Acts 6 - Iñupiatun Mumiksat Uqalugiksuat

Tallimat Malġuk Iñuich Ikayuqtit

¹ Tavra taipkunani uvluni ukpiqtuat iñugiaksimmata, Greek-tun uqausiqaqtuat Jews uqamayuutiqaŋarut Jew-guruanun, uqaqłutiŋ uiḷgaŋaruatiŋ mitchugisuunivḷugich uvlutuaġman autaaġmata.

² Tavra qulit malġuk tiliraunikun iḷitchitqurat ququaŋagaich atautchimun ukpiqtuat, aasii uqallakłutiŋ, Nalaunŋaitchuq uvagut aġiuguptigu alġaqsruiñiq uqaluanik God-im autaaqtausugluta niqinik.

³ Tavraasii aniqatiit, piksraġitchi tallimat malġuŋnik aŋutinik uqautikkusiaqaġluataqtuanik, aŋalatittuanik Ilitqusiġiksuamun isumattunmullu, savaakkigaksraptiŋnik taavrumiŋa.

⁴ Aasiiḷi uvagut atuġniaġikput piviksraqput aŋaiyyuuġniġmun alġaqsruiñiġmullu.

⁵ Tavra uqallautaata iviġaŋagaich iluqaisa iñusalaich, aasii piksraqtaaġiŋagaat Stephen, suaŋaruaq ukpiġunmiñi aŋalatiłłuniḷu Ilitqusiġiksuamun. Piksraqtaaġiŋammigaich Philip-lu Prochorus-lu Nicanor-lu Timon-lu Parmenas-lu Nicolaus-lu Antioch-miu, Jew-guŋitchuaq ukpiliŋaruaq Jew-guruatitun.

⁶ Taapkua inillaŋagaich sivuġaannun tiliraunikun iḷitchitqurat, aasii aŋaiyyutiŋagaich iḷivḷugiḷḷu argatiŋ ilaiññun.

⁷ Tavra uqalua God-im siaminŋaruq, suli ukpiqtuat Jerusalem-mi iñugiaksisaiññasugruŋarut, suli iñugiapiaġataqtuat aŋaiyyuliqsiqpaich ukpiliŋarut.

Stephen Tigutaaqtauruq

⁸ Tavra Stephen, ikayuqpakługu God-im suaŋŋanmik, akunġanni iñuich savaŋaruq kamanaqtuanik aliuġnaqtuanik nalupqinaiyautinik alġaqsruiñiŋan iḷumun itilaaŋanik.

⁹ Tavra iñuich iḷaŋisa akiḷḷiḷiŋagaat iḷauruat aŋaiyyuviŋmun taggisiqaqtuamun Atanġiqsitauruat Iñuich. Taapkua Jews qaiŋarut Cyrenia-miḷḷu Alexander-miḷḷu, allallu Jews qairuat Cilicia-miñ Asia-miḷḷu qapiqtaġniaŋagaat Stephen.

¹⁰ Tavra Ilitqusiġiksuam isumattusiŋagaa Stephen uqaġman, aasii iliŋisa qapiqtalguiñŋagaat.

¹¹ Tavra akiḷiqł̣ugich iñuich iḷaŋich nalunautchivḷutiŋ kiaqsruŋagaich uqaquvlugich inna, Tusaaŋagikput uqaġman uqamaqłuutinik Moses-kun God-tikullu.

¹² Tavra ilaisa tainnaqłutiŋ aŋalayyauŋagaich iñuich, umialiŋnallu, iḷisaurriḷḷu pitquranik. Tavra Stephen ullakługu tigguġluŋagaat, aasii qaġġisivlugu uqaqsitaaqtitchiriñun.

¹³ Suli qaġġiriŋarut iñuich iḷaŋiññik saglutiginniktuksranik Stephen-mik uqaquvlugich inna, Una iñuk uqaŋaiyuitchuq uqaluŋnik paaqsaaŋaruanik uumuŋa aŋaiyyuvikpaptiŋnun, pitquranullu qaisauŋaruanun Moses-kun.

¹⁴ Qanuq tusaaŋagikput uqallaŋman taamnagguuq Jesus Nazareth-miu suksraunġiiñiaqtuaq uumiŋa aŋaiyyuvikpaŋmik, suli allaŋŋuġlugich piraġautchich Moses piraksriutiŋi uvaptiŋnun.

¹⁵ Tavra takunnapiaġataqługu, iluqaġmiŋ aquppiruat kasimmarriruani tautuŋagaat Stephen kiiñaŋa iḷiruaq isaġulgum kiiñaŋatun.