Acts 23 - Iñupiatun Mumiksat Uqalugiksuat

¹ Tavra takunnaqługich uqaqsitaaqtitchirit Paul uqallaŋaruq, Aniqatiit, uvlupaŋmun-aglaan isumamni piitchuŋa naġġutchaunmik iluqaagun iñuuniaġnipkun sivuġaani God-im.

² Tavra aŋaiyyuliqsiqpaich qaukłiata Ananias-gum piraksriŋagai tamatkua makitaruat saniġaani patiquvlugu Paul qanġagun.

³ Tavra Paul-gum uqallautiŋagaa, Isivġiqsauŋŋuaqtuatiin, God-im nalupqinaitchuq tatavsaġniaġaatin. Aquppirutin isivġiġukłuŋa pitquratigun, aasiiñ ilivich kipuqłakługich pitqurat piraksriirutin patiquvluŋa.

⁴ Tamatkua makitaruat saniġaani uqallaŋarut Paul-mun, Uqamaqłuutigiñ aŋaiyyuliqsiqpaich qaukłiat, God-im kivgaŋa.

⁵ Tavra Paul kiuŋagai, Aniqatiit, naluruŋa aŋaiyyuliqsiqpaŋnun qaukłiġitilaaŋanik. Qanuq aglausimaruq Bible-ni inna, “Uqautiginiaŋitkiñ pigiiḷiḷugu atanauraŋat iñukpich.”

⁶ Tavra Paul iḷitchuġikami kasimaruat alġaiŋich Sadducee-guniġmata, aasii alġaiŋich Pharisee-guvlutiŋ, uqallaŋaruq nipatusivḷuni uqaqsitaaqtitchiriñun, Aniqatiit, uvaŋa Pharisee-guruŋa, iġñiŋa Pharisee-m. Isivġiġaanŋa uvani pisigivlugu niġiugikapkich tuquŋaruat aŋiñiaġnivḷugich.

⁷ Tavra taamna uqallausiġipqauraġmagu, Pharisee-ḷḷu Sadducee-ḷḷu qanaarraqsiŋarut, aasii kasimaruat atiŋaiŋarut.

⁸ Qanuq Sadducees uqaġuurut iñuich aŋiniaŋiññivḷugich tuqqunmiñ, isaġulgiññivḷugulu ilitqusiiññivḷugulu, aglaalli Pharisees iluqaisa ukpiġivlugich innivḷugich.

⁹ Tavra kasimaruat nipatusisaiññaŋarut, aasii iḷaŋich iḷisaurrit pitquranik iḷauruat Pharisee-ñun makinŋarut, aasii qapiqtaiḷiqpakłutiŋ uqaqłutiŋ, Iḷitchuġiŋitchugut suuramik-unnii piḷuktuamik uumani iñuŋmi. Iḷaanniḷuunnii ilitqutchim naagga isaġulgum uqautipiaŋagaa.

¹⁰ Tavra uqavaaqtuat suammaŋmata, qaukłiat aŋuyaktit anayatchaŋaruq Paul siquvrataġinasugalugu iliŋiññun. Tavraasii piraksriŋagai aŋuyaktini atqaquvlugich kasimaruanun aullautitquvlugu Paul, aasii itqutilugu aŋuyaktit igluŋiññun.

¹¹ Taavrumani unnuami Ataniq makinŋaruq saniġaanun Paul aasii uqallautivlugu, Qapiŋanak. Quliaqtuaġimmatuttauq Jerusalem-mi, quliaqtuaġiraksraġiniaġmigiŋma Rome-mi.

Sivunniuġun Tuqutchukługu Paul

¹² Uvlaaġmagu Jew-guruat kasimavlutiŋ sivunniuŋarut unniqsuqłiipiaġataqłutiŋ niġiyumiñaiññivḷutiŋ imiġuraġumiñaiññivḷutiglu tuqutqaaŋaunnagu Paul.

¹³ Sippaqaŋaruq malġukipiaq iñuich sivunniuqatigiiksuat taavrumiŋa.

¹⁴ Tavra iliŋich ullautiŋarut aŋaiyyuliqsiqpaŋnun umialiŋnanullu, aasii uqallakłutiŋ, Pisaġisapiaġataqługu unniqsuqłiipiaġataŋarugut uvaptiŋnik niġiyumiñaiqł̣uta suuramik-unnii tuqunŋaunnagu Paul.

¹⁵ Ilivsiasii piqasiġḷusi uqaqsitaaqtitchiriñik, kilikkumagiksi Rome-miut aŋuyaktiŋisa qaukłiat qaġġisitqulugu Paul ilivsiññun, sivunnimmaġiksaaġugniḷugu pimaqłuutaa. Uvagut itqanaiññiaqtugut tuqutchuglugu tavruŋa tikiñŋaiñŋaan.

¹⁶ Tavra Paul-gum uyuġua tusaaŋaruq sivunniuġutaannik, aasii isiqłuni aŋuyaktit igluannun kiliŋagaa Paul.

