Acts 9 - Iñupiatun Mumiksat Uqalugiksuat

Saul Isumalitqiksuq

¹ Tavra Saul sivuuġasaaqłipiaŋaruq suli tuquġaaġukługich ukpiqtuat Ataniġmun. Tavra ilaa aullaŋaruq aŋaiyyuliqsiqpaich qaukłiannun,

² aasii apiqsrivḷuni tuyuutinik, iḷitchuqqutiksranik kiutilaamiñik Jew-guruat aŋaiyyuviŋiññi Damascus-mi. Iḷaanni paqitkumi ukpiqtuanik Ataniġmun taamani tigutaaġumiñaġuqługich, aŋutikkaluat aġnakkaluallu, aasii utqutilugich Jerusalem-mun.

³ Tavra iglauniaqtillugu qallivḷuni Damascus-mun, tavraŋŋatchiaq qaummaq qiḷaŋmiñ qaummaatinŋaruq avataanun.

⁴ Aasii Saul ulġuŋaruq nunamun, suli tusaaŋaruq nipimik uqallaktuamik inmiñun, Saul, Saul, summan nagliksaaqtitpiŋa?

⁵ Tavra Saul apiqsriŋaruq, Kiuvich ququularuatin uvamnik? Aasiiḷi ilaan kiuŋagaa, Uvaŋa Jesus-guruŋa, nagliksaaqtitan. [Nagliksautiksriuqsiññaqtutin iliŋnun akiḷḷiḷiqsuqamŋa.]

⁶ Makittin, aasii aullaġlutin iniqpaŋmun, uqallautiniaġaatin suruksrautilaaġnik.

⁷ Aŋutit iglauqatiŋi Saul makitaŋarut nutqaŋavlutiŋ uqallaġniaġnatiŋ, tusaqsraġivlugu nipi aglaan tautulaił̣ł̣utiŋ iñuŋmik.

⁸ Saul makinŋaruq nunamiñ, aasii uiññami tautuksiḷaiñŋaruq sumik. Tavra tasirriutiŋagaat aasii tikiutivlugu Damascus-mun.

⁹ Tavraasii piŋasuni uvluni tautuksiḷaiñŋaruq, niġiḷaiñmiuq imilaił̣ł̣uniḷu.

¹⁰ Tavra ukpiqtuaq inŋaruq Damascus-mi atiqaqtuaq Ananias-mik. Atanġum tuqłuŋagaa atqanik qiñiqtuuraakun, Ananias. Aasii ilaan kiuŋagaa, Uvaniittuŋa, Ataniiq.

¹¹ Tavra Atanġum uqallautiŋagaa, Makillutin aullaġiñ apqugaatchianun atiqaqtuanun Sivukkiruanik, aasii apiqsriḷutin igluani Judas iñuŋmik Tarsus-miumik, atiqaqtuamik Saul, qanuq ilaa aŋaiyyuuqtuq.

¹² Aasii qiñiqtuuraakun tautuaniŋagaa iñuk atiqaqtuaq Ananias-mik isiqtuaq, aasii iḷivḷugich argaŋni ilaanun ilaa tautullasitqiquvlugu.

¹³ Tavra Ananias-gum kiuŋagaa, Ataniiq, tusaaŋaruŋa iñugiaktuaniñ iñuŋniñ taavrumuuna iñukun, qanutun pigiisigiruamik savaaġiŋakkaŋanik ukpiqtuanun Jerusalem-mi.

¹⁴ Aasii qaiŋaruq Damascus-mun ataniġnaqusiraqłuni aŋaiyyuliqsiqpaŋniñ qiḷiqsruiyumiñaġukługich iluqaisa ukpiqtuat iliŋnun.

¹⁵ Tavra Ataniq uqallaŋaruq ilaanun, Aullaġiñ, qanuq uvaŋa piksraqtaaġiŋagiga savautitquvluŋa, iḷitchuġipkaquvluŋa Jew-guŋitchuanun, umialiŋnullu, Israel-guruanullu.

