Acts 18 - Iñupiatun Mumiksat Uqalugiksuat

Corinth-mi

¹ Taavruma aquagun Paul aullaŋaruq Athens-miñ aasii Corinth-mukłuni.

² Tavra ilaan kasuŋagaa Jew-guruaq atiqaqtuaq Aquila-mik, aniŋaruaq Pontus-mi, qaiqqammiqsuaq Italy-miñ piqatigivlugu nuliani Priscilla, qanuq umialik Claudius pitqurriiŋaruq Jew-payaurat aullaquvlugich Rome-miñ. Tavra Paul-gum tautugiaŋagik.

³ Aasii atiruamik savaaqaġniqamiŋ tuppiuqtauvlutiŋ, ilaan nayuŋagik.

⁴ Tavra Paul uqaaġaqtuq Jew-guruat aŋaiyyuvianni Savaiññipayaani, ukpiliqsinniaqługich Jew-guruallu Greek-giḷḷu.

⁵ Tavra Silas-lu Timothy-lu tikiñŋaruk Macedonia-miñ, Paul aptatiqaŋaruq alġaqsruiñiġmik, uqaluktuaġivlugu Jew-guruanun Jesus Christ-gunivḷugu.

⁶ Tavraasii akiḷḷiḷiqsuġmanni uqamaqłuutivluniḷu, ilaan ivsuktuŋagai annuġaani aasii uqallautivlugich, Annaurrauŋitkuvsi ilivsiññik pasiruksraurusi. Uvaŋa patchisauŋitchuŋa. Paŋmapaŋmiñ alġaqsruiñiaqtuŋa Jew-guŋitchuanun.

⁷ Tavra Paul qimaŋagai aasii aullaqłuni igluanun Jew-guŋitchuam atiqaqtuam Titus Justus-mik, aŋaiyyusuuruaq God-mun. Ilaan iglua siḷalliuŋaruq Jew-guruat aŋaiyyuviannun.

⁸ Crispus umialiŋnauruaq aŋaiyyuviŋmi ukpiliŋaruq Ataniġmun, piqatigivlugich igluqatipayaani. Suli iñugiaktuat allat iñuich Corinth-miittuat tusaavlugu uqaluk, ukpiliŋarut suli paptaiqsauvlutiŋ.

⁹ Unnuat iḷaŋanni, Paul qiñiqtuuraaŋaruq. Tavrani Atanġum uqallautiŋagaa, Iqsiñak, aglaan alġaqsruivsaaġiñ, nikatchaŋnak,

¹⁰ qanuq itqatigigikpiñ, iñuum kialiqaa anniaqsaayumiñaitkaatin, qanuq ittut iñugiaktuat iñutka uumani iniqpaŋmi.

¹¹ Tavra Paul tavraniinŋaruq ukiuq iḷavlugu avvaġmik, iḷisautivlugich iñuich God-im uqaluanik.

¹² Tavra Gallio kavanaupkaqtillugu Greece-mi, Jew-guruat katinŋarut, aasii tigguġlukługu Paul qaġġisiŋagaat uqaqsitaaġviŋmun,

¹³ uqaqłutiŋ, Iñuk una maliksuktitchiñiaqsaaruq iñuŋnik aŋaiyyutquvlugich God-mun, paaqłaglugich pitqurat.

¹⁴ Tavra Paul uqallaksaaqsimmiuġlu, Gallio-m uqallautiŋagai Jew-guruat, Iñuk taamna piŋakpan sumik pigiitchuamik pitqurallu kamagiŋiḷḷugich, uvaŋa manimmiyumiñaġaluaġivsi Jew-guruasii.

¹⁵ Aglaan pasiñiqavsiuŋ uqaluktigullu iñuiḷḷu atiŋisigun ilivsiḷu pitquravsigun, ilivsiññik iłuaqsruġumiñaġiksi. Tamatkunuuna isivġiqsauniaŋitchuŋa.

