Acts 1 - Iñupiatun Mumiksat Uqalugiksuat

Savaaŋich Tilirauruat

¹ Nakuaġiramnun Theophilus-mun. Sivulliġñi makpiġaani uqausiġiŋagitka iluqaisa Jesus savaaġikkaŋi iḷisaurrutiŋiḷu,

² uvlumun-aglaan mayuurrauvianun qiḷaŋmun. Mayuurrauŋaiñŋaan Ilitqusiġiksuam suaŋŋasiŋagaa piraksriiyumiñaqsivḷugu iñuŋnun piksraqtaaġiŋaraŋiñun tilisukługich.

³ Malġukipiani uvluni tuqutauqqaaqłuni tautuktitqataŋaruq inmiñik ilaiññun iñugiaktuani, nalupqinaiqł̣ugu iñuutilaani. Ilaisa tautukkayuŋagaat, uqaqatigivlugiḷḷu ilaata God-im atanniqsimmataanik iñuŋnun.

⁴ Katinmata atautchimun Jesus piraksriŋagai uumiŋa, Jerusalem-miñ aullaġnasi, aglaan utaqqiyumagiksi aitchuutiksraun Aapama unniqsuqłiisaa, uqautigiŋakkaġa ilivsiññun.

⁵ Qanuq John paptaiġutiqaŋaruq imiġmik, aglaan uvva iñukitchuat uvlut pianikpata, Ilitqusiġiksuaq iḷuvsiññun iḷiñiaġiga.

Jesus Mayuurrauruq Qiḷaŋmun

⁶ Tavra iḷitchitqurat katinnamiŋ piqatigivlugu Jesus apiġiŋagaat, Ataniiq, paŋmapak isagutipkaġniaqpiuŋ Israel-guruat umialiqaġumiñaqsiḷugich inmiŋni taimanisun?

⁷ Jesus kiuŋagai, Ilivsi iḷisimaraksrautigiŋitkisi uvlullu piviksrallu Aapam inillaŋaraŋi ilaan ataniġnaqunmigun.

⁸ Aglaan Ilitqusiġiksuam qaigumi ilivsiññun suaŋŋasiġñiaġaasi quliaqtuaġumiñaqsiḷusi tusaayugaaġiksuanik uvapkun Jerusalem-mi, iluqaaniḷu Judea-mi, Samaria-miḷu, uŋasigñiqsraŋiññullu nunam.

⁹ Tavra taapkuniŋa uqautianikkamigich takunnaqtillugich, ilaa mayuurrauŋaruq qiḷaŋmun, suli nuvuyam tautugnaiqsinŋagaa ilaiññiñ.

¹⁰ Tavra takunnaġataviksillugich qiḷaum tuŋaanun aullaġvianun, iññuk malġuk makitaaniŋaniqsuk saniġaanni qatiqtuanik annuġaaqaqtuak,

¹¹ aasii uqallakłutik, Galilee-ġmiuguruasii, summan makitavisi takunnaqłusi qiḷaŋmun? Taamna Jesus mayuurrauruaq ilivsiññiñ qiḷaŋmun, qaiñiaqtuq tainnatun suli tautuusivsisun aullaġman qiḷaŋmun.

Judas Simmausiġaat

¹² Tavra iḷitchitqurat utiŋarut Jerusalem-mun iġġiuramiñ atiqaqtuamiñ Olives, half-a-mile-tun uŋasiksigiruaq iniqpaŋmiñ.

¹³ Tavra tikiññamiŋ Jerusalem-mun mayuŋarut qiḷaguamun inigikkamiŋnun, Peter-lu John-lu James-lu Andrew-lu Philip-lu Thomas-lu Bartholomew-lu Matthew-lu James-lu iġñiŋa Alphaeus, Simon-lu Zealot-guruaq, Judas-lu iġñiŋa James.

¹⁴ Taapkua iluqaġmiŋ katitkayuŋarut aŋaiyyuqatigiikł̣utiŋ akulaił̣ł̣ugu, piqatigivlugich aġnat, Mary-ḷu aakaŋa Jesus, aniqatiiŋiḷu.

¹⁵ Uvlut iñukitchuat pianiŋmata kasimaŋarut ukpiqtuat iñugiaktilaaqaqpalliqł̣utiŋ 120, aasii Peter makinŋaruq uqaġukłuni,

¹⁶ Aniqatiit, Bible uqaluŋich nalauttuksrauŋarut Ilitqusiġiksuam uqaqtinmagu David, sivuniġivlugu Judas, aullarriruaq taapkunuŋa tigutaaqsiruanik Jesus-mik.

¹⁷ Qanuq taamna Judas iḷagiŋagikput, suli aitchuusiaqaqłuni, iḷauvluni taavrumani savaaptiŋni.

¹⁸ (Tavra taamna iñuk tauqsiŋaruq nunamik, akiḷiusiaŋanik piḷuusiqiaqpaŋmi. Tavrani ilaa tuquŋaruq katakłuni, niaqquni sivulliġivlugu, aasii qaaqłuni, iluqaġmiŋ ilġaviŋi pikiaŋarut.

¹⁹ Suli taamna tusaaŋagaat iluqaġmiŋ iñuich Jerusalem-miittuat, taamna nuna atchiŋagaat uqausiġmiŋni Akeldama, sivuniqaqtuaq Nunaŋanik Augum.)

²⁰ Peter uqavsaaŋaruq, Qanuq aglausimaruq makpiġaaŋiñi Psalms, “Ilaan aimaaġvia iñuiġḷi, suli kialiqaa iñuuviginagu.” Aglausimammiuq-suli inna, “Ilaan savaaŋa allam piḷiuŋ.”

^21-22 Tavraasii iñuum iḷaraksraġigaatigut, tautuŋaruam, quliaqtuaġumiñaqsiŋaruavlu Ataniq Jesus aŋimman. Taamna iñuk piqatauruksrauŋaruq uvaptiŋnun iluqaani Ataniq Jesus kukiḷuŋman piqatigivluta, isagutilġataġniŋaniñ John alġaqsruimman paptaiġunmik, uvlumunaglaan Jesus mayuurraumman uvaptiŋniñ qiḷaŋmun.

²³ Tavra ilaisa nalunaiŋagaich malġuk. Joseph taggisiqaqtuaq Barsabbas-mik atiqaġmiruaq Justus-mik, Matthias-lu.

²⁴ Tavra iliŋich aŋaiyyuŋarut uqaqłutiŋ, Ataniiq, iḷisimagitin uummatiŋich iñupayaat. Aasii Ataniiq, nalunaiġuŋ nalliak ukuak piksraqtaaġitilaaŋanik iliŋnun,

²⁵ inaŋiutautquvlugu Judas-mun uumani savaurriñiġmi, tiliraunikun qimakkaŋagun, aullaqłuni ilaan iniksraunmiñun.

²⁶ Tavra tiguullaivḷutiŋ atiġnik piksraqtaaġiŋagaat Matthias. Tavra Matthias iḷḷatiŋagaat qulit atautchimun tilirauruanun.