Acts 16 - Iñupiatun Mumiksat Uqalugiksuat

Timothy-m Piqasiġik Paul-lu Silas-lu

¹ Tavra Paul-kut tikiñŋarut Derbe-mun Lystra-mullu. Ukpiqtuaq tavraniinŋaruq atiqaqtuaq Timothy-mik, iġñiŋa Jew-guruam aġnam ukpiqtuaguruam, aglaan aapaŋa Greek-guvluni.

² Ilaa uqautigilluataŋagaat iluqatiŋ aniqatit Lystra-mi Aichonia-miittuallu.

³ Paul-gum Timothy maliquŋagaa inmigun. Tavra Paul-gum nalunaiñŋutchiŋagaa timaagun Timothy Jew-guqtirrunmik. Taamna piŋagaa pisigivlugich iluqaisa Jew-guruat iñuuruat tamaani iḷisimaruat Timothy-m aapaŋa Jew-guŋisilaaŋanik.

⁴ Tavra iglaullaġmiŋ iniqpaktigun, aitchuutigiraġaŋagaich sivunniutit ukpiqtuanun inillakkaŋich tiliraunikun iḷitchitqurat umialiŋnallu Jerusalem-miittuat, uqautivlugich kamagitquvlugich tamatkua piraksriutit.

⁵ Tavra aŋaiyyuliqiruat suaŋasiḷaaqtauŋarut ukpiġunmiŋni, suli iñugiaksisaiññaŋarut uvlutuaġman.

Troas-mi Paul Qiñiqtuuraaqtuq

⁶ Tavra kukiḷuŋarut nunaŋigun Phrygia-m Galatia-vlu. Ilitqusiġiksuam alġaqsruitquŋaitkai tusaayugaaġiksuamik nunaaqqiŋiñi Asia-m.

⁷ Tavra akiŋiqamirruŋ nuna Mysia, iglausaġaluaŋarut nunaaqqiŋiñun Bithynia-m, aasii Jesus Ilitqusiġiksuaŋata pipkaŋaitkai.

⁸ Tavraasii qaaŋiqł̣ugu Mysia, Troas-muŋarut.

⁹ Tavra Paul qiñiqtuuraaŋaruq unnuami, tautukługu Macedonia-ġmiu makitavluni qaitquuqłiqsuaq inmiñik, uqaqłuni, Qaiḷutin Macedonia-mun ikayuġiaqtigut.

¹⁰ Tavra Paul qiñiqtuuraaganipqaġman, tavrauvvaa itqanaiyaŋarugut aullaġukłuta Macedonia-mun, sivunniqł̣ugu God-mun ququaġnivḷuta alġaqsruitquvluta tusaayugaaġiksuamik iñuŋnun taamani.

Philippi-mi Lydia Ukpiqtuaġuqtuq

¹¹ Umiaqpagaqłuta aullaŋarugut Troas-miñ, aasii tiŋinnaaqłuta nalimun ikaaqłuta Samothrace-mun, aasii uvlutqiŋman Neapolis-mun.

¹² Aasii tavraŋŋa aullaqłuta nunanmun Philippi-mun, naumaniqsrauruamun iniqpaŋiñi Macedonia-m, Rome-miunik iñuqaqtuaq. Taavrumani iniqpaŋmi uvliuŋarugut.

¹³ Tavra Jew-guruat Savaiññiŋanni, siḷataanuŋarugut iniqpaum kuugum siñaanun, isumavluta Jew-guruat aŋaiyyuliaġuunasugalugich tavruŋa. Aasii aquptaaqłuta uqaqatigiŋagivut aġnat katittuat tavruŋa.

¹⁴ Iñuich iḷaŋat tusaarikput aġnaq atiqaŋaruq Lydia-mik, iniqpaŋaniñ Thyatira-m, tuniuqqairi suŋauraammaġiksuanik ukił̣haanik, aŋaiyyurauruaq God-mun. Atanġum puttuqsripkaŋagaa akuqtuġumiñaqsivḷugich uqaluŋi Paul.

¹⁵ Tavra ilaalu igluqatiniḷu paptaiqsauŋarut. Tavrani ilaan aiyugaaŋagaatigut uqaqłuni, Isummatigiguvsiŋa iḷumun ukpiqtuaġuġniḷuŋa Ataniġmun, qaisitchi iglumnun aasii tukkulusi. Tavra kamagiŋagikput.

Paul-lu Silas-lu Tigutaaġaich Philippi-mi

¹⁶ Iḷaanni aullalgiññapta aŋaiyyuliaġvikaamun paaŋagaatigut kivgam niviaqsiam ilitqusiqł̣uqaġniqsuam nalautchaġuuvluni sunik piyumaaqtuanik. Ilaan pigirini maniññakpautisuunikkaŋi nalautchuġaqłuni.

¹⁷ Ilaan maliġuaŋagaa Paul uvagullu nipałłuni, Uvvaukua aŋutit kivgaŋi kamanaġniqsrauruam God-im uqautigaasi qanuġlusi annallasiñiaqtilaavsiññik.

¹⁸ Tainna nipanŋaruq uvluni iñugiaktuani. Tavra Paul-gum aġiuvlugu kiŋiaqługu uqallautiŋagaa ilitqusiqł̣uk, Ataniġnaqutaagun Jesus Christ piraksriġikpiñ anitquvlutin ilaaniñ. Tavrauvvaa ilitqusiqł̣uk aniŋaruq ilaaniñ.

