Acts 19 - Iñupiatun Mumiksat Uqalugiksuat

Paul Ephesus-mi

¹ Tavra Apollos Corinth-miitillugu, Paul iglauŋaruq nunatigun aasii tikił̣ł̣uni Ephesus-mun. Tavrani kasuŋagai iḷaŋich ukpiqtuat.

² Aasii ilaan apiġiŋagai, Aitchuusiaġiŋavisiuŋ Ilitqusiġiksuaq ukpiliqavsi? Aasii kiuŋagaat, Naagga, qaŋaunnii tusaaŋaitchugut Ilitqusiġiksuaqaqtilaamik.

³ Tavra Paul apiġivsaaŋagai, Qanuqłusi paptaiqsauŋavisi? Iliŋisa kiuŋagaat, Paptaiqsauŋarugut John piraksriutaagun.

⁴ Tavra Paul uqallaŋaruq, John paptaiŋagai iñuich isumalitqiŋmata, uqautivlugich iñuich Israel-guruat ukpiliquvlugich iñuŋmun qaiyumaaqtuamun aqumigun, taavrumuŋa Jesus-mun.

⁵ Taamna tusaakamirruŋ, paptaiqsauŋarut atqagun Atanġum Jesus.

⁶ Taavruma aquagun, Paul iḷimmagich argaŋni ilaiññun, Ilitqusiġiksuam aŋalarraqsiŋagai, aasii iliŋich uqaŋarut allakanik uqautchiñik nalukkamiŋnik, suli uqaqłutiŋ kaŋiqsiñaqsivḷugich God-im uqaluksriutiŋi.

⁷ Iñugiaktilaaġivalliŋagaat qulit malġuk aŋutit.

⁸ Tavra Paul aŋaiyyuliaqtaŋaruq Jew-guruat aŋaiyyuviannun, aasii piŋasuni tatqiñi uqaqłuni taluqsraŋił̣ł̣uni, uqaaqatigivlugich ukpiqtinniaqługich God-im atanniqsimmataagun iñuŋnun.

⁹ Aglaan iḷaŋich uqayunaiñŋarut ukpiġuŋiñŋarullu, suli uqautigimaqłukługulu Ataniq takkuanni iñuich kasimaruat. Tavra Paul qimaŋagai, aasii piqasiutivlugich ukpiqtuat, aasii uvlutuaġman uqautivlugich igluqpaŋmi iḷisaurriviani Tyrannus-gum.

¹⁰ Paul tainna piŋaruq ukiuŋni malġuŋni, iñupayaurat iñuuruat nunaaqqiŋiññi Asia-m Jew-gugaluaqtuat Jew-guŋitkaluaqtuallu tusaaŋarut uqaluŋiñik Atanġum.

Sceva-m Iġñiŋi

¹¹ Tavra God-im savaktinŋagaa Paul naumaruanik aliuġnaqtuanik.

¹² Kakkiiyautikkaluat unnii saaġuallu atuŋakkaŋi Paul naŋittuanuutiraġaŋagaich, aasii naŋirrutiŋich piiġaqtut, ilitqusiqł̣uiḷḷu anivḷutiŋ iliŋiññiñ.

¹³ Tavra kukiḷuktuat iḷaŋich Jew-guruat ilitqusiqł̣uiyairuat atuqsaaŋagaat atqa Atanġum Jesus tamatkunuŋa ilitqusiqł̣uqaqtuanun. Uqallautiŋagaich ilitqusiqł̣ugich inna, Piraksriġivsi anitquvlusi atqagun Jesus, Paul alġaqsruutigikkaŋata.

¹⁴ Tainna piŋaniqsut tallimat malġuk iġñiŋi Jew-guruam aŋaiyyuliqsiqpaich qaukłiata atiqaqtuam Sceva.

¹⁵ Tavra ilitqusiqł̣uum kiuŋagai, Jesus iḷisimagiga, Paul iḷisimammigiga, aglaan ilivsi kitkuuvisi?

¹⁶ Tavra iñuum ilitqusiqł̣uqaqtuam piyuarraqsiŋagai piaqługivlugich, aasii payarivḷugich. Tavra iluqaġmiŋ pigruŋarut iglumiñ annuġaiḷat kiḷḷiaqtat.

¹⁷ Tavra taamna tusaaŋagaat iluqaġmiŋ Jew-guruat Jew-guŋitchuallu iñuuruat Ephesus-mi aasii iqsitchaŋarut iluqaġmiŋ, aasiiḷi atqa Atanġum Jesus kamanaqtuaġiŋagaat iñuich.

¹⁸ Iñugiaktuat ukpiqtuaġuqtuat qaiŋarut, aasii quliaqługich takkuanni iñuich sut savaaġisuuratiŋ,

¹⁹ iḷaŋisa savaaqaġuuŋaruat aŋatkiqiniġmik qaġġisiŋagaich makpiġaatiŋ atautchimun, aasii ikipkaqługich takkuanni iñupayaat. Aasii akisutilaaġmatigik makpiġaat iḷitchuġiŋagaich katiłługich akisutilaaŋat 50,000 taalatun.

²⁰ Tavra iñuvsaat ukpiġiliŋagaat uqalua Atanġum. Suli iluqaġmiŋ iñuich iḷitchuġiŋagaat suaŋŋatiqaqtilaaŋanik God-im uqalua.

