Acts 20 - Iñupiatun Mumiksat Uqalugiksuat

Macedonia-mun Greece-mullu

¹ Tuavaalaŋaiġmata, Paul katitquŋagai ukpiqtuat aasii qapiŋaisaaqqaaqługich, qimaŋagai Macedonia-muksaqłuni.

² Iglauganikami tamatkunuuna nunaaqqisigun, qapiŋaisaaqługich ukpiqtuat, tikiñŋaruq Greece-mun.

³ Tavraniinŋaruq tatqiñi piŋasuni, aasii iḷitchuġikami Jew-guruat sivunniuġniġmata inmigun piyumigivluni, itqanaiyaŋaruq aullaġukłuni Syria-mun. Tavra sivunniŋaruq utiqsaġukłuni Macedonia-kun.

⁴ Sopater iġñiŋa Pyrrhus Berea-mium aullaqasiŋagaa, aasiiḷi Thessalonica-ġmiuniñ Aristarchus-guvlu Secundus-lu Gaius-lu Derbe-mium, Timothy-vlu Tychicus-lu Trophimus-lu nunaaqqiŋiñiñ Asia-m tuvaaqasiŋagaat.

⁵ Taapkua iñuich ayuŋarut sivuptiŋni, aasii utaqqivḷuta Troas-mi.

⁶ Uvagulli tiŋinnaaŋarugut Philippi-miñ Niqinaqianiŋmata Puvlaksiŋaitchuamik Punniġmik, aasii tallimat uvlut pianiŋmata kasuŋagivut Troas-mi. Tavrani tallimat malġuŋni uvliŋarugut.

Paul Ullaguiqsaaġai Ukpiqtuat Troas-mi

⁷ Tavra Savaitchuani katinŋarugut atautchimun nullautchiġviḷiqiniaqłuta. Paul uqautiŋagai iñuich unnuaq qitiqqaġataqtillugu aullaġniaqłuni uvlaakukpan.

⁸ Qulliich iñugiaŋarut qiḷaguami kasimavivsiŋñi.

⁹ Aasii nukatpiaq atiqaqtuaq Eutychus aquppiŋaruq igalaurami. Paul uqaŋaiḷḷaiqsillugu Eutychus uiñġaliqsaiññaŋaruq, kiisaimmaa siquvuq, aasii katakłuni piŋayuaŋniñ qiḷaguak nunamun. Tigummarruŋ tuquŋaniqsuq.

¹⁰ Tavra Paul atqaŋaruq aasii pułłuni qulaŋiqł̣ugu, iqinnamiuŋ uqallaŋaruq Uŋiariñasi. Iñuuruq suli.

¹¹ Tavra Paul mayuanikami, niġianikamirruŋ nullautchiġvik, uqautivsaaŋagai uvluġataqtillugu, aasii aullaqłuni.

¹² Aasii iñuich aggisiŋagaat nutaġaaluk iñuuvlugu, suli quviasaaqtauqpaŋarut.

Troas-miñ Miletus-muktugut

¹³ Aasii ayuvluta umiaqpaŋmun tiŋilġaqsiqsaŋarugut Assos-mun, sivuniqaqłuta ikisukługu Paul tavrani. Tainna sivunniuŋamman ilaa nunakuaġumavluni.

¹⁴ Tavra kasuġmatigut Assos-mi, ikuŋagikput umiaqpaŋmun aasii Mitylene-mukłuta.

¹⁵ Tavraŋŋa tiŋinnaaŋarugut uvlaakumman akiŋiqł̣ugu Chios. Aasii uvlutqiŋman tikił̣ł̣uta Samos-mun, aasii uvlaakutqiŋman tikił̣ł̣uta Miletus-mun.

¹⁶ Tavra Paul sivunniŋaruq qaaŋiqsaaġukługu Ephesus, iñaviqqutchiġuŋił̣ł̣uni nunaaqqiŋisiguaġumi Asia-m. Ilaa tikiññasuaġuŋaruq Jerusalem-mun piñaġumiñaqpan Pentecost-liqikpata itchukłuni.

Paul Uqautisuiqsaaġai Umialiŋnauruat Ephesus-mi

¹⁷ Paul aullaqtitchiŋaruq uqaluŋmik Miletus-miinŋaġmi Ephesus-mun apiġivlugich umialiŋnaŋich aŋaiyyuliqiruat paaquvluni.

¹⁸ Aasii tikiñmanni uqallautiŋagai, Iḷisimarusi qanuq iñuuŋatilaamnik akunnavsiññi sivulliġmiñqaŋa uvlumiñ tikiññama nunaaqqiŋiñun Asia-m.

¹⁹ Savautiŋagiga Ataniq kamasaaŋaiqł̣uŋa qulviuqłuŋalu siġḷiġniuġutit pisigivlugich tikitqataqtuat uvamnun sivunniuġutiŋich piyumigivluŋa Jew-guruat.

