3 John 1 - Iñupiatun Mumiksat Uqalugiksuat

¹ John umialiŋnauruaq tuyuqtuq ukuniŋa avilaitqatipiamnun Gaius-mun, piviuttaġipiaġatakkamnun.

² Piviuttaġirauruatiin, aŋaiyyutigigiga sunapayaaq piḷḷuataquvlugu ilipkun naŋirrutaitquyumavlutillu, iḷisimavluŋa nalaunŋatilaaġnik ilitqusiġñi sivuġaani God-im.

³ Quviasukpaŋaruŋa iḷaŋich aniqatiit tikitchuat quliaqtuaġutimmanŋa qanutun ukpiġnaqtilaaġnik ukpiġikapku God-im iḷumun ittuaŋa, suli iñuunivḷutin tuvraqługu ilaan iḷumun ittuaŋa.

⁴ Kamanałhaaqtuamik quviasuutiqaġumiñaitchuŋa uumaŋŋa, tusaakapkich miqłiqtutka iñuunivḷugich tuvraqługu iḷumun ittuaq.

Gaius Nanġausiaqaqtuq

⁵ Piviuttaġirauruatiin, piḷḷuataqtutin savaurrikavich qanusipayaamik aniqatiinun, iglaakkaluanun-unnii.

⁶ Quliaqtuaġilluataŋagaat savaan piviuttaqsrivḷutin aŋaiyyuliqiruanun maani. Piḷḷuataġniaqtutin ikayuqsimaaġupkich iglaaguniŋanni ikayuġlugich iviġaumanaqtuatigun God-mun.

⁷ Qanuq iglauŋarut savautivlugu Christ aitchuusiaqaġaluaġnatiŋ qanusipayaamik ikayuusiamik ukpiŋaitchuaniñ.

⁸ Taamna pisigilugu uvagut ukpiqtuaguruaguut ikayugaksraġigaluaġivut tainnatchit iñuich, uvagut savaqatausugluta siaminniŋani God-im iḷumun ittuaŋan.

Diotrephes Demetrius-lu

⁹ Tuyuŋaruŋa naitchuanik tuyuutinik aŋaiyyuliqiruanun, aglaan Diotrephes sivulliuqtaullaturuam iliŋiññun suuramikunnii suliqutigilaitkai uqautitka.

¹⁰ Tavra qaiguma satqummiġñiaġiga suliqitilaaŋa, uqallaruaq uvapkun uqalugiitchuanik saglutigivluŋalu. Suli katchuutigisuŋaġnagu taamna, tukkuliġulaiñmigai iglaaguruat aniqatit, suli pitchaiḷiraqługich tamatkua tukkuliisukkaluaqtuat iliŋiññik, anittaqługiḷḷu aŋaiyyuviŋmiñ.

¹¹ Piviuttaġirauruatiin, tuvraġnagu iñuk pigiitchuaguruaq, aglaan nakuurualiqilutin. Iñuk nakuurualiqiruaq God-im pigigaa, iñuk pigiitchualiqiruaq naluruq God-mik

¹² Iñupayaat uqautigilluataġaat Demetrius, aasii iḷumun ittuamik uqautigigaat. Uvaŋaptauq uqaġilluataġiga, aasii iḷisimagiksi uqaluga iḷumun ittuq.

Paġlasuiqsaaġutit

¹³ Uqaluksraukkaġaluaqtuŋa iliŋnun aglaan uqautigisuŋitkitka ukunuuna tuyuutitigun,

¹⁴ qanuq tautuŋnasuaġumaaġikpiñ, aasii uqaġlunuk atautchimi.

¹⁵ Tutqiutiqaġiñ. Iluqaġmiŋ avilaitqarvich paġlagaatin. Paġlakkich avilaitqativut iluqapayauraŋisa.