Acts 27 - Iñupiatun Mumiksat Uqalugiksuat

Paul Rome-muksaqtuq

¹ Tavra sivunniutaumman umiaqpagaqtuksraġuqłuta Italy-mun aitchuutigiŋagaat Paul iḷaŋiḷḷu allat tigutaaqtat Julius-mun, atanauraŋannun Rome-miut aŋuyaktiŋisa atiqaqtuat Augustan-gum aŋuyaktiŋiñik.

² Ikuŋarugut umiaqpaŋmun Adramyttium-miŋŋaqtuamiñ aullaqsiññaaġuġman nutqaaġaġviŋiññun nunaaqqiŋiñi Asia-m, aasii tiŋinnaarraqsivḷuta. Aristarchus, Macedonia-ġmium Thessalonica-miñ, piqasiŋagaatigut.

³ Uvlaakumman tikiñŋarugut Sidon-mun. Julius-gum aŋalalluataŋagaa Paul piaqłuktautaitchuakun, suli aullaqtinŋagaa tautugiaquvlugich avilaitqatiŋi aitchuquvlugu sunik pigiraksraġikkaŋiñik.

⁴ Aullaŋarugut tavraŋŋa, aasii anuġi arguġiannaqłuni tiŋilġaiŋarugut qamanġagun qikiqtam Cyprus.

⁵ Tavraasii tiŋilġaiganikapta ikaaqługu taġiuq akianiittuaq Cilicia-m Pamphylia-vlu, tikiñŋarugut Myra-mun Lycia-miittuamun.

⁶ Tavrani aŋuyaktit atanauraŋat iḷitchuġiŋaruq umiaqpaŋmik qairuamik Alexandria-miñ aullaqsaġumaruamik Italy-mun, aasii ikipkaqłuta taavrumuŋa umiaqpaŋmun.

⁷ Tiŋilġaqsiŋarugut sukaiḷaamik anuqłiqpaił̣ł̣uni uvluni iñugiaktuani, arguġianniuqłuta tikiḷġiñaŋarugut akianun nunaaqqim Cnidus. Aasii anuġim sivunmuktuqtitchumiñaiñmatigut nalimun, tiŋilġaiŋarugut qamanġagun qikiqtam Crete, uivvaqługu nuvuġaq Salmone.

⁸ Siñiqsraqtuaqługu nunam siñaa siġġaġnaġaluaŋŋaan, tikiñŋarugut inimun atiqaqtuamun Qamannirviŋmik, qaniŋani iniqpak inmiruaq Lasea.

⁹ Taavrumani nunaaqqimi uvliuŋarugut iñugiaktuanik, navianaqsiḷġataqtillugu iglauniksraq ukiaqłuni Jew-guruat uvluq niġiḷairviat qaaŋianiŋavluni. Tavra Paul uqallautiŋagaluaġai inna,

¹⁰ Aŋutiit, iḷitchuġiruŋa aullaġupta uvaŋŋa navianaġniaqtuq iglauniqput, maqutauniaqtut usiavullu umiaqpaglu, iḷaanniḷu suksraunniksraqput.

¹¹ Tavra aŋuyaktit atanauraŋata kamagiłhaaŋagik umiaqpaum umialgatalu iñuatalu uqaluŋik, kamagigaluaġnagu Paul uqalua.

¹² Tavra qamannisimavik umiaqpaŋmun nayukkaŋat ukiiviksraġiiñŋaruq, iñugiagniqsrat ayaksaaġuŋarut taġiumun tavraŋŋa, tikiḷaiñmagaaqsaġukługu Phoenix piyumiñaġumiŋ. Taamna qamannisimavik Crete-miittuaq sanmiruaq uŋallavlu kanagnavlu tuŋaaŋnun, aasii tavrani ukiiḷutiŋ.

Qaggaġuqtuq Taġiuq

¹³ Tavra uŋallaaġuġman isumavlutiŋ sivunniurriŋ nalaunniaġasugalugu, kisaq nuqinŋagaat aasii tiŋilġaigaqsivḷutiŋ siñiqsraqługu Crete, siñiqsraurapiaġataqługu nunam siñaa.

¹⁴ Tavra akuniḷitchiaŋitchuq anuġiqpak nigiqłuk, anuqqałłaŋaruq qikiqtam tuŋaaniñ.

¹⁵ Tavra umiaqpak anuġiqpaum nalaunmagu arguġumiñaiñŋarugut sanmiḷugu anuġi, iḷatchiŋarugut tiksiqł̣uta.

¹⁶ Aasii iglauŋarugut qamanġagun qikiqtauram atiqaqtuam Cauda-mik. Tavra siġġaqivluta anayanaiyaŋagikput umiaqpaum umiuraŋa.

¹⁷ Ikuaniŋmarruŋ umiuraq, anniqsuġniḷuksaaqsiŋagaat payaŋaiyaqsaavlugu akłunaanik umiaqpak. Tavraasii anayasuliqł̣utiŋ ikkalġiññasugalutiŋ mauyaqiññamun siñaani Libya-m, tiŋilġautaiyaŋarut aasii tiksiaqsivḷuta.

¹⁸ Tavra anuġi suamaruaq anuqłiqsillugusuli, uvlutqiŋman siqqairraqsiŋarut umiaqpaum usiaŋiñik.

¹⁹ Uvluk piŋayuagniasii siqqarraqsiŋagaich saatqutiŋi umiaqpaum.

²⁰ Tavra uvluni iñugiaktuani tautulaiñŋagivut siqiñiġlu uvluġiallu, anuġi anuqłipiaġataqłuni. Kiisaimmaa iñuuyumiñaiġasukkiutivugut.

