Acts 21 - Iñupiatun Mumiksat Uqalugiksuat

Paul Jerusalem-muktuq

¹ Tavra avinnapta iliŋiññiñ tiŋilġaqsiqł̣uta sivunmun ikaaŋarugut Cos-mun, aasii uvlutqiŋman tikił̣ł̣uta Rhodes-mun, aasii taavaŋŋa aullalgiññapta tikił̣ł̣uta Patara-mun.

² Taavrumani inimi iḷitchuġiŋarugut umiaqpaŋmik ikaaġniaqtuamik Phoenicia-mun. Tavraasii ikiŋarugut aullaqsaqłuta.

³ Qiñiġnaqsikaptigu qikiqtaq Cyprus, uŋalaŋata tuŋaagun igliŋarugut Syria-mun. Tulaŋarugut Tyre-mi, umiaqpak niuriñiaqłuni usiamiñik.

⁴ Aasii paqiłługich iḷaŋich ukpiqtuat tavraniittuat, nayuŋagivut tallimat malġuŋni uvluni. Ilitqusiġiksuam uqallaguliqsinŋagai ukpiqtuat Paul Jerusalem-muquŋił̣ł̣ugu.

⁵ Tavra uvliuġniksravut tavrani naanmata, aullaŋarugut iglausaqłuta. Iluqaġmiŋ ukpiqtuat piqatigivlugich nuliatiglu miqłiqtutiglu, qaniŋagaatigut siḷataanun iniqpaum. Tavrani sitquqłuta taġium siñaanun aŋaiyyuŋarugut suli kutpaiġutisuiqsaaqłuta avanmun.

⁶ Tavrali uvagut ikiŋarugut umiaqpaŋmun, aasiiḷi iliŋich aisaqłutiŋ.

⁷ Aullaqapta tiŋinnaaqłuta Tyre-miñ, tikiñŋarugut Ptolemais-mun. Tavrani paġlaŋagivut aniqatit nayuqługich uvlivḷuta atautchimik.

⁸ Uvlaakumman aullaŋarugut aasii tikił̣ł̣uta Caesarea-mun. Tavrani isiŋarugut igluanun Philip isumalitqiksitchiñiaqtim, aasii tukkuġivlugu. Ilaa iḷagiŋagaat tallimat malġuk aŋutit tiikaksraqtaaguŋaruat Jerusalem-mi.

⁹ Aasii Philip sisamanik paniqaġniqsuaq uiñiŋaitchuanik, uqaqtauruanik God-mun.

¹⁰ Uvliuqtilluta uqaqtauruaq God-mun atiqaqtuaq Agabus-mik tikiñŋaruq Judea-miñ.

¹¹ Ullakamisigut ilaan tiguŋagaa Paul tavsia aasii qiḷiqsruqługich ilaan isigaŋni argaŋniḷu, uqaqłuni, Inna uqaqtuq Ilitqusiġiksuaq, Tainnatun Jew-guruat Jerusalem-mi qiḷiqsruiñiaġaat iñuk tavsiqaqtuaq mattumiŋa aasii aitchuutigilugu Jew-guŋitchuanun.

¹² Taamna tusaakaptigu, uvagullu iñuiḷḷu araŋagaluaġikput Paul Jerusalem-muquŋił̣ł̣ugu.

¹³ Paul kiuŋagaatigut, Suvisiuvva qiavisi isumaalluksaaqpisiŋa? Qanuq uvva itqanaitchuŋa tigutaaqtauyumiñaqłuŋa Jerusalem-mi tuqutaullatuaġumalu pisigilugu Ataniq Jesus.

¹⁴ Tavra payariyumiñaiññiqaptigu Paul, aġiuŋarugut aasii uqallakłuta, Pisuutaa Atanġum nalaulli.

¹⁵ Taapkua uvlut aquatigun itqanaiyarraqsiŋarugut aasii Jerusalem-muksaqłuta.

