Acts 5 - Iñupiatun Mumiksat Uqalugiksuat

Ananias-lu Sapphira-lu

¹ Iñuglivsauq atiqaqtuaq Ananias-mik piqatigivlugu nuliani Sapphira tunisiŋaruk nunaviñiġmik iliŋikta pimiŋnik,

² aasii nuliani iḷisimapkaqługu tutquqsiŋaruq iḷaŋanik akiata, aasii qaġġirrivḷuni iḷałhiñaŋiñik akiŋata tiliraunikun iḷitchitquranun.

³ Tavra Peter-m uqallautiŋagaa, Ananias, summan Satan-mun aŋalatitpich saglutquvlutin Ilitqusiġiksuamun, tutquqtaqaquvlutin iḷaŋanik akiata nunam?

⁴ Tuniŋaiñŋaan nunan ilivich pigiŋagiñ. Suli tunianikkaluaqapku maniich ilivich pigimmigitin. Summan-aasii isummiŋavich tainna pisukłutin? Sagluqiŋaitkitin iñuich, aglaan sagluŋarutin God-mun.

⁵ Tavra Ananias tusaapqauraqamigich taapkua uqaluich nusiḷiŋaruq. Suli iñuich iluqatiŋ tusaaruat taavrumiŋa iqsitchaŋarut.

⁶ Nukatpiat isiŋarut, aasii nimmaaqqaaqługu timaa annisiŋagaat, aasii iḷuviqługu.

⁷ Pianikpalliġmata ikarraich piŋasut, nuliaŋa isiŋaruq naluvluni sutilaamik.

⁸ Tavra Peter uqallaŋaruq ilaanun, Uqallautiŋŋa tunigaluapiaqtilaaŋanik nuna tainnatun. Aġnaq uqallaŋaruq. Aaŋ, tavra tainnatun.

⁹ Tavra Peter uqallaŋaruq ilaanun, Qanuqimña atisivḷutik atunim uuktuqpitku Ilitqusiġiksuaŋa Atanġum. Naalaġniiñ, sukpaluat qaŋma isigaŋisa iḷuvviuqtuat uigñik, paamuktut, aasii annisiniaġmigaatin tainnatun.

¹⁰ Tavrauvvaa aġnaq ulġuŋaruq sivuġaanun Peter-m, aasii tuquvluni. Nukatpiat isiqamiŋ tautuŋagaat tuquaniktuaq, aasii akigaqługu iḷuviŋammigaat saniġaanun uiŋata.

¹¹ Tavra iluqaġmiŋ aŋaiyyuliqiruat allallu iluqaġmiŋ tusaaruat iqsitchapiaġataŋarut.

Kamasautit Aliuġnaqtuallu

¹² Tavra akunġanni iñuich tiliraunikun iḷitchitqurat piŋarut iñugiaktuanik aliuġnaqtuanik nalupqinaiyautauruanik uqaluŋmiŋ iḷumun itilaaŋanik. Tavra iluqaġmiŋ ukpiqtuat kasimaŋarut atautchimi Taġġisimaaġviŋmi Solomon atqanik atiqaqtuami.

¹³ Nalliat-unnii iñuich iḷaliqsuutisausiiñŋaruq ilaiññun, iñuŋnun uqautigilluataġaluaqtillugich.

¹⁴ Aglaan iñugiaksisaiññaŋarut iñuich iḷaliutiruat ukpiqtuanun, aŋutisalaiḷḷu aġnallu ukpiliqsuat Ataniġmun.

¹⁵ Pisigivlugu tiliraunikun iḷitchitqurat savaaġikkaŋat naŋittuat iñuich akigaŋagaich apqutinun, aasii inillakługich siñigviŋñun ikuvġanullu, Peter tamaunnaaqpan taġġaŋanun-unnii nalautquvlugich iḷaŋich.

¹⁶ Iñuich-suli katinŋammiut nunaaqqiñiñ avataaniñ Jerusalem, qaġġisivlugich naŋittuat, tamatkualu iłuiḷḷiuġutiqaqtuat ilitqusiqł̣uŋnik, aasii iluqaġmiŋ iłuaqsirauŋarut.

Tiliraunikun Iḷitchitqurat Nagliksaaqtitaurut

¹⁷ Tavra aŋaiyyuliqsiqpaich qaukłiat piqatiniḷu iluqaġmiŋ iḷauruat Sadducees-nun suammautiŋagaich killuġivlugich tiliraunikun iḷitchitqurat. Tavra sivunniŋarut qanusiġaġukługich.

¹⁸ Tavra tigutaaŋagaich tiliraunikun iḷitchitqurat aasii iḷivḷugich tigutaaqsivikaamun.

¹⁹ Taavrumani unnuami isaġulgan Atanġum upkuiŋagai tigutaaġvium paaqpaŋi, aasii annisikamigich tiliraunikun iḷitchitqurat uqallautiŋagai,

²⁰ Aullaġitchi, aasii makillusi aŋaiyyuvikpaŋmi uqautiyaqtuqsigik iñuich mattumuuna nutauruakun iñuggutikun.

²¹ Tavra tilirauruat kamaksriŋarut, aasii qausaġataġman isiŋarut aŋaiyyuvikpaŋmun, aasii iḷisaurriŋarut. Tavra aŋaiyyuliqsiqpaich qaukłiata piqatiniḷu ququaŋagaich Jew-guruat umialiŋnaŋich kasimayyaquvlugich. Aasii tilisiŋarut uqaluŋmik tigutaaġviŋmun tilirauruat qaġġisitquvlugich inmiŋnun.