¹⁹ Tavra pigiriŋisa iḷitchuġikamiŋ maniññagniutigikkaqtiŋ piiġñiġman, tigguġluŋagaich Paul-lu Silas-lu, aasii kaliksraqługik kasimmaviŋmuutiŋagaich sivuġaannun atanaurat.

²⁰ Tavra qaġġisiŋagaich sivuġaannun Rome-miut atanauraŋisa, aasii uqallakłutiŋ, Ukua uvva aŋutit Jew-guruat aŋalayyakkaich iñuich iniqpaptiŋni.

²¹ Iliŋich iḷisaurrirut paaqsaaŋaruanik pitquraptiŋnun. Uvagut Rome-miuguruaguut kamagiyumiñaitkivut tamatkua piḷġutchich iḷisaurrutiŋich.

²² Iñusalaich tapiġiiksinŋarut piyuaqłiqł̣utiŋ iliŋiŋnik, suli atanaurauruat aliktuŋagaich annuġaaŋik Paul-lu Silas-lu, aasii piraksriivḷutiŋ anaumiquvlugik.

²³ Tavra anaumianisugruanikamisigik, tigutaaġviŋmuŋagaich piraksriqł̣ugu tigutaaqtanik munaqsri qaunagipiaġataquvlugik.

²⁴ Kamagivlugu taamna piraksriusiani, munaqsrim iḷulliġmun tigutaaġviŋmun isiŋagik, aasii payaŋaiyaqługik siŋiġñiŋikkun qiruŋnun tigutaaġutinun.

²⁵ Tavra unnuaq qitiqqaqpalliġman Paul-lu Silas-lu aŋaiyyuŋaruk, suli nanġautinik atuqłutik God-mun, aasii tigutaaqtat naalaktuaŋagaich.

²⁶ Tavra tavraŋŋatchiaq nuna aulaqpaŋaruq, maŋŋuŋiunnii tigutaaġvium aulayyaktaallaisa. Tavraŋŋatchiaq iluqaġmiŋ upkuat upkuiŋarut, suli iñupayaam tigutaaqsimmatiŋi kalimñat kataŋarut tigutaaqtaniñ.

²⁷ Tavrali tigutaaqtanik munaqsri itiqami, tautukamigich tigutaaġvium upkuaŋi aŋmaruat, isumaliŋaruq iluqaisa tigutaaqtat pigruġasugalugich, tavraasii amuŋagaa savikpani tuqutchaqsaqłuni inmiñik.

²⁸ Tavra Paul nivliŋaruq nipatutilaamisun, Anniaġnak iliŋnik, qanuq uvaniittugut iluqata.

²⁹ Tavra tigutaaqtanik munaqsri qaummatiksramik qiññuaŋaruq, suli isiniqłakłuni uullaġruaqtun iqsim punŋaruq sivuġaaŋnun Paul-lu Silas-lu.

³⁰ Tavra annisivlugik apiġiŋagik, Aŋutiik, sumik piruksrauvik annaurrausugluŋa?

³¹ Iliŋik uqallaŋaruk, Ukpiġiñ Ataniġmun Jesus-mun aasii annaurrauniaqtutin, iliviḷḷu igluqatitillu.

³² Tavra iliŋikta quliaqtuaġiŋagaak uqalua Atanġum ilaanun, iluqaiññullu igluaniittuanun.

³³ Tavra ilaan piŋagik taavrumani unnuam ikarraŋani, aasii iqaġivlugich kiḷḷiaġniŋik, suli ilaa qitunġaniḷu paptaiqsauŋarut tavrauvvaa.

³⁴ Tavra ilaan Paul-lu Silas-lu iglumiñuutiŋagik, aasii niqłiqsuqługik. Tavra ilaa igluqatiniḷu quviasupiaġataŋarut pisigivlugu ukpiliġñiqtiŋ God-mun.

³⁵ Tavra uvlaami Rome-miut atanauraŋisa tiliŋagaich piliisimat uqaqłutiŋ, Taamapkuak aŋutik aullaqtitchigik.

³⁶ Tavra tigutaaqtanik munaqsrim uqallautiŋagaa Paul, Atanaurat tilisiŋarut aullaqtitquvlutik, iliviḷḷu Silas-lu tigutaaqtauŋaiġḷutik. Aullaġumiñaqtutik tuaksruiḷaakun.

³⁷ Tavra Paul-gum uqallautiŋagai piliisimat atanauraŋich, Anaumiŋasugaaptiguk iñuich takkuanni, isivġiqsauŋaiḷaak patchisiqaqtilaaġlunuk, iññuk Rome-miunun iḷauruaguuk, suli isiqtaġivlunuk tigutaaġviŋmun. Paŋmapak aasiiñ aullaqtinniaqpatiguk nalunautchiḷutiŋ? Naumi, qaiḷutiŋ ilimiŋnik annisiyaqtuġlisiguk.

³⁸ Piliisimat quliaqtuaġiŋagaich taapkua uqaluich atanauranun, aasii tusaakamasigik Paul-lu Silas-lu Rome-miunun iḷautilaaŋaŋnik iqsiḷiŋarut.

³⁹ Tavra qaivḷutiŋ nunuuraġvigiŋagaik. Aasii annisivlugik apiġiŋagaich aullaquvlugik iniqpaŋmiñ.

⁴⁰ Tavra Paul-lu Silas-lu aniŋaruk tigutaaġviŋmiñ, aasii isiqłutik Lydia-m igluanun. Tavrani kasuŋagaich aniqatit, aasii uqautiqqaaqługich qapiŋaisaaġutinik, aullaŋaruk.