat. Aŋaiyyuliqiruat ilaan iñuggutiqaqtitkai isuitchuamik, aŋiqqaaŋavluni tuqqunmiñ aasii iñuuvluni isuitchuamun. Tavraasii ilaa Atanġuruq supayaanun,

¹⁹ qanuq God sivunniŋaruq tamatkiġḷuni ilaa iñuusukłuni ataramik Iġñiġmiñi.

²⁰ Suli Christ maqipkaġmagu auni, tuquvluni aŋarraurami, God-im iḷauraaliuŋagai aŋuyautaiqł̣ugich supayaat savaani, nunamiittuat qiḷaŋmiittuallu.

²¹ Suli qaŋauvlugu ilivsi uŋasiŋarusi God-miñ. Uumigiŋagiksi, iñuuvlusi piḷuutini.

²² Paŋmapak-aasii Christ iḷauraaliuŋagaasi God-lu, aitchuutigivlugu timini tuqutautquvlugu aŋarraurami, ilivsi akuqtuġnaqsitquvlusi God-mun, piḷuutaiqsauŋalusi, pasiñaġumiñaiŋalusiḷu ilaan sivuġaani.

²³ Aglaan ukpiŋaiqsuksrauŋitchusi, ukpiġutiqaġitchi suaŋapiaqtuamik, tuniqsimaruamik, suli niġiugiŋaiġñagu annaurrauniksraqsi taŋŋiqsauniaqtilaaŋanik tusaaŋakkavsisun tusaayugaaġiksuakun. Taamna tusaayugaaġiksuaq alġaqsruutauŋaruq iñupayaamun nunamiittuamun, aasii uvaŋa Paul alġaqsruutigigiga.

Paul Savaurriruq Aŋaiyyuliqiruanik

²⁴ Paŋmapak quviasuktuŋa pisigivlugu nagliksaaqtitauniġa ilivsi pisigivlusi. Nagliksaaqtitaukama Christ nagliksaaġmatun piuq. Taamna pisigivlugu quviasuktuŋa naarrusiqapkich ilaan nagliksaaġniŋi, pisigivlugich aŋaiyyuliqiruat timigikkani.

²⁵ God-im kivgaksraqtaaġiŋagaaŋa aŋaiyyuliqiruanun ilivsi iḷagivlusi, piraksriqł̣uŋa uqautigimmaġiksaaquvlugu ilaan uqaluksrirrutini,

²⁶ kaŋiqsiñaiñŋaruaq qaŋapak kiŋuniġiiñi, aglaan paŋmapak kaŋiqsiñaqsiŋagaa ilaan pimiñun, tamatkunuŋa ilaaguaqtauruanun God-mun.

²⁷ Iliŋiññun, iḷagivlugich Jew-guŋitchuat, God-im satqummiġuliŋagaa qanutun kamanaqtigivluni kaŋiqsiñaiñŋaruaq. Taamna kaŋiqsiñaiñŋaruaq Christ iñuullaniŋa iḷuvsiññi, aasii niġiullasivḷusi iḷauniksravsiññun iñuuniġmi qiḷaŋmi, ilaa iñuuqatigilugu.

²⁸ Christ alġaqsruutigigikput, siḷġiqsuqsimavlugu iñupayauraq iḷisautivlugulu isumatutilaaptiktun iñupayauraq atausiŋŋuqatauŋaruaq Christ-mun, agliraksraiqsuatun ukpiqtuagutquvlugu, iñupayauraq qaġġirraukpan sivuġaanun God-im.

²⁹ Tavra taamna siġġaqutigigiga, aasii piyumiñatualukkiga qanuq Christ sapiġñaqtuam suaŋŋataa savakłuni iḷumni.