Acts 22 - Iñupiatun Mumiksat Uqalugiksuat

¹ Aniqatiit aapauruallu, naalaġnisiŋa patchisaiññiaġnipkun sivuqqavsiññi.

² Tavra tusaakamirruŋ uqallautimmatiŋ Hebrew-tun uqaqłuni, nipaimmaġiksaaŋarut. Aasii Paul uqallaŋaruq.

³ Uvaŋa Jew-guruŋa, aniŋaruŋa Tarsus-mi Cilicia-miittuami, aglaan iñuguqłuŋa uvani Jerusalem-mi, iḷisaurriqaqłuŋa Gamaliel-mik. Iḷisaurrusiaqaqłuŋa tuvraipiaġatallaŋnikun pitquraŋiññik maŋŋuupta, suli kipiġniupiaġataqłuŋaptauq ilivsisun iviġagukługu God.

⁴ Sivuani nagliksaaqtitchuuŋagitka iñuich tuqunniallavlugich ukpiqtuat Jesus-mun, tigutaaqługich aŋutillu aġnallu tigutaaġviŋmun.

⁵ Aŋaiyyuliqsiqpaich qaukłiat iluqaġmiglu uqaqsitaaqtitchirit arguanaiġumiñaġaat iḷumun uqaqtilaaġa. Iliŋiññiñ aitchuusiaqaŋaruŋa tuyuutinik aniqatinun Jew-guruanun Damascus-miittuanun. Aasii iglauŋaruŋa tigutaaġiaqługich Jesus-mun ukpiqtuat, qiḷiqsruiḷugich Jerusalem-muutisukługich tatavsaqtautqulugich.

Paul Quliaqtuaġigaa Isumalitqigñini

⁶ Iglaullaġma qallimmiuŋalu Damascus-mun, uvluq qitiqqaqpalliġmiuġlu qaumaniqpak qiḷaŋmiñ tavraŋŋatchiaq qaummaġiksinŋaruq avatimnun.

⁷ Tavra ulġuŋaruŋa nunamun aasii tusaavluŋa nipimik uqallaktuamik uvamnun, Saul, Saul, summan nagliksaaqtitpiŋa?

⁸ Aasii kiuŋagiga, Kiuvich ququularuatiin uvamnik? Ilaalli kiuŋagaaŋa, Jesus-guruŋa Nazareth-miu nagliksaaqtitaġma.

⁹ Tamatkuali tuvaaqatigikkaġma tautuŋagaluaġaat qaummaq aglaan tusaaŋaitkaat nipaa uqaqtuam uvamnun.

¹⁰ Tavra apiġiŋagiga, Suniaqpik uvaŋa Ataniiq? Tavra Atanġum uqallautiŋagaaŋa, Makillutin, Damascus-mugiñ. Taamani uqallautiniaġaatin supayaanik God-im piraksriutiŋiñik iliŋnun.

¹¹ Tavra tautuksiḷḷaiġñiqama qaummaġikpaił̣ł̣uni taimña qaumaniq, tasirriutiŋagaanŋa iglauqatiŋma aullativluŋa Damascus-mun.

¹² Tavraniinŋaruq iñuk atiqaqtuaq Ananias, god-tiliqiruaq kamagivlugich pitquravut isumakkusiaqaġluataqłuniḷu iluqaiññiñ Jew-guruaniñ iñuuruaniñ Damascus-mi.

¹³ Ullautiŋaruq uvamnun, aasii makiłłuni saniqqamnun uqallautiŋagaaŋa, Aniqaan Saul, tautullasiiñ. Tavra tavrauvvaa tautullasiŋaruŋa aasii qiviaqługu.

¹⁴ Tavra ilaan uqallautiŋagaaŋa, God-iŋata maŋŋuupta piksraqtaaġiŋagaatin iḷitchuġitquvlutin pisuunmiñik, tautuquvlugu piḷuutaitchuaq Kivgani, suli tusaatquvlugu ilaan nipaa.

¹⁵ Aasii taamna tautuŋakkan tusaaŋakkallu uqautimmatin, quliaqtuaġiniaġiñ iñupayaanun.

¹⁶ Aasiuvva paŋmapak summan utaqqivich? Makillutin paptaiqsaugiñ, aasii piḷuutitin piiqsillugich, aŋaiyyutikun ikayuqtaiḷiqilutin ilaanun.