¹⁶ Tavra iḷaŋisa ukpiqtuat qaiŋaruat Caesarea-miñ maliŋagaatigut, aasii aggisivluta tukkuksraptiŋnun igluanun Mnason Cyprus-mium, ukpiqtuaġuŋaruaq sivulliqsigun ukpiqtuatigun.

Paul-gum Tautugiaġaa James

¹⁷ Tikiññapta Jerusalem-mun, aniqatit paġlapiaġataŋagaatigut.

¹⁸ Uvlaakumman Paul piqasiŋagaatigut tautugiaqługu James, aasii umialiŋnat iluqaġmiŋ tavraniinŋarut.

¹⁹ Paul paġlaqqaaqługich quliaqtuaġutiŋagai iluqapayauraŋiññik savaamigun God-im piŋaraŋiñik akunġanni Jew-guŋitchuat.

²⁰ Naalaktuaganikamirruŋ Paul, iluqaġmiŋ God nanġaŋagaat. Aasii Paul uqallautiŋagaat, Aniqaan, iḷisimarutin iñugiapiaġataqtut Jew-guruat ukpiliŋaruat, iliŋisa siġmaaġutigigaich pitqurat.

²¹ Aasii iliŋich kiliktuusiaqaŋarut ilipkun iḷisaurriñivḷutin iluqaiññik Jew-guruanik akunġanni iñuuruanik Jew-guŋitchuat nunaŋiññi suksraaquvlugich pitqurat qaisauruat Moses-kun, uqautinivḷugich nalunaiñŋutchiquŋił̣ł̣ugich miqłiqtuŋich timiŋisigun, kamagiŋaiġḷugiḷḷu Jew-guruat piḷġusiŋich.

²² Nalupqinaitchuamik tusaaniaqtut qaisiḷaaġnik. Aasii qanuġniaqpisa?

²³ Piiñ uqaluptigun iliŋnun. Sisamat imma maani aŋutit unniqsuqłiiŋaruat God-mun.

²⁴ Piqasiuttuiñ taipkunuŋa aŋutinun, salummaqsaġlutin Jew-guruat piḷġusiatiktun pitquramikkun aasii akiḷiutilugich, niaqqutiŋ saliyumiñaqsiyumagaich. Tainnaġuvsi, iluqaġmiŋ iñuich iḷitchuġiniaqtut taŋiġisilaaŋanik kiliktuusiaqtiŋ ilipkun, aglaan ilivitchauq iñuuniñiaġaatin kamagivlugich pitqurat qaisauruat Moses-kun.

²⁵ Aglaan apiġiŋitkivut Jew-guŋitchuat ukpiqtuaġuŋaruat kamagitquvlugich Jew-guruat piḷġusiŋich. Qanuq tuyuaniŋagivut niġitquŋił̣ł̣ugich niqinik ilaaguaqtauruanik iñuuraqpaŋnun, auktuquŋił̣ł̣ugiḷḷu, niġitquŋił̣ł̣ugiḷḷu niġrutinik auŋich maqinŋaitchuanik, allatuquŋił̣ł̣ugiḷḷu.

²⁶ Tavra Paul piŋagai taipkua aŋutit, aasii uvlaakumman salummaksaqłuni pitquratigun piqatigivlugich. Aasii ilaa isiŋaruq aŋaiyyuvikpaŋmun uqallautiyaqtuqługu aŋaiyyuliqsiqpak qakuguaglaan salummaqsaġniqtiŋ naanniaqtilaaŋanik, aasii naatpan, atausiullaalutiŋ iluqatiŋ aitchuisaġlutiŋ ikipkautinik.

²⁷ Tallimat malġuk uvlut naatkaqsimmiullu, iḷaŋich Jews qaiŋaruat nunaaqqiŋiñiñ Asia-m, tautuŋagaat Paul aŋaiyyuvikpaum iḷuani. Tavra ilaisa tuavaallaktinŋagaich iñusalaich, aasii tigguġlukługu Paul,

²⁸ nipaalavlutiŋ, Israel-guruasii, ikayuġitchi. Uvva una iñuk iḷisaurriruaq iñuŋnik sumiḷiqaa paaqłakługich Israel-guruat, pitqurallu qaisauruat Moses-kun unalu aŋaiyyuvikpak. Aasiuvva paŋmapak qaġġirrimmiuq iḷaŋiññik Jew-guŋitchuat itqutivlugich aŋaiyyuvikpaŋmun, aasii salumaiḷivḷugu una ini ilaaguaqtauŋaruaq God-mun.