¹⁷ Tavra Paul ququaŋagaa iḷaŋat aŋuyaktit atanauraŋisa aasii uqallautivlugu, Una nukatpiaq aŋuyaktit qaukłiannuuttuuŋ. Samma uqallautiksraqaqtuq ilaanun.

¹⁸ Tavra aŋuyaktit atanauraŋata qaġġisiŋagaa qaukłiannun aŋuyaktit aasii uqallakłuni, Paul-gum tigutaaqtam ququakkaŋanii aasii apiġivluŋa qaġġisitquvlugu una nukatpiaq iliŋnun. Samma uqallautiksraqaqtuq sumik iliŋnun.

¹⁹ Aŋuyaktit qaukłiata tasirriutivlugu asivaqtaaġutiŋagaa, aasii apiġivlugu iñuił̣aami, Sumik uqallautisuktaġma?

²⁰ Tavra nukatpiam uqallautiŋagaa, Jew-guruat sivunniŋarut apiġisukłutin qaġġisitqulugu Paul uqaqsitaaqtitchiriñun uvlaakun, apiqsruqtuġumaŋŋuaġlugu pasiummaġiksaaġlugu.

²¹ Aglaan aŋiġnagich, qanuq malġukipiaq iñuich sippalik iriqsimaniaqtut utaqqiḷugu Paul. Taapkua unniqsuqłiipiaġataŋarut niġiyumiñaiññivḷutiŋ imiġumiñaiññivḷutiglu tuqutqaaŋaunnagu Paul, aasii paŋmapak itqanaitchut taamna pisukługu, utaqqirullu sivunniutiksraġnik.

²² Tavra aŋuyaktit qaukłiata anipkaŋagaa nukatpiaq piraksriqł̣ugu, Uqallautinagu kiñapayaaq kiliŋniḷuŋa taavrumiŋa.

Paul Aullaqtitkaat Felix-mun Kavanauruamun

²³ Tavra aŋuyaktit qaukłiata qaitquŋagik malġuk aŋuyaktit atanauraŋik, aasii uqallautivlugik, Itqanaiyaġitchik 200-mik aŋuyaktinik aullaqtuksranik Caesarea-mun, piqasiġḷugich 70 tuttuqpaŋni kakaksiqsuanik, 200-niglu panaliraqtuanik, aasii itqanaitchumausi aullaġumiñaqsiḷusi nainukłaaqpan unnuapak.

²⁴ Suli kakaksiġviqaqtitchumagiksi Paul, aasii tikiutilugu sugaluaġnagu Felix-mun kavanauruamun.

²⁵ Tavra aŋuyaktit qaukłiat tuyuksriuŋaruq inna ittuanik.

²⁶ Claudias Lysias, Kamanaqtuamun kavanamun Felix-mun, paġlan.

²⁷ Unauvva iñuk Jew-guruat tigguġluŋakkaŋat tuqutchaqługu. Ullaŋagitka aŋuyaktiliraqłuŋa aasii annautivlugu, iḷitchuġivlugu Rome-miunun iḷautilaaŋa.

²⁸ Aasii kipiġniuġutigivlugu iḷitchuġisukługu pasikkutaat uqautikkusiaŋa, qaġġisiŋagiga uqaqsitaaġviannun.

²⁹ Iḷitchuġiŋaruŋa sumik piŋaisilaaŋanik tuqqutauyumiñaqtuamik naaggaunnii tigutaaġutauyumiñaqtuamik. Pasiŋagaat apiqqutitigun pitquramiŋniittuatigun.

³⁰ Tavra kiliŋmanŋa Jew-guruanun sivunniuġutinivḷugu piyumigivlugu, aullaqtitchuliŋagiga iliŋnun tavrauvvaa. Uqallautiŋagitka pasiriŋi uqautigitquvlugu Paul sivuġaġni.

³¹ Tavra aŋuyaktit kamagiŋagaat piraksriusiaqtiŋ. Aullautiŋagaat Paul unnuakun, aasii tikiutivlugu Antipatris-mun.

³² Aasii uvlaakumman pisuaqtuat aŋuyaktit utiŋarut iglumiŋnun, qimakługich kakaksiraqtit tuttuqpaŋnik igliqatigitquvlugich Paul-mun.

³³ Taapkua aŋuyaktit Caesarea-muutiŋagaat Paul, aasii qaił̣ł̣ugich tuyuutit Paul-lu kavanamun.

³⁴ Kavanam taiguaganikamigich tuyuutit, Paul apiġiŋagaa kisumun nunamun maŋŋuqaqtilaaŋanik. Iḷitchuġikamiuŋ Cilicia-miñ pisilaaŋanik,

³⁵ Paul uqallautiŋagaa, Naalaktuaġniaġikpiñ uqautigiritin tikitpata. Aasii piraksriiŋaruq Paul munaqsriqaquvlugu Herod-gum igluqpaŋani.