²¹ Tavra aŋutit sivisuruamik niġiḷaitkaluaġmata, Paul makinŋaruq sivuġaannun, aasii uqallautivlugich, Aŋutiit, kamagiyumiñaŋagaluaġivsiŋa aullaqusaaŋiññavsi Crete-miñ aasii siqqaiŋiḷḷuta iluqaiññik usiaptiŋnik.

²² Aasii paŋmapak ipiqtusuŋaiqugivsi, qanuq iḷaŋiġñiaŋitchusi atausiuramik-unnii, aglaan umiaqpaiyaġniaqtugut.

²³ Qanuq unnuapak makitaŋaruq saniqqamni isaġulga God-im ukpiġikkaġma, aŋaiyyuvigisuukkaġmalu,

²⁴ aasii uqallautivluŋa, Iqsiñak Paul, qanuq tikitchuksraurutin Rome-mun, aasii Caesar-m isivġiġḷutin. Aasii pisigivlutin, God-im iñuuliñiaġai iluqaisa umiaqpagaqatitin.

²⁵ Ipiqtusuŋaiġitchiasii, aŋutiit, qanuq ukpiġutiqaqtuŋa God-mun nalaupiaġataġniaqtilaaŋa kilgusiaġa.

²⁶ Aglaan tipiniaġaatigut qikiqtamun.

²⁷ Akimiaġuutaiḷaŋŋuġmata unnuat tiksiġñivut anuqłiuqłuta taġiumi Mediterranean-mi, unnuaq qitiqqaqpalliġman sivuqłich iḷimatchaŋarut qalliñasugalutiŋ nunamun.

²⁸ Tavra kiviuqsraŋarut aasii iḷitchuġivlutiŋ iñuiññaqtun isaŋniqtun ititilaaŋanik, ayuuqtaallaqqaaqłutiŋ kiviuqsravsaaŋarut aasii akimiaq isaŋniqtun ititilaanikłuni.

²⁹ Tavra anayatchakłutiŋ umiaqpakput apuġasugalugu uyaġagruanun, niŋinŋagaich sisamat kitchat aquagun, aasii uvluqsiigaqsivḷutiŋ.

³⁰ Tavra sivuqłich pigruġumavlutiŋ umiaqpaŋmiñ, niŋinŋagaat umiuraq immamun, kisaġniaŋŋuaqsaqłutiŋ umiaqpaum sivuagun.

³¹ Paul uqallautiŋagai aŋuyaktit atanauraŋat aŋuyaktillu, Ukua aŋutit umiaqpaŋmiinŋisuaqpata iñuulirauyumiñaitchusi.

³² Tavrani aŋuyaktit kivluŋagaich akłunaaŋi umiuram aasii saġvaqtiłługu.

³³ Tavra uvluq qausaaqsivalliġman, Paul niġiḷḷaqupiaŋagai umiaqpagaqtit uqallakłuni, Uvlupak akimiaġuutaiḷaŋŋuqtut uvlut, aasii iluqasi tainnatun sivisutigiruamik niġiuraŋaitchusi.

³⁴ Tavra niġiḷḷaqupiaġivsi, sayaniktaaġumausi iñuullasisaġlusi. Atausiuraq-unnii nusaqsi niaquvsiññi tammaġniaŋitchuq.

³⁵ Taamna uqallausiġianikamiuŋ, Paul-gum tiguŋagaa punniq, aasii quyyavigiqqaaqługu God takkuanni, avikługu niġirraqsiŋaruq.

³⁶ Tavrani iluqaġmiŋ qapiŋaisaaqtauŋarut aasii niġivḷutiktauq iliŋich.

³⁷ Iluqata katiłłuta iñugiaktilaaqput 276 umiaqpaum iñuŋi.

³⁸ Tavra niġisuiġataqamiŋ, uqigḷiḷiŋagaat umiaqpak igiłługich palauvaksrat taġiumun.

Umiaqpaiyaqtut

³⁹ Tavra uvluġman, umiaqpagaqtit iḷisaġiŋaitkaat nuna, aglaan nalunaigiŋagaat puviaq naqittuamik siñilik, sivunniutiŋagaat piñaġumiñaqpan umiaqpaŋmik apuġaksaaġvigisaġukługu.

⁴⁰ Tavra ilaisa kivluŋagaich kitchat akłunaaŋich qimakługich kitchat immamun. Aasiisuli tavrani aŋivraaqługich akłunaat qiḷiġutigikkaŋi aquutim. Aasii nuqiłługu sivulliq tiŋilġautaq apuġaksaaqsaŋarut nunamun.

⁴¹ Tavra nalaułługu ikkalġuq ikkalġisinŋagaat umiaqpak, sivua kaliviłłuni aulayyallaiŋaruq, aasii aqua siquminŋagaa ulivrigaqtuam taġium.

⁴² Aŋuyaktit sivunniŋarut tuquġaġukługich tigutaaqtapayaurat, iḷaanni nalliŋich puumillutiŋ annakkasugalugich.

⁴³ Tavra aŋuyaktit atanauraŋata annautiyumavlugu Paul, taŋŋiqsinŋaitkaa sivunniutaat. Ilaan piraksriŋagai iñupayaat puuvrallaruat nautkiaquvlugich umiaqpaŋmiñ aasii tulaksaquvlugich.

⁴⁴ Aasiiḷi iḷakutat ikiaqtatigun naagga umiaqpaviñiqtigun tulaquvlugich. Tavra iluqata annaŋarugut nunamun.