Paul Alġaqsruitqurauruq Jew-guŋitchuanun

¹⁷ Utianikama Jerusalem-mun aŋaiyyuniallaġma aŋaiyyuvikpaŋmi, qiñiqtuuraaŋaruŋa,

¹⁸ aasii tautukługu Ataniq uqallaktuaq uvamnun, Qilamiqsruġlutin aullaġasuaġiñ Jerusalem-miñ, qanuq iñuich uvani ukpiġiniaŋitkaat quliaqtuan uvapkun.

¹⁹ Aasii kiuŋagiga, Ataniiq, iliŋich iḷisimalluataqtut aŋaiyyuvipayaani tigutaaqsisuutilaamnik anaumikł̣ugiḷḷu tamatkua ukpiqtuat iliŋnun.

²⁰ Suli Stephen alġaqsruirin tuqutaumman makitaŋammiuŋa tavrani, iviġaumagivlugu tuqutauniŋa, qaunagivlugiḷḷu annuġaaŋich taapkua iñuaqtuat ilaanik.

²¹ Tavra Atanġum uqallautiŋagaaŋa, Aullaġiñ, qanuq tiliñiaġikpiñ uŋasiksuamun Jew-guŋitchuanun.

²² Taavrumuŋaaglaan uqallautaanun, iñusalaich Paul naalaġniŋagaat. Tavraasii niparraqsiŋarut nipatutilaamiktun, uqaqłutiŋ, Tuqulliuna innasiq iñuk. Qanuq iñuuruksrauŋitchuq.

²³ Tavra nipaalapkaqługich annuġaamiŋniglu takuyaġaqtillugich miḷḷuutigivlugulu nunam avyua siḷamun,

²⁴ Rome-miut aŋuyaktiŋisa atanauraŋata piraksriŋagai iñuŋni itqutitquvlugu Paul aŋuyaktit igluŋiññun, suli uqallautivlugich ipiġaqtuġlugu iḷitchuġisaquvlugich sumik Jew-guruat saqłautiqaqtilaaŋannik ilaagun.

²⁵ Tavra qiḷiqsruiganiŋmanni akłunaanik ipiġaqtuġukługu, Paul-gum uqallautiŋagaa aŋuyaktit atanauraŋat makitaruaq tavrani, Pitqurani nalaunŋava ipiġaqtuġuvsiuŋ iñuk Rome-miunun iḷauruaq, isivġiqsauŋaiñŋaan?

²⁶ Aŋuyaktit atanauraŋata taamna tusaakamiuŋ, ullautiŋaruq qaukłiannun aŋuyaktit aasii uqallautivlugu, Susaġumaagaqsivich? Taamna iñuk Rome-miunun iḷauruq.

²⁷ Qaukłiata ullakługu Paul apiġiŋagaa, Uqallautiŋŋa, Rome-miunun iḷauvich? Paul kiuŋagaa, Aaŋ.

²⁸ Aŋuyaktit qaukłiat uqallaŋaruq, Tauqsiŋagiga taamna iḷaliutinik manisalaŋnik. Paul uqallaŋaruq, Aglaan uvaŋa aniŋaruŋa nutim iḷauvluŋa.

²⁹ Tavra tamatkua apiqsruqtuiyumaruat Paul-mik niguutiŋarut ilaaniñ tavrauvvaa, taamnalu aŋuyaktit qaukłiat iqsitchaŋammiuq iḷitchuġivluni Paul Rome-miunun iḷautilaaŋanik ilaallu qiḷiqsruiñiqamiuŋ.

Paul Qaġġisigaat Uqaqsitaaqtitchiriñun

³⁰ Tavra uvlaakumman aŋuyaktit qaukłiat kipiġniuqłuni iḷisimasukługu nalupqinaiġḷugu sumik Jew-guruanun pasisilaaŋanik Paul. Qiḷiġutaiŋagaa Paul, aasii piraksriqł̣ugich aŋaiyyuliqsiqpaich iluqaisalu uqaqsitaaqtitchirit katitquvlugich. Tavra ilaan qaġġisiŋagaa Paul ilaiññun aasii inillakługu sivuġaannun.