Acts 11 - Iñupiatun Mumiksat Uqalugiksuat

Peter-m Quliaqtuaġutigai Piruanik Aŋaiyyuliqiruat Jerusalem-mi

¹ Tavra tiliraunikun iḷitchitqurat, aniqatiillu iluqaani Judea-miittuat, tusaaŋarut Jew-guŋitchuattauq ukpiliġñivḷugich uqaluanik God-im.

² Tavra Peter Jerusalem-muŋman, pisaaŋaŋagaat Jew-guruat isumaqaqtuat Jew-guŋitchuat ukpiqtuat nalunaiñŋutchigaksrauvlugich timimikkun,

³ uqaqłutiŋ, Summan tuyuġmiaġuŋavich Jew-guŋitchuat aimaaġvianni niġiqatigivlugiḷḷu?

⁴ Tavra Peter-m quliaqtuaġutiŋagai supayauranik piruanik isuaniñqaŋa.

⁵ Iniqpaŋmi Joppa-mi aŋaiyyuuŋaruŋa, aasii qiñiqtuuraaqłuŋa. Atqaqtuamik ukił̣haaqpaktun niŋitauŋaruq qiḷaŋmiñ sisamatigun kaŋiġalluŋisigun, aasii nutqaqłuni saniqqamnun.

⁶ Takunnaakkiutikapku tautuŋaruŋa niġrutinik niġrułłuŋniglu paamġuqtuaniglu tiŋmianiglu.

⁷ Aasii tusaaŋaruŋa nipimik uqallaktuamik uvamnun, Peter makittin. Tuqutchiḷutin niġġiiñ.

⁸ Tavra kiuŋagiga, Naagga Ataniiq, qanuq suuramikunnii salumaitchuamik niqimik pitqurat niġitquŋisaŋannik uqummirriŋaitchuŋa.

⁹ Tavra nipi uqallatqiŋaruq qiḷaŋmiñ, Suna God-im salummaanikkaŋa, isummatiginagu salumaitchuagulugu.

¹⁰ Taamna piŋaruq piŋasuiqsuaqłuni, aasii nuqitautqikł̣uni qiḷaŋmun.

¹¹ Tavrauvvaa aŋutit piŋasut tikiñŋarut iglumun irvimñun, tilirauruat uvamnun Caesarea-miñ.

¹² Tavra Ilitqusiġiksuam uqallautiŋagaaŋa aullaqatigitquvlugich taqiŋaŋaiġḷuŋa. Ukua uvva itchaksrat aniqatiit aullaqasiŋagaanŋa Caesarea-mun, aasii iluqata isiqłuta igluanun Cornelius.

¹³ Aasii Cornelius quliaqtuaġutiŋagaatigut tautuŋnivḷuni isaġuliŋmik makitaruamik iglumiñi suli uqallautivlugu, Tilisiḷutin Joppa-mun qaitquuŋ Simon taiguutiqaqtuaq Peter-mik.

¹⁴ Ilaan quliaqtuaġutiniaġaatin uqaluŋmik annautigiyumiñakkaġnik, iliviḷḷu igluqatitillu.

¹⁵ Uqaqsaġataaqsimmiuŋalu Ilitqusiġiksuam atqaġvigiŋagai uvaptiktupiaġataq isagutisaami.

¹⁶ Aasii itqaŋagitka uqaluŋi Atanġum uqallaŋaruaq, John paptaiġutiqaŋaruq imiġmik, aglaan Ilitqusiġiksuaq iḷirauniaqtuq iḷuvsiññun.

¹⁷ Tavraasii nalupqinaitchuq God-im aitchuŋammigai Jew-guŋitchuat Ilitqusiġiksuamik aitchuunmisun uvaptiŋnun ukpiqtuaġuqapta Ataniġmun Jesus Christ-mun, Suuvik uvaŋa piñaiḷutaġumiñaġlugu God?

¹⁸ Taamna tusaakamirruŋ pisaaŋaŋaiŋagaat, aasii nanġaqługu God uqaqłutiŋ, Tavraptauq Jew-guŋitchuat God-im isumalitqigviksraqaqtinŋagai iñuutquvlugich isuitchuamun.

Aŋaiyyuliqiruat Antioch-mi

¹⁹ Tavra ukpiqtuat siamitauŋarut pisigivlugu nagliksaaqtitauniq isagutiruaq Stephen-qaŋa tuqutaumman. Iḷaŋich aullaŋarut ayuuqtigivlutiŋ Phoenicia-mun Cyprus-mullu Antioch-mullu, quliaqtuaġivlugich tusaayugaaġiksuat Jew-nun kisiiññun.

²⁰ Aglaattauq iḷaŋich ukpiqtuat aŋutit Cyprus-miñ Cyrene-miḷḷu Antioch-muŋarut, aasii quliaqtuaġutivlugich Jew-guŋitchuat, alġaqsruutigivlugich tusaayugaaġiksuat Atanikun Jesus-kun.

²¹ Suli Atanġum suaŋŋataata ikayuŋagai, suli iñugiapiaġataqtuat ukpiliŋarut Ataniġmun.

²² Tusaayugaat taavrumuuna tusaaŋagaich aŋaiyyuliqiruat Jerusalem-mi, aasii tiliŋagaat Barnabas Antioch-mun.

²³ Tikiññami iḷitchuġikami God-im quviasaaġniġmagich iñuich, ilaa quyatchaŋaruq, suli qapiŋaisaaŋagai iluqaisa ukpiġnaqtuagutquvlugich iḷumullu illutiŋ Ataniġmun iḷumiŋniñ.

²⁴ Qanuq Barnabas iñulluatauŋaruq, aŋalatiłłuni Ilitqusiġiksuamun, ukpiqtuagupiaqłuniḷu. Suli iñugiaktuat iñuich ukpiliqsitauŋarut Ataniġmun.

²⁵ Tavraasii Barnabas aullaŋaruq Tarsus-mun ivaġiaqługu Saul.

²⁶ Aasii paqitanikamiuŋ, ilaan qaġġisiŋagaa Antioch-mun. Tavra ukiuq naalġataqługu iliŋikta piqatigiŋagaich aŋaiyyuliqiruat, iḷisautivlugiḷḷu iñusalaich. Aasii Antioch-mi ukpiqtuat tairauqqaaŋarut Christ-miunik.

²⁷ Tavra tamatkunani uvluni iḷaŋich uqaqtiŋisa God-im ullautiŋarut Jerusalem-miñ Antioch-mun.

²⁸ Aasii iḷaŋat atiqaqtuaq Agabus-mik makiłłuni aŋalałługu Ilitqusiġiksuam uqaŋaruq piyumaaqtuamik kamanaqtuaq kaaksiunaq piñiaġnivḷugu nunami iluqaani. Taamna nalaunŋaruq Claudius umialgumman Rome-mi.

²⁹ Tavra ukpiqtuat sivunniiŋarut iñupayaaq aitchuiyumiñaqtilaamisun tuyuquvlugu ikayuutiksranik aniqatiinun iñuuruanun Judea-mi.

³⁰ Aasii tainna piŋarut, tuyuġivlugich maniich aŋaiyyuliqiruat umialiŋnaŋiññun Barnabas-kullu Saul-kullu.