Acts 28 - Iñupiatun Mumiksat Uqalugiksuat

Malta-miittut

¹ Annaanigataqapta, iḷitchuġiŋagikput qikiqtaq atiqaqtilaaŋanik Malta-mik.

² Tavra iñuich tavraniittuat tukkuġiksipiaġataŋagaatigut, igniqsuutimmivḷuta paġlavlutalu iluqata, qanuq sialuguqsaanikłuni irriliqł̣uniḷu.

³ Tavra Paul katitchiŋaruq qiruŋnik aasii qirriutivlugich igniġmun, tavrani nimiġiaq salapqiŋaruq uunaqsimman aasii argaŋiñun nipiłłuni.

⁴ Tavrani Malta-miut tautukamirruŋ nimiġiaq niviŋaruaq Paul argaŋiñi, uqaurrutiŋarut avanmun uqaqłutiŋ, Nalupqinaitchuamik una iñuk iñuktaqaġniqsuq. Aasii annakkaluaqłuni taġiumiñ, paŋmapak tuquruksrauniqsuq paaqłiusiaġilugu piramiñun.

⁵ Paul aasii, ivsuksaŋagaa argagmiñiñ nimiġiaq igniġmun aasii qanuqpallaŋitchuq suuramik-unnii.

⁶ Tavra niġiugaqsigaluaqtut puvitchaqtilaaksraŋanik naaggaunnii tavraŋŋatchiaq puugniaġasugalugu Paul tuquluni. Sivisuruamik utaqqigaluaqamiŋ tautuŋisanikamiŋ sumik allanaqtuamik Paul-mi, isummitqiŋarut aasii uqallausiġivlugu god-aunivḷugu.

⁷ Tavra uŋasipiaŋitchuami taavrumaŋŋa tulagvianniñ nautchiaqaġviich inŋarut iñuqaqtuat Publius-mik umialganik qikiqtam. Ilaan paġlaŋagaatigut tukkuliqsimavlutalu uvluni piŋasuni.

⁸ Tavra Publius Aapaŋa naŋiliŋaruq uunnautinikłuni itiktaliqł̣uniḷu auksiġaqługu. Paul-gum itchaqiŋagaa aasii aŋaiyyutivlugu, aksiukługu iłuaqsiŋagaa.

⁹ Tavra taamna pimman, iluqaġmiŋ allattauq iñuich naŋittuat qikiqtami qaiŋammiut aasii iłuaqsirauvlutiŋ.

¹⁰ Taapkua iñuich aitchuŋagaatigut aitchuutinik iñugiaktuanik aasii aullaaqsikapta umiaqpak usiḷḷiŋagaat atugaksraptiŋnik iglaugupta.

Malta-miñ Rome-muktut

¹¹ Tatqich piŋasut pianiŋmata, ikuŋarugut umiaqpaŋmun atiqaqtuamun Malġigñik God-iŋnik. Taamna umiaqpak qaiŋaruaq Alexandria-miñ, aasii ukiivḷuni qikiqtami.

¹² Aullaqapta tikiñŋarugut iniqpaŋmun Syracuse-mun, aasii tavrani uvlivḷuta piŋasunik.

¹³ Tavraŋŋaasii supiaġaqłuta tikiñŋarugut iniqpaŋmun Rhegium-mun. Uvlaakumman uŋalaġuŋaruq aasii uvluŋni malġugni iglauvluta, tikiñŋarugut nunaaqqimun Puteoli-mun.

¹⁴ Tavrani paqinŋarugut ukpiqtuanik, aasii aiyugaaŋagaatigut nayuquvlutiŋ tallimat malġuŋni uvluni. Tavraŋŋa aullaqapta tikiñŋarugut Rome-mun.

¹⁵ Tavraniasii ukpiqtuat Rome-miut tusaakamisigut qaisilaaptiŋnik paaŋagaatigut, iḷaŋich ayuuqtigivlutiŋ nunaaqqimun atiqaqtuamun kasimaviŋmik Appius-mik, aasiisuli iḷaŋisa nunaaqqimun atiqaqtuamun Piŋasunik Tukkumaviŋñik. Paul kasuqamigich quyyavigiŋagaa God, aasii qapiŋaivsaaqłuni.

Rome-miittut

¹⁶ Tavra tikiññapta Rome-mun, Paul iniqaqtitauŋaruq ilaagun, munaqsriqaqługu aŋuyaktimik.

