Acts 24 - Iñupiatun Mumiksat Uqalugiksuat

Paul Pasigaat Jew-guruat

¹ Tavra tallimat uvlut pianiŋmata aŋaiyyuliqsiqpaich qaukłiat Ananias tikiñŋaruq Caesarea-mun, umialiŋnallu iḷaŋich, pitquraliqirilu atiqaqtuaq Tertullus-mik. Iliŋisa uqautigiŋagaat kavanamun pasikkurriŋ Paul-mun.

² Tavra Tertullus qaitquraukami, uqautigirraqsiŋagaa Paul uqaqłuni, Kamanaqtuatiin Felix, isumatuvlutin aullarriñiqpich sivisuruamik aŋuyautairrutiqaqtinŋagaatigut, iñugiaktuatigullu iłuaqsruutitigun savautiŋagiptigut anniqsuutauruanik nunauniptiŋnun.

³ Taamna quyyatigigikput sumiḷiqaa ataramik, aasii quyanaapiaġataġiptigiñ.

⁴ Piviksran atuqpaitchuŋitkiga aasii apiġipiaġikpiñ, qiñuiḷḷutin naalaġniḷḷaquvlutin uqaluksraptiŋnik.

⁵ Una iñuk iḷitchuġigikput iññuqłuuvlugu, ilaan aullaqisuugai tuavaallatit Jew-guruani nunami iluqaani, aullarrauvluniḷu Nazarene-guruanun.

⁶ Ilaan suli Jew-guŋitchuat itqutiniataŋagai aŋaiyyuvikpaŋmun, salumaiḷḷisauyumiñaqtuat. Aasii tigutaaŋagikput, isivġiġuqługu pitquraptigun.

⁷ Aasii qaukłiata aŋuyaktit Lysias-gum upaktuŋagaatigut, aasii piaqłuktaqłuta aullautiŋagaa uvaptiŋniñ.

⁸ Aasii Lysias piraksriŋaruq Paul pasiriŋi iliŋnun uqaġiaquvlugich. Qanuqitilaaġlugu iliŋnik iḷitchuġiyumiñaġniaqtutin ilaaniñ supayaatigun pasikkutiptiŋnik ilaanun.

⁹ Tavra Jew-guruattauq iḷaŋammigaat pasikkutaat uqaqłutiŋ iḷumun innipiaġataqługich pasikkutiŋich.

Paul Patchisaiññiruq Sivuġaani Felix-gum

¹⁰ Tavrali kavanam urriqavigimmani Paul uqaquvluni, Paul uqallaŋaruq, Iḷisimaruŋa atanġuŋarutin ukunuŋa nunauruanun ukiuni iñugiaktuani. Quviasupiaġataqtuŋa uqautigigupku patchisaisilaaġa sivuġaġni.

¹¹ Iḷitchuġiniaqtutin iliŋnik qulit malġuk uvlut sipinŋaitchut aŋaiyyuyaqtuaqama Jerusalem-mi.

¹² Jew-guruat iḷitchuġiŋaitkaluaġaanŋa qapiqtaiḷiqatiqaqtilluŋa iñuŋmik aŋaiyyuvikpaŋmi, naaggaunnii iḷitchuġiŋaitkaanŋa piallaktitchiñiaġluŋa iñuŋnik aŋaiyyuviŋiññi, naaggaunnii Jerusalem-mi.

¹³ Naaggaunnii ukpiġnaqsiḷiġumiñaitkaat iliŋnun paŋmapak pasikkutigikkaqtiŋ uvamnun.

¹⁴ Uvvaaglaan una piiḷaaġiyumiñaitkiga iliŋnun. Ukpiġigiga God-iŋat maŋŋuupta, tuvraqługu nutauruakun ukpiġniq iḷumun ittuaġiŋisaŋat ukua iñuich. Ukpiġimmigitka suli iluqaisa aglausimaruat pitqurani qaisauruani Moses-kun, makpiġaaŋiññiḷu Uqaqtiŋisa God-im.

