Acts 14 - Iñupiatun Mumiksat Uqalugiksuat

Iconium-mi

¹ Tainnatun suli piŋammiuq Iconium-mi. Paul-lu Barnabas-lu Jew-guruat aŋaiyyuviannun aŋaiyyuliaŋaruk, aasii uqaurrivḷutik iñuŋnik ukpillasivḷugich iñugiapiaġataqtuat Jew-guruallu Jew-guŋitchuallu.

² Aglaan ukpiŋitchuat Jew-guruat piallaktinŋagaich Jew-guŋitchuat, suli isumanŋutchautiqallasivḷugich aniqatiinun.

³ Tavra iliŋik nayuutiŋaruk sivisuruamik. Alġaqsruutigiŋagaak Ataniq iqsisaił̣ł̣utiŋ, ukpiġnaqsiḷiġiruaq uqaluŋmiŋnik annautikun, iḷumun itilaaŋanik suaŋŋasiqługik aliuġnaqtuanik piyumiñaqsivḷugik.

⁴ Tavra iñuŋi iniqpaum malġuigunŋarut, iḷaŋich iḷaalliutivlutiŋ Jew-guruanun, aasiiḷi iḷaŋich tiliraunikun iḷitchitquranun.

⁵ Tavra qanuqsaġummanmik aŋalatchisaġmata iluqatiŋ Jew-guŋitchuallu Jew-guruallu, piqatigivlugich umialiŋnatiŋ, sivunniŋarut piaqłuqtaġukługich tiliraunikun iḷitchitqurat uyaġaŋniglu miḷḷuuġlugich.

⁶ Tilirauruak iḷitchuġiŋagaak taamna, aasii pigruqłutik Lystra-mun Derbe-mullu, iniqpaaŋnun Lycaonia-miittuaŋnun, avataaŋnullu nunaaqqiñun.

⁷ Aasii tamatkunani nunaaqqiñi alġaqsruutigivlugu tusaayugaaġiksuaq.

Lystra-mi

⁸ Tavra Lystra-mi iñuqaġniqsuq pisualaitchuamik, pisualaiñŋaniqsuq anikamiqaŋa.

⁹ Ilaa naalaġniŋaruq Paul-mun uqaqtuamun. Aasiivsauq Paul-gum qiñipiaġataqługu, iḷitchuġivlugu ukpiġutiqaqtilaaŋa iłuaqsirauyumiñaqłuni,

¹⁰ uqallautiŋagaa nipatusivḷuni, Makittin Ilaa maksriŋaruq aasii pisuarraqsivḷuni.

¹¹ Tavrali iñusalaich tautukamirruŋ Paul-gum savaaŋa, nipiriŋ aninŋagaat uqaqłutiŋ Lycaonia-ġmiutun, Atqaqigaatigut god-ipta iḷivḷutiŋ iñuktun.

¹² Barnabas atchiŋagaat Zeus-mik, aasiiḷi Paul atchiqł̣ugu Hermes-mik pisigivlugu uqałhamaaġniŋa.

¹³ Tavra god Zeus-gum aŋaiyyuliqsiqpaŋa, aŋaiyyuviat sivuġaani iniqpaum iłłuni, qaġġirriŋaruq immuliviich aŋusalluŋiññik nautchianiglu paaqpaŋiñun, aasii ilaa iñuiḷḷu aitchuisuaqsivḷutiŋ ikipkautinik tiliraunikun iḷitchitquraŋnun.

¹⁴ Tavrali Barnabas-lu Paul-lu tusaakamitku taamna aliktuŋagaich annuġaatiŋ, aasii upaktuutivlutiŋ akunġannun iñusalaich nipimikkun,

¹⁵ Aŋutiit, summan tainna pivisi? Uvaguktauq uvva aŋutik iñugruiññaak irrusiqaqtuak ilivsisuttauq. Aasii maaniittugut alġaqsruutigisukługu tusaayugaaġiksuaq, mumiquvlusi tamatkunaŋŋa taŋiġitchuaniñ suniñ, iñuuruamun God-mun savaŋaruamun qiḷaŋmiglu nunamiglu taġiumiglu imaġikkaŋiñiglu.

