Acts 12 - Iñupiatun Mumiksat Uqalugiksuat

Ukpiqtuat Nagliksaaqtitauvsaaqtut

¹ Tavraptauq tainnaiḷivalliġman umialgum Herod nagliksaaqtirraqsiŋagai iḷaŋich aŋaiyyuliqiruat.

² Ilaan tuqutinŋagaa savikpaŋmik James aniqataa John.

³ Aasii iḷitchuġikami iviġagniqamigich Jews nagliksaaqtitchivsaaŋaruq, aasii Peter tigutaaqtiłługu. Taamna piŋaruq uvluŋiñi itqautim Qulaurrusiqiviŋmun.

⁴ Tiguanikamirruŋ Peter iḷiŋagaat tigutaaġviŋmun, aasii aitchuutigivlugu qaunagitquvlugu akimiaq atautchimun aŋuyaktinun. Herod sivunniŋaruq isivġiġukługu Peter takkuanni Jew-guruat Qulaurrusiqianikpata.

⁵ Tavra Peter tigutaaġviŋmiinŋaruq, aglaattauq aŋaiyyuliqiruat aŋaiyyutiŋammigaat God-mun qapiŋaił̣ł̣utiŋ.

Peter Annirrauruq Tigutaaġviŋmiñ

⁶ Taavrumani unnuami Herod annisiyumaalliġmagu Peter uvluqpan iñuŋnun, Peter siñiŋaruq akunġaŋni malġuk aŋuyaktik, pituqaqłuni malġuiñik kalimñanik, aasii munaqsrich munaqsriŋarut tigutaaġvium paaqpaŋani.

⁷ Tavraŋŋatchiaq isaġulga Atanġum makinŋaruq tavruŋa, suli qaummaq qaummaġiksiŋaruq tigutaaġviŋmi, aasii isaġulgum saqiñŋagaa Peter tuiqqaŋagun, aasii itiqsaqługu, uqallakłuni, Makittin qilamik. Suli tavrauvvaa kalimñat kataŋarut tayaġniŋiñiñ.

⁸ Tavra isaġulgum uqallautiŋagaa, Tavsiaġiksaaġiñ aluġusiġḷutillu. Aasii tainna Peter piŋaruq. Isaġulik uqallavsaaŋaruq, Uligaaġiñ, aasii maligluŋa.

⁹ Tavra Peter-m maliŋagaa tigutaaġviŋmiñ, aglaan iḷisimaŋaitchuq taamna savaaġikkaŋa isaġulgum iḷumun itilaaŋanik, aglaan isumaŋaruq siññaktuġasugaluni.

¹⁰ Tavra qaaŋianikamisigik sivulliigḷu tugliŋiḷḷu munaqsrich, tikiñŋaruk savił̣hamun upkuaqpaŋmun, anisaġiamun iniqpaŋmun. Taamna upkuaqpak aŋmaŋaruq inmisun, aasii aniŋaruk. Tavraasii pisuaŋaruk apqutitigun, aasii tavraŋŋatchiaq isaġulgum qimaŋagaa Peter.

¹¹ Tavra Peter qaurimmaġiksiŋaruq aasii uqallakłuni, Paŋmapak nalupqisuŋaiqsuŋa Atanġum tiliŋagaa isaġulini, aasii annautivluŋa Herod-gum suaŋŋataaniñ, suli iluqaiññiñ Jew-guruat niġiukkutaanniñ uvapkun.

¹² Isumalaallakkaluaqami aullaŋaruq igluanun Mary-m, aakaŋata John Mark. Tavrani iñugiaktuat kasimaŋarut atautchimi aŋaiyyuvlutiŋ.

¹³ Tavra Peter tigluktuġman siḷataani upkuam, niviaqsiaq atiqaqtuaq Rhoda-mik kiuriyyaŋaruq.

¹⁴ Iḷisaġikamiuŋ Peter-m nipaa, quviatchakpaił̣ł̣uni upkuiġutigaluaġnagu aqpamik isiŋaruq, aasii uqallautivlugich Peter makitanivḷugu paam siḷataani.

¹⁵ Ilaisa uqallautiŋagaat, Kinnaġuqtutin. Aasii ilaa qapiŋaiñŋaruq iḷumun innivḷugu. Ilaisa kiulgitkaat, Isaġulik qaŋma qaunaksriŋa piuq.

¹⁶ Tavra Peter tigluktuqtuiññaŋaruq. Kiisaimmaa upkuiġutivaat, aasii tautukkamirruŋ niġiiḷḷaqtauŋarut.

¹⁷ Tavra urriqavluni argaŋmiñik nipaiquŋagai, aasii quliaqtuaġutiŋagai qanuq Ataniġmun annisisilaamiñik tigutaaġviŋmiñ. Tavra uqallaŋaruq, Quliaqtuaġiyumagiksi taamna James-mun, aniqatiinullu. Tavraniasii ilaa aullaŋaruq allamun inimun.

¹⁸ Tavra uvluġmagu piallapiaġataŋarut aŋuyaktit qanuqtilaaŋagun Peter-m.

¹⁹ Tavra Herod piraksriiŋaruq ivaqłiatquvlugich Peter-mik, aglaan paqilaiñŋagaat. Tavra ilaan apiqsruqtuqtitqaaqługich munaqsrich, piraksriiŋaruq tuqutquvlugich. Taamna pianiŋman Herod aullaŋaruq Judea-miñ, aasii Caesarea-miitkaqsivḷuni.

Herod Tuquruq

²⁰ Tavra Herod qinnautipiaġataŋagai iñuich Tyre-miḷu Sidon-miḷu ittuat. Aasii ilaisa ullaŋagaat Herod piqatigiikł̣utiŋ. Iḷaaluksraqtaaġiqqaaqługu Blastus, Umialgum igluqpaŋata qaunaksriŋa, ullaŋagaat Herod apiqsrisukłutiŋ aŋuyautairrunmik, qanuq ilaisa nunaŋat niqiksraqtuġviqaqłuni umialgum nunaŋaniñ.

²¹ Nalunaiqsauŋaruami uvlumi Herod atiŋagai umialguniġmigun annuġaani, aquvinŋaruq umialgum aquppiutaŋiññun, aasii uqaqłuni ilaiññun.

²² Tavra iñuich nipaallaŋarut, Nipaa God-im. Iñugruiññaq uqaŋitchuq.

²³ Tavraŋŋatchiaq isaġulgata Atanġum tuqupkaŋagaa Herod, qanuq kamanaqsiḷiŋaitkaa God. Tavra ilaa qupilġunikłuni iḷumiñi tuquŋaruq.

²⁴ Aglaan God-im uqalua nauŋaruq, siamiłłuniḷu.

²⁵ Tavra Barnabas-lu Saul-lu naatchikamiŋ piraksraunmiŋnik, utiŋaruk Jerusalem-miñ, piqatigivlugu John Mark.