¹⁶ Qanuq iḷisautiniaġiga qanutupayauraq nagliksaaqtuksrautilaaŋa pisigiluŋa.

¹⁷ Tavra Ananias aullaŋaruq, aasii isiqłuni iglumun. Aasii iḷiŋagai argaŋni Saul-mun uqallakłuni, Aniqaan Saul, Atanġum Jesus niptaŋaruam iliŋnun apqunmi qaġġiviŋñi, tiliŋagaaŋa qiñillasitqiquvlutin, suli paŋmapaŋmiñ aglaan Ilitqusiġiksuamun aŋalatquvlutin.

¹⁸ Aasii tavrauvvaa sutkiaq kavitchisun ittuat kataŋarut Saul-gum irraŋniñ, aasii qiñillasitqiŋaruq. Tavra makinŋaruq aasii paptaiqsauvluni,

¹⁹ suli niġiŋaruq aasii sayanitqikł̣uni. Tavra iñugiaktuani uvluni piqatigiŋagai ukpiqtuat Damascus-mi.

Saul Alġaqsruiruq Damascus-mi

²⁰ Tavra Saul aŋaiyyuliaqsautigillaan piŋaruq Jew-guruat aŋaiyyuviŋiññun. Aasii alġaqsruutigirraqsiŋagaa Jesus, Iġñiġinivḷugu God-mun.

²¹ Tavra iluqaġmiŋ tusaaruat ilaanik niġiiḷḷaqtauŋarut, aasii uqaqłutiŋ, Taimñauŋitpauna iñuk Jerusalem-mi tuquġairuaq ukpiqtuanik Jesus-mun? Aasii qaiŋaruq mauŋa sivuniġivlugu tigutaaġlugich ukpiqtuat utqutisukługich aŋaiyyuliqsiqpaŋnun.

²² Tavra Saul alġaqsruiŋaruq suaŋasisaiññaqługu alġaqsruutini. Aasii ilaan ukpiġnaqsilġutiŋi Jesus Christ-guniŋagun suaŋavaił̣ł̣utiŋ Jew-guruat Damascus-miittuat kiumalaiñŋagaat.

²³ Iñugiaktuat uvlut qaaŋianiŋmata, Jew-guruat katinŋarut sivunniuqłutiŋ tuqutchukługu Saul.

²⁴ Tavra sivunniuġutaat iḷitchuġiŋagaa Saul-gum. Aasii taapkua iñuaġuktuat qaunagiŋagaich paaqpaich uvlumi unnuamiḷu, tuqutchukługu Saul.

²⁵ Tavra unnuat iḷaŋanni, ukpiliqsuat Saul alġaqsruimman, niŋinŋagaat Saul siḷataatigun katchich niŋirrusiqł̣ugu aguummakpaŋmik.

Saul Jerusalem-miittuq

²⁶ Tavra Saul aullaŋaruq Jerusalem-mun, aasii iḷḷatisaŋagaluaqtuq ukpiqtuanun. Iliŋisa arguagiŋagaat ukpiqtuaġuqtilaaŋa, suli iluqaġmiŋ iqsigiŋagaat.

²⁷ Tavra Barnabas qaivḷuni ikayuŋagaa Saul, aasii tiliraunikun iḷitchitquranuutivlugu. Ilaan quliaqtuaġutiŋagai Saul-mun tautuŋatilaaŋanik Ataniq apqunmi, qanuġlu Atanġum uqaŋatilaaŋanik Saul-mun. Barnabas quliaqtuaġutiŋammigai qanutun qikkisaił̣ł̣uni Saul alġaqsruiŋatilaaŋanik alġaqsruutigivlugu Jesus Damascus-miuni.

