Acts 15 - Iñupiatun Mumiksat Uqalugiksuat

Kasimaruat Jerusalem-mi

¹ Tavra iñuich iḷaŋich qaiŋarut Judea-miñ Antioch-mun, aasii iḷisautirraqsivḷugich aniqatit uqaqłutiŋ, Nalunaiñŋutchiqsauŋisuaġuvsi timivsigun nalaullugich pitqurat qaisauruat Moses-kun annaurrauyumiñaitchusi.

² Tavra Paul-lu Barnabas-lu siimmaqatigivlugich qapiqtaiḷiqatigiŋagaich taavrumuuna. Tavraasii sivunniŋarut Paul-lu Barnabas-lu iḷaŋiḷḷu allat Antioch-miittuat aullaqtuksrivḷugich Jerusalem-mun, tiliraunikun iḷitchitquranun umialiŋnanullu taavrumuuna iḷitchuġiyaqtuġlutiŋ.

³ Tavra tilimmatiŋ aŋaiyyuliqiruaŋisa, iglauŋarut Phoenicia-kun Samaria-kullu, quliaqtuaġutivlugich Jew-guŋitchuat ukpiliqsilaaŋannik God-mun, aasii taavruma tusaakkaŋata quviatchaŋagai iluqaisa aniqatit.

⁴ Tikiñmata Jerusalem-mun, paġlaŋagaich aŋaiyyuliqiruat tiliraunikullu iḷitchitqurat umialiŋnallu, aasii quliaqtuaŋaruk iluqaiññik God-im ikayuqługik piramiŋnik.

⁵ Aglaattauq iḷaŋich ukpiqtuat iḷauruat Pharisee-ñun makinŋarut, aasii uqallakłutiŋ, Jew-guŋitchuat ukpiliqsuat nalunaiñŋutchiqsitaksraupiaqtut timimikkun, suli kamagitqulugich pitqurat qaisauruat Moses-kun.

⁶ Tiliraunikun iḷitchitqurat umialiŋnallu katinŋarut atautchimun isummatigisukługu taamna.

⁷ Tavra uqavaaganisugruŋmata, Peter makinŋaruq, aasii uqallautivlugich, Aniqatiit, iḷisimarusi iŋiḷġaan God-im piksraqtaaġiŋagaaŋa akunnavsiññiñ, alġaqsruitquvluŋa tusaayugaaġiksuanik Jew-guŋitchuanun, tusaalutiŋ ukpiliquvlugich.

⁸ Aasii God iḷisimaruaq iñuich isumaŋiññik, iḷisimanaqsiŋagaa iviġaumatilaani aitchuutigivlugu Ilitqusiġiksuaq Jew-guŋitchuanun, uvaptiŋnuttauq piḷġusiġmisun.

⁹ Suli ilaa allakaaġiiksualiŋaitchuq uvaptiŋniglu iliŋiññiglu, ilaan suliqutigiŋaiqł̣ugich itqaumayumiñaiqł̣ugich piḷuutiŋich ukpiliġmata.

¹⁰ Paŋmapak aasii summan uuktuġniaqpisiuŋ God, Jew-guŋitchuat kamaksripkaġniaġlugich pitquranik nallivsaunnii maŋŋuuptali uvagullu kamagilluatapialaisaptiŋnik?

¹¹ Aglaan ukpiqtugut uvagut annaurrauniaqtilaaptiŋnik nagliktuutiqpaŋagun Atanġum Jesus, tainnatuttauq iliŋich annaurraummiut.

¹² Tavra iluqaġmiŋ kasimaruat nipaiñŋarut, naalaktuaqługik Barnabas-lu Paul-lu quliaqtuaqtillugik qanutchisigun aliuġnaqtuatigun ukpiġnaqsiḷiġutitigun God-im savaaŋigun ilimikkun akunġanni Jew-guŋitchuat.

¹³ Tavra uqaaniŋmata, James uqallaŋaruq, Aniqatiit, naalaġnisiŋa.

¹⁴ Simon quliaqtuaŋaruq qanuq God-mun ukpiqtitqaaġnivḷugich Jew-guŋitchuat, ilaaguaqsisaqłuni akunġanniñ iñuksramiñik.

¹⁵ Aasii taamna uqaluŋisa uqaqtiŋisa God-im atiqatigiŋagaat, aglausimarut Bible-ni uqaluŋi inna,

¹⁶ “Aquatigun taipkua taimani piŋaruat, uvaŋa God-auruaŋaa utiġniaqtuŋa ikayuġiaġlugich David kiŋuniŋi. David umialguniŋa akiiḷiŋagaluaqtillugu, kiŋuniŋa umialliutiniaġiga,

¹⁷ Iñuich iluqaġmiŋ ivaqłiayumiñaqsiḷugich Ataniġmik, iluqaġmiŋ tamatkua ququaŋakkatka nunauruaniñ uvaŋa iñugisukługich.

¹⁸ Tainna Ataniq uqaqtuq, iḷitchuġipkairuaq tamatkuniŋa iŋiḷġaan.”

¹⁹ Aasiuvva sivunniutiga, uvagut iḷaksiaŋaiḷḷavut tamatkua Jew-guŋitchuat mumiksuat God-mun.

²⁰ Aglaan tuyugaksraġigivut uqautilugich niġitquŋiḷḷugich niqinik ilaaguaqtauruanik iñuuraqpaŋnun, allatuquŋiḷḷugiḷḷu, niġitquŋiḷḷugiḷḷu niġrutinik auŋich maqiŋaitchuanik, auktuquŋiḷḷugiḷḷu.