¹⁷ Uvlut piŋasut pianiŋmata Paul katitinŋagai atautchimun tavrani sivulliuqtauruat Jew-guruani. Aasii katitaniŋmata uqallautiŋagai, Aniqatiit, sumik piŋaitkaluaqtilluŋa paaqsaaŋaruamik iñuptiŋnun naaggaunnii piḷġusiŋiññun maŋŋuupta aitchuusiaġiŋakkaptiŋnun, tigutaaŋagaanŋa Jerusalem-mi, aasii aitchuutigivluŋa Rome-miunun.

¹⁸ Apiqsruqtuanikamiñŋa tigutaaqtauŋaiqsitchumaŋagaluaġaanŋa, iḷitchuġiŋiññamiŋ tuqurrutauyumiñaqtuamik killukuaġutimnik.

¹⁹ Tavra Jew-guruat tainna pitquriŋitkaqsimmata, naŋaġviiqama ullautisuŋaruŋa Caesar-mun isivġiquvluŋa, pasikkutiksramik uqautiksraitkaluaŋŋaġma iñuptigun.

²⁰ Taamna sivuniġivlugu apiqsriŋaruŋa tautugukłusi uqaqatigisukłusiḷu, atakkiataŋ ukpiġigiga Christ-guruaq qaiŋatilaaŋanik, Israel-guruat niġiugikkaŋat, aasii taamna pisigivlugu tigutaaqtauruŋa.

²¹ Tavra ilaisa uqallautiŋagaat, Tuyuusiaqaŋaitchugut Judea-miñ ilipkun, suli nalliataunnii aniqatiit mauŋaqtuat quliaqtuaġiŋaitkaat naagga uqautigiŋaitkaat suna pigiitchuaq ilipkun.

²² Aglaan uvva tusaasukkaluaqtugut qanuq isumaqaqtilaaġnik, iḷisimavluta sumipayaaq iñuich uqautigisuummatigik pigiitchuanik iḷauvigikkatin.

²³ Nalunaiqsiqqaaqłutiŋ uvlumik piqatigivlugu Paul, iñugiaktuat iñuich ullaŋagaat Paul taavrumani uvlumi inaanun. Uvlaaŋaniñqaŋa unnuaġataqtillugu, Paul kaŋiqsipkaġniataŋagai quliaqtuaġutivlugiḷḷu tusaayugaaġiksuaŋanik Atanniqsimmataata God-im iñuŋnun. Ilaan ukpiliqsinniaŋagai Jesus-mun taiguaġutivlugich pitquraniñ qaisauruaniñ Moses-kun, aglaaŋiññiḷḷu uqaqtiŋisa God-im.

²⁴ Aasii iñuich iḷaŋisa ukpiġiliŋagaich uqaluŋi, allalli arguasuktillugich.

²⁵ Tavra atinġiqamik inmiŋni aullaŋarut, Paul uqallaaniŋman atautchimik uqaluŋmik, Ilitqusiġiksuaq nalaunŋaruq uqallautikamigich maŋŋuusi Isaiah-kun uqaqtimigun, uqautivlugich God-im uqaluŋiñik inna,

²⁶ “Naalaġnituiññaġniaġaluaqtusi aglaan suuramikunnii kaŋiqsiyumiñaitchusi, suli qiñiqtuiññaġniaġaluaġmiusi iḷisaqsriyumiñaitchusi.

²⁷ Qanuq ilivsi iñuich puqiiḷiŋarusi, suli tusiḷḷaqsiŋarusi siqunġiqł̣usiḷu, iḷaanni iḷisaqsriñasugalusi suli tusaanasugalusi suli kaŋiqsiḷusi, aasii saallusi uvamnun iłuaqsitqulusi.”

²⁸ Tavra Paul uqallavsaaŋaruq, Iḷisimaruksraurusi God-im tusaayugaaġiksuaŋa annaurraunikun qaisauruq Jew-guŋitchuanun. Iliŋich naalaġniñiaqtut.

²⁹ Tavra Paul uqallaaniŋman taavrumiŋa, Jew-guruat aullaŋarut uqavaapiaġataqłutiŋ avanmun.

³⁰ Tavra Paul iñuuŋaruq iglumiñi tavrani ukiuk malġuk naałługik inmiñik akiḷiutivluni, paġlavlugich iñuich iluqaisa ullautiruat inmiñun,

³¹ alġaqsruutigivlugu God-im atanniqsimmataa iñuŋnun, iḷisautivlugiḷḷu Ataniġmik Jesus Christ-mik, uqaqłuni taluqsrautaił̣ł̣uni pitchaiḷiraił̣ł̣uniḷu.