²⁸ Tavra Saul nayuŋagai, aasii kukiḷukłuni iluqaani Jerusalem-mi,

²⁹ alġaqsruutigivlugu Ataniq qikkisaił̣ł̣uni. Suli uqaaqatigivlugich Greek-gich uqausiqaqtuat Jew-guruatun, ilaisaliasii tuqurviksraqsiuŋagaat.

³⁰ Tavra aniqatit iḷitchuġikamiŋ taavrumiŋa, aullautiŋagaat Saul Caesarea-mun, aasii tavraŋŋa aullaqtiłługu Tarsus-mun.

³¹ Tavra aŋaiyyuliqiruat iluqaani Judea-mi Galilee-miḷu Samaria-miḷu tutqiksiŋarut, suli aŋaiyyuliqiruat suaŋasisaiññaŋarut iñugiaksisaiññaqłutiglu iñuuvlutiŋ qiksigivlugu Ataniq, quviasaaġutaaniḷu Ilitqusiġiksuam.

Peter Lydda-muŋaruq Joppa-mullu

³² Tavra Peter iglauŋaruq sumulliqaa, aasii iḷaanni ullaŋagai God-im iñuŋi iñuuruat Lydda-mi nunaaqqimi.

³³ Tavrani kasuŋagaa iñuk atiqaqtuaq Aeneas-mik, makitilaiñŋaniqsuaq tallimat piŋasuni ukiuni avatiŋi tuquŋavlutiŋ.

³⁴ Tavra Peter-m uqallautiŋagaa, Aeneas, Jesus Christ iłuaqsigaatin. Makittin iłuaqsakkich tuŋiutitin. Tavra tavrauvvaa makinŋaruq.

³⁵ Tavra iluqaġmiŋ iñuuruat Lydda-mi Sharon-miḷu tautuŋagaat, aasii iliŋich ukpiliŋarut Ataniġmun.

³⁶ Tavra Joppa-miinŋaruq ukpiqtuaq aġnaq atiqaqtuaq Tabitha-mik. Atqa Greek-tun Dorcas sivuniqaqtuaq tuttumik. Iluqaan piviksrani atuŋaniġaa nakuurualiqivluni ikayuqługiḷḷu iḷiappauruat.

³⁷ Taipkunani uvluni naŋiliŋaruq aasii tuquvluni, tavraasii timaa ivvaanikamirruŋ iḷiŋagaat qiḷaguamun.

³⁸ Tavra Joppa qaninman Lydda-mun, ukpiqtuat Joppa-mi tusaaŋarut Peter Lydda-miitilaaŋanik. Tavra tilisiŋarut malġugnik iññuŋnik Peter-mun uqaluksriqł̣ugik inna, Qilamik ullaktigut.

³⁹ Tavra Peter itqanaiyaŋaruq, aasii aullaqatigivlugik. Tavra tikiñman qiḷaguamuutiŋagaat. Iluqaġmiŋ uiḷgaŋaruat makitaŋarut saniġaani qiavlutiŋ, suli maniuqługich quppiġaat annuġaallu Dorcas piḷiaŋi iñuuŋŋaġmi.

⁴⁰ Tavra Peter-m aninŋagai iluqaisa, aasii sitquqłuni aŋaiyyuŋaruq. Tavraasii qiviaqługu timaa uqallaŋaruq, Tabitha, makittin. Tavra uiñŋaruq, aasii Peter tautukamiuŋ aquvinŋaruq.

⁴¹ Tavra Peter-m isaaqłuni ikayuŋagaa makinman. Tavraniasii ququaqługich ukpiqtuallu uiḷgaŋaruallu, ilaan qaiñŋagaa iñuuvlugu.

⁴² Tavra taamna iḷitchuġirauŋaruq iluqaani Joppa-mi, suli iñugiaktuat iñuich ukpiliŋarut Ataniġmun.

⁴³ Tavra Peter uvliuŋaruq Joppa-mi, tukkuġivlugu Simon qitummairi ammiñik.