¹⁶ Tavra ilaan aninŋagai uqaqsitaaġviŋmiñ.

¹⁷ Tavra iluqaġmiŋ tigguġluŋagaat Sosthenes, umialiŋnaŋa Jew-guruat aŋaiyyuviata, aasii anaumiaqsivḷugu sivuġaani uqaqsitaaġvium. Taamna suliqutigiŋiñmigaa Gallio-m suuramikunnii.

Utiqtuq Antioch-mun

¹⁸ Taavruma aquagun Paul iñugiaktuanik uvliuqqaaqłuni Corinth-mi, qimaŋagai aniqatit tiŋilġaivḷuni Cyria-mun, piqatigivlugik Priscilla-lu Aquila-lu. Cenchreae-miinŋaġmi, niaquni mitquiŋagaa piḷġusiatitun Jew-guruat unniqsuqłiivḷuni God-mun.

¹⁹ Tavra tikiñŋarut Ephesus-mun, aasii Paul-gum qimaŋagik Priscilla-lu Aquila-lu tavruŋa. Ilaa aŋaiyyuliaŋaruq Jew-guruat aŋaiyyuviannun, aasii tavrani uqavaaqatigiŋagai Jew-guruat.

²⁰ Iliŋisa apiġimmanni nayuqtuallaquvlutiŋ sivisuuraqtuami, ilaa pisuŋiñŋaruq.

²¹ Aglaan qimaksaqamigich uqallautiŋagai, Pisuutigikpagu God-im, utaqqiñiaġmigivsi. Tavra tiŋinnaaqsaŋaruq Ephesus-miñ.

²² Tavra tikiññami Caesarea-mun, aullaŋaruq Jerusalem-mun, aasii paġlaŋagai aŋaiyyuliqiruat, aasii aullalgił̣ł̣uni Antioch-mun.

²³ Tavraniittuallaqqaaqłuni aullaŋaruq aasii kukiḷukłuni nunaaqqiñun Galatia-mi Phrygia-miḷu, suaŋasiḷiqługich ukpiġutiŋich ukpiqtuat.

Apollos Ephesus-miḷu Corinth-miḷu

²⁴ Tavra Jew-guruaq atiqaqtuaq Apollos-mik, iñuguŋaruaq Alexandria-mi, tikiñŋaruq Ephesus-mun. Ilaa uqaqtuayuruaq iḷisimmaġikł̣uni Bible uqaluŋiññik.

²⁵ Iḷisausiaqaŋaniqsuq Atanikun, aasii qapiŋaił̣ł̣uni uqaŋaruq iḷisaurrivḷuniḷu nalaupiaqługich sut sivuniqaqtuat Jesus-mik. Aglaan iḷisimatualuŋniqsuq paptaiġutaanik John.

²⁶ Ilaa uqarraqsiŋaruq taluqsrautaił̣ł̣uni Jew-guruat aŋaiyyuvianni. Tavra Priscilla-vlu Aquila-vlu naalaktuaqqaaqługu aggisiŋagaak, aasii iḷisautimmaġiksaagaqsivḷugu God-im annaurriḷḷatilaaŋanik iñuŋnik.

²⁷ Tavra Apollos sivunniġman aullaġukłuni Greece-mun aniqatit Ephesus-mi ikayuŋagaat, tuyuqłutiŋ aniqatimiŋnun Greece-miittuanun paġlatquvlugu tikitpan. Tikiññami, Apollos ikayuŋagai tamatkua ukpiliŋaruat God-im nagliktuutiqpaŋagun.

²⁸ Qanuq ilaan qapiġnaił̣ł̣uni, suaŋavlutiŋ uqaluŋi, Jew-guruat qapiqtaŋagai kasimaruani qapiqtautikamiŋ nalupqinaiyaqługu Bible uqaluŋiññiñ Jesus Christ-guniŋa.