²⁰ Iḷisimarusi aŋŋikkutiŋaitkivsi supayaamik ikayuutauyumiñaqtuamik ilivsiññun alġaqsruikama iḷisautivlusiḷu kasimakavsi, igluvsiññiḷu.

²¹ Jew-guruallu Jew-guŋitchuallu ativlugich kiliktuŋagitka isumalitqiquvlugich piḷuunmiŋniñ God-mun, suli ukpiquvlugich Ataniptiŋnun Jesus-mun.

²² Aasii paŋmapak Ilitqusiġiksuam piyummiqł̣uŋa aullaaqsiruŋa Jerusalem-mun, nalugaluaŋŋaan suna piruksraq uvamnun taamani.

²³ Aglaan iḷisimatualuktuŋa Ilitqusiġiksuam iḷitchuġipkaŋagaaŋa iniqpapayaani tigutaaqtauniaġnivḷuŋa nagliksaaqtitauniaġnivḷuŋalu.

²⁴ Aasii tamatkua sivuuġagiŋitkitka. Sugiŋitkigalu tuqutkaluaqpanŋa. Naatchisuktuŋa tiliraunimnik alġaqsruiñimniglu Atanġum Jesus piraksriŋammaŋa quliaqtuaġutitquvlugich iñuich tusaayugaaġiksuanik, God-mun annautiyumiñaġnivḷugich nagliktuutiqpaŋmigun.

²⁵ Aasii kukiḷuŋaruŋa akunnavsiññi alġaqsruutigivlugu God-im atanniqsimmataa iñuŋnun. Paŋmapak uvva iḷisimaruŋa iluqasi taututqigñiaŋitkivsiŋa.

²⁶ Tavraasii uqallautipiaġivsi uvlupak patchisauyumiñaiññiḷuŋa nalliqsi annaurrauyumiñaiññiqpan.

²⁷ Qanuq aŋŋikkutiŋaitkivsi sumik uqautigiraksramnik iluqaanik God-im iḷisimatqukkaŋanik ilivsiññun.

²⁸ Qaunagisitchi ilivsiññun iluqaisalu ukpiqtuat, Ilitqusiġiksuam qaunagitquŋakkaŋi ilivsiññun. Qaunagisigik aŋaiyyuliqiruat God-mun, ilaan pigiliutiŋakkaŋi tuqqutaagun ilaan iġñiġmi.

²⁹ Iḷisimaruŋa aullaanikkuma, iḷisaurriruat iḷumun inŋitchuanik iqsiñaqtuatun amaqqutun akunnaaġutiniaqtut ilivsiññun, aasii ukpiġutaiqsinniaġniaġaich ukpiqtuat.

³⁰ Suli ilivsi nanmiñiq akunnavsiññiñ satqummiġñiaqtut iñuich uqaurriruat saglunik ukpiqtuaguruanun maliksuktitchiñiaqłutiŋ inmiŋnun.

³¹ Taamna pisigilugu nipuŋaitchitchi, itqaumalusi ukiuni piŋasuni nutqaŋaitchuŋa unnuakkaluami naagga uvlumi kiliktuqługu iñupayaaq tamatkunuuna qulviuġaluaŋŋaġma.

³² Aasii paŋmapak aŋaiyyutigivsi God-mun qaunagitquvlusi, suli aŋaiyyutivlusi nagliktuutikun uqaluŋiñun suaŋasiḷaaquvlugu ukpiġutiksi iḷaŋiutiyumiñaqsiḷusi quviasaaġusianik ilaan aitchuutigisuukkaŋiñik ilaaguaqtamiñun.

³³ Kaviuġiŋaitkiga kialiqaa mania qatiqtuaq naagga kaviqsuaq, naagga annuġaaŋi.

³⁴ Ilivsi iḷisimarusi ukuniŋa argamnik savautiqaġuuruŋa piqallasivḷuta iḷatkalu pigiraksraġikkaptiŋnik.

³⁵ Tamatkunani iluqaiññi iḷisautiŋagivsi tainna iñuk savagluni ikayuiruksrautilaaŋanik piḷguitchuanik, itqaumalugich uqaluŋi Atanġum Jesus uqallaŋamman, Quvianałhaaqtuq aitchuiruni aitchuusiaqaġniġmiñ.

³⁶ Tavra Paul tamatkuniŋa uqaanikami, sitquqatigiŋagai iluqaisa umialiŋnat, aasii aŋaiyyuvlutiŋ.

³⁷ Tavra iluqaġmiŋ qiaqpaŋarut, suli iqimmaaqługu Paul kunikł̣ugulu kutpaiŋagaat,

³⁸ isumaaġutigiłhaaqługich uqaluich uqallausiġiŋakkaŋi taututqigñiaŋiññivḷuni. Tavra umiaqpaŋmuqatigiŋagaat.