²⁹ Taamna uqallausiġiŋagaat tautuŋavlugu Trophimus Ephesus-miu piqatigimmagu Paul-gum iniqpaŋmi, iḷimasukłutiŋ Paul-mun itqutiŋanasugalugu aŋaiyyuvikpaum iḷuanun.

³⁰ Tavra iluqaġmiŋ iniqpaum iñuŋi tuavaallaŋarut, aasii iñuich aqpałłutiŋ atautchikun tigguġluŋagaat Paul aasii kaliksraqługu annisiŋagaat aŋaiyyuvikpaŋmiñ. Tavrauvvaa aŋaiyyuvikpaum upkuaŋi umiktuŋagaich.

³¹ Tavra tuavaalaruat tuqunniaqsaaqsimmigaallu Paul, iḷitchuġipkaŋagaat atanauraŋat Rome-miut aŋuyaktiŋisa, iluqaġmiŋ Jerusalem iñuŋi tuavaallaŋnivḷugich.

³² Tavrauvvaa ilaan aullautiŋagai aŋuyaktit atanauraŋiḷḷu aasii upaktuqługich tuqługich iñusalaich. Tavra pialaruat iñuich, tautukamirruŋ atanauraŋat aŋuyaktit aŋuyaktiŋiḷu, Paul anaumiŋaiŋagaat.

³³ Tavra aŋuyaktit atanauraŋata ullakługu Paul, tigutaaŋagaa piraksriivḷuni qiḷiqsruitquvlugu malġuiñik kalimñanik. Tavra ilaan apiġiŋagai iñusalaich, Kiñauvvauna iñuk? Suniglu piŋava?

³⁴ Iñuich iḷaŋich kasimaruaniñ saqłaŋarut qanuġliqaa. Tuavaalavaił̣ł̣utiŋ atanauraŋat aŋuyaktit iḷitchuġillaiġutiŋaruq suna pipiaqtilaaŋanik. Tavraasii piraksriŋagai iñuŋni, tigulugu Paul aŋuyaktit igluannuutitquvlugu.

³⁵ Tikiññamiŋ igluqpaum tutipqiŋiñun, aŋuyaktit kivikataŋagaat unnii Paul iñuich piaqłuktaliqpaił̣ł̣utiŋ.

³⁶ Qanuq piaqłuktaliqsuat iñuich maliqataqługu saqłaŋarut, Tuqutauli.

Paul Patchisaiññiaqtuq Inmiñi

³⁷ Tavra Paul itqutisaġmanni aŋuyaktit igluŋiññun, uqallautiŋagaa aŋuyaktit atanauraŋat, Uqallautillakkumiñaqpigiñ. Ilaan apiġiŋagaa, Uqayuvich Greek-tun?

³⁸ Egypt-miuguŋitpich taimña qaŋaqqammiuraq piallaktitchiruaq akiḷḷiḷiqsuunmik, aullativlugich nunagluktuamun 4,000 iññuqłuich satkuliraqługich?

³⁹ Tavra Paul kiuŋagaa, Uvaŋa Jew-guruŋa aniŋaruŋa Tarsus-mi Cilicia-miittuami, iḷauvluŋa nuimaruamun iniqpaŋmun. Uqallakkumiñaqpik iñuŋnun?

⁴⁰ Aŋuyaktit atanauraŋata uqallakkumiñaqsiŋagaa. Tavra Paul makinŋaruq tunmiqqanun, aasii urriqavluni argaŋmiñik iñuŋnun. Iñuich nipaiġmata Paul uqallautiŋagai Hebrew-tun.