¹⁵ Niġiugimmigiga ukunatuttauq iñuktun God-mun iñupayaat aŋipkaġniaġnivḷugich tuqqunmiñ, nakuuruallu nakuuŋitchuallu.

¹⁶ Tavraasii iñuuniḷuktuŋa pisuqtilaaptun patchisaiññiaqłuŋa God-mun iñuŋnullu.

¹⁷ Piitqaaqłuŋa ukiuni iñugiaktuani Jerusalem-miñ, utiŋaruŋa saagaqługich maniich aitchuutit uvagut iñuptiŋnun, aitchuiyaqtuqłuŋalu ikipkautinik.

¹⁸ Taamna savaaġipkaqtillugu, paqinŋagaanŋa aŋaiyyuvikpaŋmi, naatchianikłuŋa salummaqtauganikłuŋa pitqurat uqaluatigun. Iñuŋnik iñugiaktuanik piqatiqaŋaitchuŋa pialaŋaitchugullu.

¹⁹ Aglaan iḷaŋich Jew-guruat qairuat nunaaqqiŋiñiñ Asia-m tavraniinŋarut. Taipkua iliŋich qairuksraugaluaqtut sivuġaġnun aasii sunik pasikkutiksraqaġumiŋ uvapkun uqautilutin.

²⁰ Naaggaunnii ukua iñuich uqaġlich sunik killukuaġutinik iḷitchuġikkamiŋnik uvapkun makitakama uqaqsitaaġviŋmi.

²¹ Aglaan uvvauna atausiq pisigivlugu nivliutigiŋagiga nipatusivḷuŋa makitakama sivuġaanni. Isivġiġivsiŋa uvlupak pisigivlugu ukpiġniġa tuquŋaruat aŋipkaġniaġnivḷugich.

²² Tavra Felix iḷisimmaġikł̣uni ukpiqtuaguruat piḷġusiŋiññik, aġiupkaŋagai kasimaruat uqallakłuni, Lysias qaukłiat aŋuyaktit qaikpan sivunniġñiaġiga uqavaaġutiksi.

²³ Tavra piraksriiŋaruq atanauraŋiññik aŋuyaktit Paul qaunaksriqaquvlugu aglaan tigutaaqsimavaiñŋaiġḷugu, avilaitqatiŋiññullu ullallaayumiñaqsiḷugu ikayuġiaqsaqparruŋ.

Paul Qaġġisigaat Felix-mun Drusilla-mullu

²⁴ Uvlut qavsich pianiŋmata Felix qaiŋaruq nulianiḷu Drusilla, Jew-guruaq aġnaq. Ilaan qaitquŋagaa Paul aasii naalaaqsivḷugu uqautiqaġman qanuġlutiŋ iñuich ukpiliġumiñaqtilaaŋannik Christ Jesus-mun.

²⁵ Tavra Paul uqaaġataviksillugu iñuich nalaunŋaruakun iñuuruksrautilaaŋannik, qaaŋiulaaŋairrutikullu iñuuniaġniġmik, tikitchumaaqtuakullu isivġiġviksrautikun, Felix sivuuġatchaŋaruq aasii uqallakłuni, Piiḷḷagiñ uvaŋŋa. Piviksranikkuma qaitquvsaaġniaġikpiŋ.

²⁶ Tavranivsauq Felix maniḷitquyumaŋagaluaqtuq Paul-mun. Tavra taamna pisigivlugu qaitquraġigaa akulaitchuamik suli uqaluqatigivlugu.

²⁷ Tavra ukiuk malġuk naanmaŋnik, Felix kavanauruaq simmausiŋagaa Porcius Festus-gum, aasii Felix-gum iviġallagumavlugich Jew-guruat, qimaŋagaa Paul tigutaaqtauvlugu.