2 Timothy 4 - Iñupiatun Mumiksat Uqalugiksuat

¹ Apiġipiaġikpiñ takkuaŋni God-tivlu Christ Jesus-lu isivġiiyumaaqtuam iñupayaanik iñuuruanik naagga tuquaniŋaruanik, taimanigu niptaġumi atanniqsimannigiaġluni, piraksriġikpiñ

² alġaqsruutigitquvlugu God-im uqalua ataramik. Uqautiginiapiaġlugu piviksraq nalautitkaluaqpan naagga nalautinŋaitkaluaqpan, maliksuktinniaġlugich iñuich, suakkaluaġlugich, qapiŋaisaaġlugich qapiