Acts 8 - Iñupiatun Mumiksat Uqalugiksuat

¹ Tavra Saul-gum iviġagiŋagaa tuqutauniŋa. Tavra taavrumani uvlumi aŋaiyyuliqiruat Jerusalem-mi nagliksaaqtitaurraqsiŋarut. Iluqaġmiŋ ukpiqtuat siaminŋarut iluqaiññun nunaaqqiŋiñun Judea-m Samaria-vlu kisiŋŋuqługich tiliraunikun iḷitchitqurat.

Saul Nagliksaaqtitkai Aŋaiyyuliqiruat

² God-iliqiruaguruat iñuich iḷuviŋagaat Stephen, suli atqunaq kiŋuvġuŋagaat.

³ Tavra Saul nagliksaaqtiqpaŋagai aŋaiyyuliqiruat, suli isauġiqł̣ugich iglut, piaqłuktaqługich aullautiŋagai aŋutillu aġnallu tigutaaġviŋmuksimmaisa.

Tusaayugaaġiksuat Alġaqsruutigigaich Samaria-mi

⁴ Tavrali tamatkua ukpiqtuat siamitauruat kukiḷuŋarut alġaqsruutigivlugu tusaayugaaġiksuaq.

⁵ Philip aullaŋaruq iniqpaŋmun Samaria-mun, aasii quliaqtuaġutivlugich iñuich Christ-mik.

⁶ Tavra iñusalaich atisivḷutiŋ naalaġniŋarut uqaluŋiñun Philip. Naalaġniŋarut iluqatiŋ tautukługiḷḷu aliuġnaqtuat savaaŋi.

⁷ Qanuq ilitqusiqł̣uich aniŋarut iñugiaktuaniñ ilitqusiqł̣uqaqtuaniñ nipaalavlutiŋ, suli iñugiaktuat avatiŋich tuquŋaruat tusiattuallu iłuaqsirauŋarut.

⁸ Tavra iñuich quviasupiaġataŋarut Samaria-mi.

⁹ Aglaattauq iniqpaŋmi iñuqaŋaruq atiqaqtuamik Simon-mik. Sivuani kamanniuqtitkayuŋniġai aŋatkiqivluni Samaria-ġmiut, inmiñik kamanaqtualivḷuni.

¹⁰ Aasii iluqaġmiŋ iñuich iniqpaŋmi, kamanaiññiqsramiñ kamanaġniqsramun, naalaġnipiaŋagaat, uqaqłutiŋ, Una iñuk suaŋŋasiqsuġaa God-im, iḷisimanaqtuam kamanaqtuamik suaŋŋatiqaqtuam.

¹¹ Aasii naalaġnisiqaŋarut ilaanun, qanuq sivisuruamik ilaan kamanniuqtinŋagai aŋatkumiñik.

¹² Tavraasii ukpiġiliqamirruŋ Philip alġaqsruutaa tusaayugaaġiksuaq atanniqsimmataagun God-im, Jesus-lu Christ-gutilaaŋa, iliŋich paptaiqsauŋarut, aŋutillu aġnallu.

¹³ Simon unnii ilaa ukpiliŋaruq, aasii paptaiqsauqqaaqłuni Philip nayuŋagaa. Suli qiñiqługich kamanaqtuat aliuġnaqtuat Philip piraŋi, ilaa kamanniuŋaruq.

¹⁴ Tavra tiliraunikun iḷitchitqurat Jerusalem-miittuat tusaakamiŋ Samaria-ġmiunun akuqtuġnivḷugu uqalua God-im, tiliŋagaich taamuŋa Peter-lu John-lu.

¹⁵ Taapkuak tikiññamiŋ aŋaiyyutiŋagaich ukpiqtuat aitchuusiaqaquvlugich Ilitqusiġiksuamik.

¹⁶ Qanuq Ilitqusiġiksuaq iḷuannuŋaitchuq nalliataunnii, aglaan paptaiqsaugiññaŋaniqsut atqagun Atanġum Jesus.

¹⁷ Tavra Peter-vlu John-lu iḷiŋagaich argatiŋ ilaiññun, aasii iliŋich aŋalarraqsiŋagai Ilitqusiġiksuam.

¹⁸ Tavra Simon, tautukamiuŋ Ilitqusiġiksuam aŋalattaġillaniġmagich iñuich tiliraunikun iḷitchitqurat iḷimmatigik argatiŋ, ilaan mannitchuumaŋagik Peter-lu John-lu,

¹⁹ uqaqłuni, Aitchuqtinŋali taavrumiŋa suaŋŋanmik, kimulliqaa iḷigupkich argatka aitchuusiaqaġumauq Ilitqusiġiksuamik.

²⁰ Tavra Peter-m uqallautiŋagaa, Manikpich suksrauqatigilisin, qanuq isumaŋaniqsutin piññaktaaġiyumiñaġasugalugu maniŋñik aitchuutaa God-im.

²¹ Iḷauyumiñaitchutin uumani savaaptiŋni, qanuq nalaunŋasipiaŋaitchutin iḷuŋni sivuġaani God-im.

²² Isumalitqigiñ taavrumaŋŋa pigiitchuamiñ sivunniutiŋniñ, aŋaiyyulutillu Ataniġmun, ilaanun suliqutigiŋaiqulugu pigiitchuakun sivuniqaġniġiñ.

