Acts 26 - Iñupiatun Mumiksat Uqalugiksuat

Paul Patchisaiññiruq Inmiñi Agrippa-mun

¹ Agrippa-m uqallautiŋagaa Paul, Uqaġumiñaqsipkaqtaurutin uqautigilutin iliŋnik. Tavra Paul isaaqługich argagni uqarraqsiŋaruq patchisaiññiġmigun inna.

² Umialiik Agrippa, Isummatigiruŋa uvamnik piḷḷuataġasugaluŋa sivuġaŋiutiyumiñaġniqama iliŋnun uvlupak, uqautigiyumiñaqługu patchisaisilaaġa iluqaisigun Jew-guruat pasikkutiŋisigun uvamnun.

³ Qanukkiataŋ iḷisimmaaġiksutin iluqaiññik Jew-guruat piḷġusiŋiññik uqaġlaqutigisuukkaŋiññiglu. Taamna pisigivlugu apiġigikpiñ naalaġnitquvlutin uvamnik qiñuiġḷutin.

⁴ Iluqaġmiŋ Jew-guruat iḷisimagaat qanuq iñuuniaġusiġa nutaġaunnamniñqaŋa. Iḷisimarut isuaniñqaŋa iñuuŋatilaamnik uvaŋa nanmiñiq nunamni Jerusalem-miḷu.

⁵ Uqaġutuaġumiŋ nalaullugu iḷisimakkaqtiŋ, iḷisimaŋammiut isuaniñqaŋa iḷautilaamnik kipuqłayunaitchuanun Pharisee-ñun piḷġusivsiŋñi.

⁶ Aasiuvva paŋmapak makitaruŋa uvani qanuqitilaaqtauvluŋa pisigivlugu aŋŋiñ niġiuqsruutaa God-im maŋŋuuptiŋnun.

⁷ Taavrumiŋa qulit malġuk maŋŋuuvut niġiuktuat kipiġniuqłutiŋ tikiutisukłutiŋ, aŋaiyyuuqłutiŋ God-mun unnuamiḷu uvlumiḷu. Taavrumuunaasiuvva Umialiik, Jew-guruat pasigaanŋa.

⁸ Suvlusiasiuvva ilivsi siġḷiġnaġivisiuŋ ukpiġniksraq God-mun aŋipkaġumiñaqtilaaŋat tuquŋaruat?

⁹ Uvamniḷiuvva isumapiaġataŋagaluaqtuaŋaa taimani qanusiġairuksraunasugaluŋa ukpiqtuanik Jesus-mun Nazareth-miumun.

¹⁰ Tainnaasii piŋaruŋa Jerusalem-mi. Aitchuusiaqaqłuŋa ataniġnaqunmik aŋaiyyuliqsiqpaŋniñ, God-im iñuŋi iñugiaktuat tigutaaŋagitka, suli tuqutauruksraġuġmata iḷaalliqsuutimmiraqtuŋa piyuaqłiqsuanun.

¹¹ Tatavsaġayuŋagitkalu iñugiaktuani Jew-guruat aŋaiyyuvipayauraŋiññi, piiḷaaġipkaġniaqługu ukpiġutaat, suli suammautivaił̣ł̣ugich aullaġaqtuŋa uŋasiksuanun iniqpaŋnun nagliksaaqtitchukługich.

Paul Quliaqtuaġigaa Isumalitqigñini

¹² Tainna piyaqtuqłuŋa, Damascus-mun aullaŋaruŋa ataniġnaqusiraqłuŋa piraksriusiaqaqłuŋalu aŋaiyyuliqsiqpaŋniñ.

¹³ Umialiik, uvluq qitiqqaġman tautuŋagiga iglaullapta qaumaniq qiḷaŋmiñ, qaummaġił̣haaġniqsuaq siqiñiġmiñ, qaummatittuaq avatimnun taapkunuŋalu iglauqatimnun.

¹⁴ Tavra iluqata ulġuanikapta nunamun, tusaaŋaruŋa nipimik uqaqtuamik uvamnun Jew-guruat uqausiatigun, Saul, Saul, summan nagliksaaqtitpiŋa? Nagliksautiksriuqsiññaqtutin iliŋnun akiḷḷiḷiqsuqamŋa qimuktitun tukkaqtuatun qimuguksaaġunmun.

¹⁵ Tavra uqallaŋaruŋa, Kiuvich ququularuatiin uvamnik? Aasii Ataniq uqallaŋaruq, Jesus-guruŋa nagliksaaqtitan.