¹⁶ Qaaŋianiŋaruani kiŋuniġiiñi God-im iḷatchiŋagai iñupayaurat iñuupkaqługich ilaisa sivuniġmikkun.

¹⁷ Aglaattauq inmiñik iḷisimanaqsisuummiuq nakuuruatigun savaamigun, aitchuqłusi sialuŋmik qiḷaŋmiñ niqiksraniglu nauruanik piviksrakun, niqaiḷḷisaaŋiḷḷusi quviasuquvlusi.

¹⁸ Tamatkuniŋa uqaluŋnik Barnabas-lu Paul-lu qapiqtipqauraŋagaich iñuich aitchuiñiksraŋanniñ ikipkautinik inmiŋnun.

¹⁹ Tavra Jew-guruat qaiŋarut Antioch-miñ Pysidia-miittuamiñ Iconia-miḷḷu, aasii maliksuktitchivḷutiŋ iñuŋnik, uyaġaŋnik miḷuqtuŋagaat Paul, aasii kaliksraqługu annisivlugu iniqpaŋmiñ, isumavlutiŋ tuqunivḷugu.

²⁰ Tavra iḷitchitqurat iḷḷuaġutimmanni, Paul makinŋaruq, aasii utiqłutiŋ iniqpaŋmun, aasii uvlaakumman ilaalu Barnabas-lu aullaŋaruk Derbe-mun.

Utiqtuk Antioch-mun Syria-miittuamun

²¹ Paul-lu Barnabas-lu alġaqsruiŋaruk tusaayugaaġiksuanik Derbe-mi, aasii iñugiaktuat ukpiliŋarut. Tavra utiŋaruk Lystra-mun Iconia-mullu Antioch-mullu Pysidia-miittuamun,

²² iliŋikta suaŋasiḷaaŋagaich ukpiqtuat ukpiġutiŋich, qapiŋaisaaqługich kiikaa ukpiqsimaaquvlugich God-mun, uqautivlugich inna, Uvagut nalautchiruksraupiaqtugut iñugiaktuanik iłuiḷḷiuġutinik isiġumiñaqsisugluta God-im atanniqsimavianun.

²³ Tavra aŋaiyyuliqiruallaani umialiŋnaksrallaaŋagaich, suli aŋaiyyuuqqaaqłutiŋ niġiḷaił̣ł̣utiŋ, qiññuaġutiŋagaich Ataniġmun ukpiġivigiŋakkaŋannun qaunagitquvlugich.

²⁴ Tavra Paul-lu Barnabas-lu iglauvlutik nunaaqqisigun Pysidia-mi tikiñŋaruk Pamphylia-mun.

²⁵ Tavra alġaqsruutigianikamitku tusaayugaaġiksuaq Perga-mi, aullaŋaruk Attalia-mun.

²⁶ Aasii tavraŋŋa tiŋinnaaqłutiŋ utiŋarut Antioch-mun aullaġataġviŋmiŋnun. Tavraŋŋa aullaŋaruak ukpiqtuat aŋaiyyutianiŋmatik God-mun qaunagitquvlugik. Tavrani naatchiŋaruk iglaukkaġmiŋnik.

²⁷ Aasii tikiññamik Antioch-mun, katinŋagaich aŋaiyyuliqiruat atautchimun, aasii quliaqtuaġutivlugich iluqaiññik God-im ikayuqługik piramikkun, qanuġlu God-mun ukpiġumiñaqsipkaqtilaaŋannik Jew-guŋitchuat.

²⁸ Tavra iliŋik nayuutiksraaġiŋaruk piqatigivlugich ukpiqtuat.