²³ Qanuq iḷitchuġigikpiñ siġmaaġutiqaqtilaaġnik killuqsraunmik, suli piḷuutim aŋalattaġigaatin.

²⁴ Tavra Simon kiuŋagik Peter-lu John-lu, Aŋaiyyutisiñŋa Ataniġmun, nalliiŋich unnii uqallautiptik taŋŋiŋitchumaut uvamnun.

²⁵ Tavra uqalugaaġutigianikamitku uqautigivlugulu uqalua Atanġum, Peter-lu John-lu utiŋaruk Jerusalem-mun. Alġaqsruutigiŋagaak tusaayugaaġiksuaq iñugiaktuanun nunaaqqiŋiññun Samaria-ġmiut.

Philip-lu Suġautchiqirilu Ethiopia-ġmiu

²⁶ Tavrali isaġulga Atanġum uqallaŋaruq Philip-mun, Itqanaiġiñ aullaġuglutin uŋallam tuŋaanun apqutinun Jerusalem-miñ Gaza-mun. Taamna apqun nunagluktuakun.

²⁷ Tavra Philip itqanaiyaqłuni aullaŋaruq. Ethiopia-ġmiu eunuch-guruaq, suġautchiqiri iglauniqsuq aiñmun. Taamna iñuk naumaruaq atanauraq qaunaksrivḷuni suġaliŋiñik aġnam umialgum, taggisiqaqtuaq Candace-mik Ethiopia-mi. Ilaa Jerusalem-muŋaniqsuaq aŋaiyyusukłuni God-mun,

²⁸ aasii aisaġniqsuaq tuttuqpiraunmiñi aksraliktuani usiaqsiqł̣uni. Usiaqsiḷḷaġmi taiguaġniqsuaq uqaqtaata God-im Isaiah-m makpiġaaŋiñiñ.

²⁹ Tavra Ilitqusiġiksuam uqallautiŋagaa Philip, Ullaguŋ piqasiuttuiñ uumuŋa tuttuqpirautinik aksraliktuaġaqtuamun.

³⁰ Tavra Philip aqpanŋaruq, aasii tusaavlugu taiguaqtuaq makpiġaaŋiñiñ Isaiah-m uqaqtaata God-im. Tavra ilaan apiġiŋagaa, Kaŋiqsivich taiguakkaġnik?

³¹ Ilaan kiuŋagaa, Qanuġluŋa kaŋiqsiñiaqpik iñuum iḷisautiŋisuaqpaŋa? Tavra aiyugaaŋagaa Philip mayuġlugu aquptaaqatigitquvluni.

³² Tavra uqaluuraq Bible uqaluat taiguaġinikkaŋa uumiŋauniqsuq, “Imnaisun tasikuaqtauruatun tuqutchiviŋmun naagga imnaiyaatun sivuġaani salirimi nivliḷaitchuatun, ilaaptauq uqallaŋaiñmiuq.

³³ Ilaa pimaqłuktaqtauŋaruq, aasii saglutigivlugu pasiŋagaat. Kia quliaqtuaġiyumiñaqpagich iñuumman iñuuqatiŋisa pigiisilaaŋat, qanuq ilaa tuqutauŋaruq.”

³⁴ Tavra suġautchiqirim uqallautiŋagaa Philip, Uqautiŋŋa kimik uqaqtaa God-im uqautiqaqpa? Uqautigiva inmiñik, naagga alla iñuk uqautigivauŋ?

³⁵ Tavra Philip uqarraqsiŋaruq, aasii aullaqisaaġivlugu taamna Bible uqaluat ilaan quliaqtuaġutiŋagaa tusaayugaaġiksuanik Jesus-kun.

³⁶ Tavra iglauniallaġmiŋ apqutitigun tikiñŋaruk imaqsuŋmun, aasii suġautchiqiri uqallaŋaruq, Tautuguŋ, uvva imiq. Sumik piñaiḷutaqaġumiñaqpik paptaiqsauniksrapkun?

³⁷ [Tavra Philip uqallaŋaruq, Ukpiġuvich iluqaaniñ uummatiŋniñ paptaiqsauyumiñaqtutin. Aasii ilaan kiuŋagaa uqallakłuni, Ukpiqtuŋa Jesus Christ Iġñiġitilaaŋanik God-mun.]

³⁸ Tavra suġautchiqirim nutqaqtitquŋagai tuttuqpirautit aksraliktuani, aasii iluqatik atqaqłutik imiġmuŋaruk Philip-lu suġautchiqirilu, aasii Philip-gum paptaiŋagaa.

³⁹ Tavra qakimmaŋnik imiġmiñ Ilitqusiġiksuaŋata Atanġum aullautiŋagaa Philip, aasii suġautchiqirim taututqiŋaitkaa tavraŋŋa, aasiiḷi suġautchiqiri aullaŋaruq iglauyaamigun quviasukpakłuni.

⁴⁰ Tavra Philip iḷitchuġikami Ashdod-mi itilaamiñik, tamaunnaaqami alġaqsruutigiŋagaa tusaayugaaġiksuaq nunaaqqipayaanun tikiḷġataqłuni Caesarea-mun.