Acts 4 - Iñupiatun Mumiksat Uqalugiksuat

Peter-lu John-lu Apiqsruqtuġaich Uqaqsitaaġviŋmi

¹ Tavra Peter-lu John-lu uqaġataviksillugik iñuŋnun aŋaiyyuliqsiqpaich, atanauraŋallu aŋaiyyuvikpaum munaqsriŋisa, Sadducees-lu ullaŋagaich,

² qanuqpaaŋavlutiŋ pisigivlugu iḷisaurriñiŋat iñuŋnik quliaqtuaġivlugu Jesus aŋiñivḷugu tuqqunmiñ, ukpiġnaqsivḷugu iñuich aŋipkaqtauniaġniŋat tuqqunmiñ.

³ Tavra tigutaaŋagaich, suli inillakługik tigutaaġviŋmun uvlaakutchiaqsaqługu, unnugruiññaġman.

⁴ Aglaalli tamatkua iñugiaktuat tusaaruat uqaluŋmik ukpiliŋarut, aasii iñugiaktilaavalliat iñuich ukpiliqsuat 5,000.

⁵ Uvlaakumman Jew-guruat atanauraŋiḷḷu, umialiŋnaŋiḷḷu, iḷisaurriḷḷu pitquranik katinŋarut atautchimun Jerusalem-mi,

⁶ kasimaqatigivlugich aŋaiyyuliqsiqpaich qaukłiat Annas, Caiaphas-lu John-lu Alexander-lu, allallu iḷauruat aŋaiyyuliqsiqpaich qaukłiata nanmiñiq iḷaŋiñun.

⁷ Tavra inillaanikamisigik Peter-lu John-lu sivuqqamiŋnun apiġiŋagaich, Qanuqłutiŋ taimña iñuk iłuaqsiŋavitku? Sumik suaŋŋatiqaqpisik? Kia ataniġnaqutaagun taamna piŋavitku?

⁸ Tavra Peter, Ilitqusiġiksuam aŋalałługu kiuŋagai, Atanaurauruasii, iñuŋnun umialiŋnauvlusiḷu,

⁹ uvaguk qanuqitilaaqtaugumnuk uvlupak pisigilugu savaaġiksuaq pirauruaq pisualaitchuamun iñuŋmun qanuġlu iłuaqsirautilaaŋa,

¹⁰ iḷisimaruksraurusi iluqasi, iluqaġmiglu iñuich Israel-guruat iḷisimaruksraummiut, una iñuk makitaruaq sivuqqavsiññi iłuaqsiraupiaġataŋaruq suaŋŋataagun Jesus Christ Nazareth-mium, ilivsi kikiaktuutiŋakkaqsi aŋarrauramun, aasiiḷi God-im aŋipkakkaŋa tuqqunmiñ.

¹¹ Jesus uyaġagruatun ittuq Bible uqautigikkaŋat inna, “Kaŋiġalluŋmi uyaġagruaq, piitchuiññiqsrapiaq igluqpiñiġmi, ilivsi igluqpirit iginŋagiksi.”

¹² Iñuitchuq allamik annaurriksraptiŋnik, qanuq allamik iñuitchuq iluqaani nunami God-im atchiŋakkaŋanik uvagut annaurrigiyumiñakkaptiŋnik.

¹³ Tavra uqaqsitaaqtitchirit iḷitchuġikamiŋ Peter-lu John-lu taluqsraŋisilaaŋaŋnik, suli iḷisaŋaisilaaŋaŋnik iñugruiññauvlutiglu, kamasuliŋarut. Tavra iḷitchuġiŋarut piqatauŋatilaaŋaŋnik Jesus-mun.

¹⁴ Tavra tautuaġivlugu iñuk iłuaqsirauŋaruaq makitaruaq saniġaaŋni, akiḷḷiḷiqsuutiksraiñŋarut.

¹⁵ Tavra aqpigiqqaaqługik uqaqsitaaġviŋmiñ uqaqatigiirraqsiŋarut avanmun,

¹⁶ uqaqłutiŋ, Qanuġniaqpisigik apkuak iññuk? Qanuq-uvva iñupayaat iñuuruat Jerusalem-mi iḷisimagaat suqpauruaq aliuġnaqtuaq savaaŋak taamapkuak, aasii piiḷaaġiyumiñaitkikput.

¹⁷ Aglaan siamitinŋaiqsaġlugu iñuŋnun tavraŋŋaaglaan kiliglavut sivuuġasaaġlugik uqautigiŋaiqulugu Jesus iñuŋmun kimulliqaa.

¹⁸ Tavra ququatqiŋagaich, aasii piraksriqł̣ugik suuramikunnii uqaŋaiquvlugik, iḷisaurriŋaiġḷugiglu Jesus-kun.

¹⁹ Tavra Peter-vlu John-lu kiuŋagaich, Ilivsiññik isivġiqsiuŋ nalliak nalaunŋatilaaŋa God-im takkuani kamaksrigumnuk, ilivsiññik naagga God-mik.