²¹ Qanuq pitqurat qaisauruat Moses-kun taiguaġuugaich qaŋapak Jew-guruat aŋaiyyuvianni Savaisuaġmata, uqaluŋiḷu alġaqsruutauvlutiŋ nunaaqqipayaani.

Tuyuutit Jew-guŋitchuanun Ukpiqtuanun

²² Tavra tiliraunikun iḷitchitqurat umialiŋnallu iluqaġmiglu aŋaiyyuliqiruat sivunniŋarut piksraġukłutiŋ iñuŋnik iḷamiŋnik, aasii tiliḷugich Antioch-mun piqatigilugik Paul-lu Barnabas-lu. Tavra piksraqtaaġiŋagaich Judas-lu taggisiqaqtuaq Barsabbas-mik, Silas-lu, iññuk isumakkusiaqaġluataqtuak aniqatiniñ.

²³ Ukuniŋa tuyuutinik tuyuŋarut. Aniqatisi, iluqatiŋ tiliraunikun iḷitchitqurat, umialiŋnallu, tuyuqtut paġlanmiŋnik iluqaiññun aniqatinun Jew-guŋitchuanun, iñuuruanun Antioch-mi Syria-miḷu Cylicia-miḷu.

²⁴ Tusaaŋarugut iñuich iḷaŋiññun, uvaptiŋniñ aullaqtuanun, nalupqitchaktinnivḷusi uqaluanun, uvaptiŋnun qaitchiŋaitkaluaqtillutiŋ tainna pitqutinik.

²⁵ Aasiuvva kasimaŋarugut atautchimi, aasii iluqata atisivḷuta piksraŋarugut aŋutinik, aasii aullaqtillugich ilivsiññun, piqatigilugik piviuttaġikkavut Barnabas-lu Paul-lu,

²⁶ iññuk anayanniuqtitchiŋaruak iñuggunmiŋnik savautivlugu Ataniqput Jesus Christ.

²⁷ Tavraasii tiliŋagivut Judas-lu Silas-lu, inmiŋnik uqautiniaġmigaasi tainnatuttauq tuyuutiptiktun.

²⁸ Qanuq Ilitqusiġiksuam uqallautiŋagaatigut, uvaguttauq aasii iviġaumagivlugu aitchuġuŋił̣ł̣usi pitquravsaanik siġḷiġnaqtuanik kamaginiaqtuni, ukuniŋałhiñaq piraksriġivsi,

²⁹ ilivsi niġiñasi niqinik ilaaguaqtauruanik iñuuraqpaŋnun, auktuġnasiḷu, suli niġiñasi niġrutinik auŋich makinŋaitchuanik, allatuġnasiḷu. Ilivsiññik qaunagiguvsi taapkunaŋŋa piḷḷuataġniaqtusi. Kutpaiġivsi.

³⁰ Tavra aullaqtitaukamiŋ Antioch-muŋarut, aasii katitanikamisigik ukpiqtuat atautchimun, qaiñŋagaich tuyuutit.

³¹ Aasii taiguaganiŋmatigik, quviasuŋarut qapiŋaisaaġusiamikkun.

³² Tavra Judas-lu Silas-lu, iliŋiktauq uqaqtauvlutiŋ God-mun, uqautiŋagaich aniqatit sivisuruamik qapiŋaisaaqługich, suaŋasiḷaaqługiḷḷu ukpiġutaatigun.

³³ Tavra tavraniisugruaniŋmaŋnik, aullaqtinŋagaich tutqiunmi aniqatit taamapkunuŋa tiliriŋiññun.

³⁴ Aglaan Silas sivunniŋaruq tavraniitchukłuni.

³⁵ Tavra Paul-lu Barnabas-lu Antioch-miinŋaruk, iḷisaurrivḷutik piqatigivlugich allat iñugiaktuat alġaqsruutigiŋagaat Atanġum uqalua.

Paul-lu Barnabas-lu Piqatigiiŋaiqsuk

³⁶ Uvliuganikamiŋ, Paul uqallaŋaruq Barnabas-mun, Utaqqiḷavuk takulugich aniqatiit iniqpapayaani alġaqsruivigiŋakkaptiŋni uqaluanik Atanġum, aasii iḷitchuġilugich qanuqtilaaŋannik.

³⁷ Tavra Barnabas piqatigisuaqsiŋagaa John Mark maliquvlutik.

³⁸ Paul isumaniqsuġli iłuałhaaġasugalugu maliŋitpatik, utiqsaŋamman inmiŋniñ Pamphylia-mi naatkaluaqtinnagu alġaqsruiñiqtiŋ.

³⁹ Tavra qapiqtaiḷirrapiaŋaruk avanmun isummatillaamiŋnik piqatigiiŋaiqsaallaġmiŋ, Barnabas-li piqasiutiŋagaa Mark, aasii tiŋinnaaqłutiŋ Cyprus-mun.

⁴⁰ Paul-li piksraqtaaġiŋagaa Silas aasii aullaqłutiŋ, aŋaiyyutiqqaaqtillutiŋ aniqatinun, God-mun qaunagitquvlugik.

⁴¹ Aasii iliŋik iglauŋaruk Syria-kun Cilicia-kullu, aasii Paul suaŋasiḷiŋagai aŋaiyyuliqiruat ukpiġutiŋich.