Acts 3 - Iñupiatun Mumiksat Uqalugiksuat

Pisualaitchuaq Iñuk Iłuaqsirauruq

¹ Tavra Peter-lu John-lu aŋaiyyuvikpaŋmuŋaruk aŋaiyyunaqsimman piŋasunuŋman.

² Tavra tavrani aŋaiyyuvikpaum paaqpaŋani atiqaqtuam Piññaġnaqtuamik iñuk inŋaruq pisualaitchuaq aniñiġmiñiñqaŋa. Uvlutuaġman akigaġayuŋniġaat taavrumuŋa paaqpaŋmun maniŋñik piatchiaqtaquvlugu isiqtuaniñ aŋaiyyuvikpaŋmun.

³ Tautukługik Peter-lu John-lu isiqsaqtuak aŋaiyyuvikpaŋmun, apiqsriŋaruq nagliktuusiaksranik.

⁴ Tavra iluqatik takunnaŋagaak, aasii Peter-m uqallautiŋagaa, Qiñiqtiguk.

⁵ Tavra takunnaŋagik niġiukłuni aitchuusiaksramiñik iliŋiŋniñ.

⁶ Tavra Peter-m uqallautiŋagaa, Maniitchuŋa suuramik-unnii, aglaan aitchuġniaġikpiñ pigikkamnik, ataniġnaqutaagun Jesus Christ Nazareth-mium pisuaqugikpiñ.

⁷ Tavra Peter-m tiguŋagaa taliqpiagun, aasii makitiłługu. Tavra tavrauvvaa isigaŋi siŋiġñiŋiḷu suaŋŋasiqsauŋarut.

⁸ Aasii minŋiqłuni makinŋaruq, pisuaqłuniḷu, aasii isiqasiqł̣ugik aŋaiyyuvikpaŋmun, pisuaqłuni minŋiqtaqłuniḷu, suli nanġaqługu God.

⁹ Tavra iñupayaat tautuŋagaat pisuaqługu, nanġaġmagulu God,

¹⁰ iḷisaġivlugulu taimña aquppisuuruaq nagliktuusiaksrat pisigivlugich Piññaġnaqtuami, Paaqpaŋani aŋaiyyuvikpaum, suli iliŋich kamasupiaġataŋarut iłuaqsiraumman.

Peter Alġaqsruiruq Aŋaiyyuvikpaŋmi

¹¹ Iñuk iłuaqsirauruaq tigummipkaqtillugu Peter-miglu John-miglu iñuich iluqaġmiŋ kamasualavlutiŋ aqpamik katinŋarut ilaiññun, taġġisimaaġviŋmi atiqaqtuami Solomon pianik.

¹² Tavra Peter-m tautukkamigich iñuich, uqallautiŋagai, Iñuich Israel-guruasii, Summan kamasuuttaġivisiuŋ taamna? Summan takunnaqpisigut? Isumavisi uvaguk suaŋŋatiptiŋnun naagga god-tiliqiniptiŋnun una iñuk pisuallasipkaġasugalugu?

¹³ God-tiŋata Abraham Isaac-guvlu Jacob-lu, God-iŋata maŋŋuupta kamanaqsiḷiŋagaa kivgani Jesus. Ilivsi aitchuutigiŋagiksi ataniġnaqutiqaqtuanun, pisuŋił̣ł̣ugulu Pilate takkuani, ilaan tigutaaqtauŋaiqsitchukkaluaġmagu.

¹⁴ Aasii ilivsi piiḷaaġiŋagiksi Jesus Piḷuutaitchuaq, Nalaunŋaruaġlu, aasii apiqsriaġiłhaaqługu Pilate-mun iñuaqti tigutaaqtauŋaiqsitquvlugu.

¹⁵ Aasii ilivsi iñuktaġivlugu Iñuggutiqaqtitchiruaq. Aglaan God-im aŋipkaŋagaa tuqqunmiñ. Aasii uvagut tautuŋavlugu quliaqtuaġigikput.

¹⁶ Taamna Jesus taamnauruq ukpiġivlugu ataniġnaqutaa uqautigikkaqput. Ilaan iłuaqsiŋagaa una iñuk iḷisimakkaqsi. Qanuq taamna iñuk ukpiliŋaruq Jesus-mun, aasii ukpiġutaata iłuaqsipkaġaa surruiqł̣ugu, aasii iluqasi tautukkiksi.

¹⁷ Aasii paŋmapak aniqatiit, iḷisimaruŋa taamna pikkaqsi Jesus-mun, ilivsiḷu umialiŋnasiḷu piŋagiksi naluvlusi.

¹⁸ God-im, sivuani taamna piŋaiñŋaan, uqautigiŋagaa uqaqtimigun iluqaisigun ilaan Christ-ni nagliksaaqtuksraunivḷugu, aasii ilaan taŋŋiqsinŋagaa tainna.

¹⁹ Isumalitqigitchi, suli God-mun saallusi, ilaan piiġumagai piḷuutisi,

²⁰ aitchuusiaqaġumausi Ataniġmiñ ilitqutchivsi suaŋŋatiksraŋanik, quviasuunmiglu, suli ilaan tiliyumagaa Jesus Annaurriksraqtaani ilivsiññun.

²¹ Taamna Jesus qiḷaŋmiinniaqtuq tikitchiaġilugu supayaat nutaaġuġniksraŋat, God-im uqausiatun sivuani ilaaguaqtauŋaruatigun uqaqtimigun iŋiḷġaan.

²² Moses uqallaŋaruq inna, “Ataniq God-iksi tilisiñiaqtuq ilivsiññun, uqaqtimik aniqatiivsiññiñ uvamniktauq tilisiŋammatun. Ilivsi naalaġniraksraġigiksi supayaanik uqallautikpasi.

²³ Aasii kiñaliqaa naalaġniŋitchuaq taavruma uqaqtaata God-im uqaluŋiñik piiqsauniaqtuq God-im iñuŋiñiñ, aasii suksraunġiqsauluni.”

²⁴ Aasiivsauq uqaqtiŋi God-im, taputivlugich Samuel-lu taipkualu iñuuruat aquagun, iluqaġmiŋ uqaluksraqaŋaruat uqautigiŋammigaich makua paŋmapak uvlut.

²⁵ God-im unniqsuqłiisiŋi uqaqtimigun ilivsiññun ittut, aasii iḷaŋiutivlusi sivunniuġutiŋiñun God-im maŋŋuuvsiññun, uqallausiġmisun Abraham-mun inna, “Ilivich kiŋunipkun uvaŋa anniqsuġniaġitka iñupayaurat nunami.”

²⁶ Tavraasii God piksraŋaruq, aasii tilivḷugu kivgani ilivsiññun, sivulliġivlusi anniqsuġukłusi iluqasi isumalitqiksillusi piḷuktuaniñ piḷġusivsiññiñ.