¹⁶ Aasii makittin, niptaġvigiŋagikpiñ kivgaksraqtaaġisukłutin; quliaqtuaġutiniaġitin iñuich tautuŋaniḷuŋa uvlupak, suli quliaqtuaġutilugich sunik iḷitchuġipkaġumaakkamnik iliŋnun.

¹⁷ Qaunaginiaġikpiñ pisaġitquŋiḷḷutin Israel-guruanun, Jew-guŋitchuanullu, iliŋiññun tiliñiaġikpiñ.

¹⁸ Tavra iḷisautiniaġitin tusaayugaaġiksuanik mumikkumiñaqsiḷugich taaqtuamiñ qaummaġiksuamun, aŋalatinŋaiġḷutiŋ Satan-mun aglaan God-mun, ukpiliġḷutiŋ piḷuutitiŋ suliqutigiŋaiqsautqulugich, suli iḷaliutiyumiñaqsiḷutiŋ God-im iñuksraqtaaŋiñun.

Paul Quliaqtuaġigaa Savaani

¹⁹ Tavra Umialiik Agrippa, kamagiŋagiga qiḷaŋmiŋŋaqtauruaq qiñiqtuuraaġa.

²⁰ Aasii isagutiŋaruŋa Damascus-miñ Jerusalem-miḷḷu suli nunaaqqiñiñ iluqaani Judea-miittuani, akunġanniḷu Jew-guŋitchuat alġaqsruiŋaruŋa isumalitqiksuksraunivḷugich iñuich aasii mumigḷutiŋ God-mun, suli iñuuniaqtuksraunivḷugich iḷisimanaqsiḷugu allaŋŋuqtautilaaqtiŋ.

²¹ Taamna pisigivlugu Jew-guruat tigguġluŋagaanŋa aŋaiyyuvikpaŋmi aasii tuqunnialaaqsivḷuŋa.

²² Uvlupaŋmun-aglaan God-im ikayuŋagaaŋa, aasiuvva makitaruŋa uvani quliaqtuaġivlugu iḷisimakkaġa iḷumun ittuaq, iñupayaanun kamanaitchuallu kamanaqtuallu ativlugich. Uqautigikkaġa tainnatupiaġataq ittuq uqaqtiŋisa God-im Moses-lu uqautigikkaŋatitun piyumaaġnivḷugu,

²³ taamna Christ-guruaq nagliksaaqtuksraunivḷugu, suli sivulliuluni aŋiruaniñ tuqqunmiñ, iḷitchuġipkaġlugulu annaun iluqaiññun Jew-guruanun Jew-guŋitchuanullu.

²⁴ Tavra Paul uqaġniaqtillugu patchisairrunmigun, Festus-gum nipatusivḷuni uqallautiŋagaa, Paul kinnaġuqtutin uvva, iḷitchivaiñŋavlutin kinnaġuutigiaqsigiñ.

²⁵ Paul-gum kiuŋagaa, Kinnaġuŋitchuŋa, kamanaqtuatiin Festus, uvvaaglaan uqautiqaqtuŋa isumalaaġutiksraupiaqtuamik iḷumun ittuamiglu.

²⁶ Umialiik Agrippa, uqautiyumiñaġikpiñ taluqsrautaiḷḷuŋa qanuq iḷisimagitin tamatkua iluqaisa. Nalupqisuŋitchuŋa iḷisimammiutin iluqaiññik, qanuq taamna piŋaitchuq nalunautchiaġilugu.

²⁷ Umialiik Agrippa, ukpiġivigich God-im uqaqtiŋi? Iḷisimaruŋa ukpiġigitin.

²⁸ Tavra Agrippa uqallaŋaruq Paul-mun, Akkupauraq Christ-miuġuqtitchukłuŋa isumavich?

²⁹ Tavrali Paul-gum kiuŋagaa, Sivikitkaluaqpan naagga sivisunaaġaluaqpan, aŋaiyyutigigaluaġiga God-mun iliviḷḷu iluqaġmiglu naalaġniruat uvamnik uvlupak ukpiliqugaluaqługich uvaptun, tigutaaqtauŋisiññaġlusi uvaptun.

³⁰ Tavrani umialik kavanauruaġlu Bernice-lu iluqaġmiglu allat iñuich makinŋarut,

³¹ aasii anianikamiŋ uqaurrutiŋarut avanmun, Iñuk iŋña piŋitchuq sumik tuqurrutauyumiñaqtuamik naaggaunnii tigutaaqsimmatiksramik.

³² Tavra Agrippa uqallaŋaruq Festus-mun, Taamamna iñuk tigutaaqtauŋaiqsiññaġayaqtuq apiqsriŋaitpan Caesar-mugugluni.