Tuavaallaktut Ephesus-mi

²¹ Tavra tamatkua piruat aquatigun, Paul aŋalałługu Ilitqusiġiksuam sivunniqsinŋagaa iglausukłuni nunaaqqiŋisigun Macedonia-m Greece-guvlu, aasii Jerusalem-mugluni. Ilaa uqallaŋaruq, Jerusalem-muqqaaġluŋa, tautugaksraġipiaġmigiga Rome.

²² Tavra tiliŋagik Timothy-lu Erastus-lu ikayuqtiŋni Macedonia-mun, ilaali ittuallavsaaġukłuni nunaaqqiŋiñi Asia-m.

²³ Tasamma tainnaiḷimman iñuich tuavaallapiaġataŋarut Ephesus-mi, akiḷḷiḷiqsuqługu alġaqsruun Atanikun.

²⁴ Qanuq iñuk atilik Demetrius-mik, maniŋñik qatiqtuanik savviqiri aŋaiyyuviŋŋualiuġuuruaq tuvraqługu aŋaiyyuvikpak savaaguruaq aġnamun god-iŋŋuamun Artemis-mik atiqaqtuamun. Savaaŋata maniññaktiqpagaġniġai savaktit.

²⁵ Tavra ilaan katitinŋagai atautchimun iluqaisa savaaqaqtuat ilimiktuttauq, aasii uqallautiŋagai, Aŋutiit, iḷisimarusi taavruma savaapta maniññaktilluataġuugaatigut.

²⁶ Aasii qiñiqtusi tusaarusiḷu taamna Paul suliqitilaaŋanik. Ilaa uqaqtuq god-iŋŋuat iñuich savaaŋich god-tauŋiññivḷugich, aasii maliksuktiłługich iñuich iñugiaktuat uvani Ephesus-mi, iluqakavsaŋiññiḷu nunaaqqiŋisa Asia-m.

²⁷ Aasiuvva anayanaqtuq savaaqput, una kisimi suksraaqtauniaŋitchuq, aglaallu aŋaiyyuvikpaŋa kamanaqtuam aġnam god-iŋŋuam Artemis-gum suuŋaiġñiaġmiuq, aasii kamanautaa suksraunġiqsauluni iñupayaat aŋaiyyuvigisuukkaŋat Asia-mi iluqaaniḷu nunami.

²⁸ Taamna iñusalaich tusaakamirruŋ qinnaliqpaŋarut, suli nipaalarraqsiŋarut, Kamanaqtuq Artemis god-iŋat Ephesus-miut.

²⁹ Tavra iñuŋi iniqpaum tuavaallapiaġataŋarut. Suli pialaruat tigguġluŋagaich Gaius-lu Aristarchus-lu Macedonia-ġmiuk, Paul iglauqatiŋik, aasii aullautivlugik kasimaviŋmun.

³⁰ Paul ullautiyumaŋagaluaqtuq kasimaruanun, ukpiqtuat pitchaiḷiŋagaat.

³¹ Iḷaŋisaptauq atanaurauruat ilaan avilaitqatiŋi tilisiŋammiut uqaluŋmik ilaanun ullautisaatquŋił̣ł̣ugu iñuich kasimmaviannun.

³² Tavrali kasimaruat iluqaġmiŋ tuavaallaŋarut. Iḷaŋich nipaalaŋarut inmikkun, iḷaŋiḷḷi allamik, qanuq kasimaruat alapinŋarut, suli iñugiagniqsrat naluŋarut summan katitilaamiŋnik.

³³ Tavra iñuk atiqaqtuaq Alexander-mik Jew-guruat saavititaŋat sivuġaannun kasimaruat urriqaŋaruq argaŋmiñik nipaiquvlugich, aasii uqaġnirraqsivḷuni iñuŋnun iliŋich patchisauŋiññivḷutiŋ.

³⁴ Tavra iḷisaġikamirruŋ Jew-gutilaaŋa, atausiŋŋuqługu nipiriŋ nipaalaŋarut malġuŋni ikarraaŋni, Kamanaqtuq Artemis god-iŋat Ephesus-miut.

³⁵ Kiisaimmaa iniqpaŋmi aglaktim nipaiqsinnamigich iñusalaich uqallaŋaruq, Iñuŋi Ephesus, iñupayaat iḷisimarut iniqpaŋat Ephesus-miut qaunaksriruagutilaaŋanik aŋaiyyuvikpaŋanik kamanaqtuam Artemis, taavrumalu iñuuraqpaum kataŋaruam siḷamiñ.

³⁶ Iḷisimalusiasii tamatkua kialiqaa piiḷaaġiyumiñaiñmagich nipaalaruksrauŋitkaluaqtusi, suli piaqłuktaŋaiġḷusi.

³⁷ Qaġġisiŋagisi ukuak iññuk uvuŋa tigligaiŋaitkaluaqtillugik aŋaiyyuvikpavsiññik, naagga uqamaqłuktautiqaŋaitkaluaqtillugik god-iptigun.

³⁸ Tavra Demetrius-lu savaktiniḷu pasikkutiksraqaġumiŋ iññukkun, uqaqsitaaġviich aŋmarut uqaqsitaaġvikaallu uvlut, isivġiqsillu ittut, tavrani uqautikkutiyumiñaqtut avanmun.

³⁹ Suli allanik iłuaqsrugaksranik piqavsaaġuvsi, iłuaqsruqtauyumiñaqtut pitquratigun kasimakpata.

⁴⁰ Qanuq anayasaaqtugut uqautikkusiaksramik tuavaalanikun uvlupak, patchisiksraiñŋapta nalauttualiḷuta uumuuna tuavaalanikun.

⁴¹ Tavraasii taamna uqallausiġianikamiuŋ, aġiupkaŋagai kasimaruat.