²⁰ Qanuq uqautigiŋaiġumiñaitkikput uvagut uvaptiŋnik tautuŋakkaqput, tusaaŋakkaqpullu.

²¹ Tavra uqaqsitaaqtitchirit sivuuġasaavsaaqqaaqługik Peter-lu John-lu aullaqtinŋagaich. Iliŋich iḷitchuġiŋaitchut tatavsautauyumiñaqtuamik iliŋiŋnun, qanuq iñupayaat nanġaŋagaat God taavrumuuna piruakun.

²² Taamna iñuk iłuaqsirauruaq aliuġnaqtuakun ukiuqaŋaruq sippiqł̣ugu malġukipiaq.

Ukpiqtuat Aŋaiyyurut Taluqsrautaitchukłutiŋ

²³ Tavra Peter-lu John-lu anipkaġmatiŋ aullaŋaruk avilaitqanmiŋnun, aasii quliaqtuaqłutiŋ qanuq aŋaiyyuliqsiqpaiḷḷu umialiŋnallu uqautiŋiññik inmiŋnun.

²⁴ Tavra tusaakamirruŋ taamna, iluqaġmiŋ aŋaiyyuqatigiirraqsiŋarut God-mun, uqallakłutiŋ, Sapiġñaqtuaq Ataniq, savaŋaruatiin qiḷaŋmik, nunamiglu, taġiumiglu, suli supayaanik imaġikkaŋiññik,

²⁵ ilivich David kivgan maŋŋuqput ilitqusiġiksuakkun uqaqtinŋagiñ uqallaŋman inna, “Summan Jew-guŋitchuat makivsaallakpat akiḷḷiḷiutivlutiŋ Ataniġmun, isumavlutiŋ akiḷḷiḷiqsuutitiŋ taŋŋiġñiaġasugalugich pivigiruaguŋitchullu?

²⁶ Umialgiḷḷu atanaurallu nunami kasimasuurut atautchimi itqanaiyaqłutiŋ akiḷḷiḷiqsuġuqługu Ataniq Christ-ŋalu.”

²⁷ Tavra tainnatun iḷumun Herod-lu Pontius Pilate-lu kasimaŋaruk atautchimi uumani iniqpaŋmi, piqatigivlugich Jew-guŋitchuallu Israel-guruallu akiḷḷiḷiqł̣ugu Jesus, Piḷuutaitchuaq kivgan, Christ-guqtinŋaran.

²⁸ Katinŋarut atautchimun pisukłutiŋ, nalugaluaŋŋaan ilivich suaŋŋatipkun pisuutipkullu sivunniutigianiŋakkan piyumaaqługu.

²⁹ Aasii paŋmapak, Ataniiq, naluruuraaġnagu sivuuġasaaġutaat, aasii taluqsraŋaiġḷuta uvagut ilivich kivgatin uqaġumiñaqsiḷuta ilivich uqaluŋnik.

³⁰ Iliviḷḷi Ataniiq, suaŋŋatipkun iłuaqsiḷugich naŋittuat, suli aliuġnaqtuat nalupqinaiyautauruat uqalupta iḷumun itilaaŋannik pipkaġlugich ataniġnaqutaagun piḷuutaitchuam kivgaqpich Jesus.

³¹ Tavra aŋaiyyuaniŋmata ini kasimaviat aulaŋaruq, suli iluqaġmiŋ immiqsauŋarut Ilitqusiġiksuamik suli uqautigiŋagaat uqalua God-im taluqsraŋaiqł̣utiŋ.

Atunim Pigigaich Supayaat

³² Tavra atautchiiŋŋuqtuat piqatigiiksiłłutiŋ ukpiqtuat atipiaġataŋarut supayaakun. Kiñaliqaa uqallaŋaitchuq sunapayaaq ilaan piñi pimaaqtuġlugu, aglaan piqaŋarut supayaanik atunim.

³³ Tavra kamanaqtuakun suaŋŋatikun tiliraunikun iḷitchitqurat quliaqtuaġiŋagaat aŋiñiŋa Atanġum Jesus, suli God-im atqunaqługu ikayuŋagai iluqaisa.

³⁴ Iñuiñŋaruq piiḷḷiuqtuamik iñuŋmik akunġanni, qanuq iñugiaktilaamiktun nunaqaŋaruat naagga igluqpaqaŋaruat tuniŋagaich, aasii qaġġisivlugich akiŋich tuniamiŋ,

³⁵ aasii qaił̣ł̣ugich tiliraunikun iḷitchitquranun, aasii autaaġaġigaich iñullaanun piqaqtuksraġuġaġimmata.

³⁶ Tavra Joseph, Levite-guruaq aniŋavluni Cyprus-mi, tiliraunikun iḷitchitqurat atchiŋaraŋat Barnabas-mik (sivuniqaqtuamik qapiŋaisaaqtimik),

³⁷ tunisiŋaruq nautchiaqaġviŋmiñik, aasii maniich qaił̣ł̣ugich tiliraunikun iḷitchitquranun.