²² Tavra aŋuyaktit atanauraŋich qaikamiŋ, paqinŋaitkaich tigutaaġviŋmi, aasii uqaqsitaaqtitchiriñun utiqłutiŋ quliaqtuaŋarut.

²³ Paqinŋagikput tigutaaġvik pitchiġiiyautiqapiaqługu, suli qaunaksrit qikaqługich upkuani, aasii aŋmaqaptigu paqinŋitchugut iñuŋmik iḷuani.

²⁴ Tavra atanauraŋata munaqsrich aŋaiyyuvikpaŋmik aŋaiyyuliqsiqpaiḷḷu tusaakamiŋ taapkuniŋa qanuqsausiiñŋarut, isumaaluutigivlugu sumun taavruma tikiutiniksraŋa.

²⁵ Tavra iñuum qaivḷuni uqallautiŋagai, Iñuich tigutaaġviŋmuŋakkasi makitarut aŋaiyyuvikpaŋmi iḷisaurrivḷutiŋ iñuŋnik.

²⁶ Tavra atanauraŋata munaqsrich piqasiqł̣uni iñuŋmiñik qaġġisiŋagai tilirauruat, aglaan piaqłuktaqsaiḷivḷugich, anayasukłutiŋ uyaġaŋnik miḷḷuuġniaġasugalutiŋ iñuŋnun.

²⁷ Tavra qaġġisikamisigik inillaŋagaich sivuġaannun uqaqsitaaqtitchirit. Aasii aŋaiyyuliqsiqpaich qaukłiata apiqsruqtuŋagai.

²⁸ Tavra uqallautiŋagai, Piraksripiaġataŋagaluaġivsi iḷisaurritquŋił̣ł̣usi taavrumuuna Jesus-kun, naaggauvva ilivsi siaminŋagiksi iḷisaurrutiksi iñupayaanun Jerusalem-mi, aasii patchisaupkaqsaqłuta tuqutauniŋagun.

²⁹ Tavra Peter-m tilirauruallu kiuŋagaich, Kamagiraksraġipiaġikput God kamaksriñiġmiñ iñuŋnik.

³⁰ God-iŋata maŋŋuupta aŋipkaŋagaa Jesus tuqqunmiñ, ilivsi tuqutanikavsiuŋ kikiaktuutivlugu aŋarrauramun.

³¹ God-im kamanaqsipkaŋagaa inillakługu taliqpiŋmi tuŋaanun Aullarriġuqługu Annaurriġuqługulu, iñuich Israel-guruat isumalitqikkumiñaqsivḷugich, piḷuutitiŋ suliqutigiŋaiqsaupkaġlugich itqaumayumiñaiġḷugich.

³² Aasii uvagut iḷisimavlugich iḷumun itilaaŋat quliaqtuaġigivut, uvagullu Ilitqusiġiksuavlu, God-im aitchuutaata tamatkunuŋa kamaksriruanun inmiñik.

³³ Uqaqsitaaqtitchirit tusaakamirruŋ taamna, qinnalipiaġataŋarut, suli tuqutchuŋagaich tilirauruat iḷitchitqurat.

³⁴ Aglaan iḷaŋat Pharisee-guruaq kasimmarririni, atiqaqtuaq Gamaliel-mik, iḷisaurri pitquranik, isumakkusiaqaġluataqtuaq iñupayaaniñ, makinŋaruq aasii piraksriivḷuni tilirauruat annisitquvlugich.

³⁵ Aasii uqallautiŋagai uqaqsitaaqtitchirit, Israel-guruasii, qaunagisitchi qanuq aŋalatchisilaavsiññik taapkuniŋa iñuŋnik.

³⁶ Qanuq sivuanni makua uvlut Theudas iñukpalliŋaruq kamanaqsiḷiqłuni inmiñik. Aasii 400-guvalliqsuat iḷḷatiŋarut ilaanun. Tuqutauŋaruq, suli iluqaġmiŋ maliġuaqtiŋi siaminŋarut suuŋaiqł̣utiŋ.

³⁷ Aquagun suli Judas Galilee-ġmiu iñukpalliŋammiuq kisitchipkaqługich iñuŋnik, aasii maliksuktitchivḷuni iḷaŋiññik iñuich inmiñun. Ilaaptauq tuqutauŋammiuq, iluqaġmiglu maliġuaqtiŋi siaminŋarut.

³⁸ Tavraasii paŋmapak piruakun uqallautigivsi. Qanuqsaanagich taapkua iñuich. Iḷaksianagich. Taamna sivunniuġun savaaŋallu iñuŋniñ piruagugumi piiġñiaqtuq.

³⁹ Aglaan God-miñ piruagukpan, akiiḷiyumiñaipiaġisi. Ilivsiunnii iḷaanni paqitaaguniaqtusi aŋuyaglugu God.

⁴⁰ Tavra uqaqsitaaqtitchirit kamagiŋagaat Gamaliel piraksriutaa. Aasii ququaqqaaqługich tiliraunikun iḷitchitqurat, ipiġaqtuqtinŋagaich, suli piraksriqł̣ugich uqaquŋił̣ł̣ugich suuramikunnii quliaqtuaġilugu Jesus, aasii anipkaqługich.

⁴¹ Tavra iliŋich qimautiŋarut uqaqsitaaqtitchiriniñ, quviasukłutiŋ God-im nalliummatirualiyumiñaġniġmatiŋ nagliksaaġutigiyumiñaqługu kanŋunaqtuakun Jesus.

⁴² Suli uvlutuaġman aŋaiyyuvikpaŋmi, iñuiḷḷu aimaaġviŋiññi, iḷisaurriŋarut alġaqsruivḷutiglu tusaayugaaġiksuanik Jesus-kun Christ-guruakun.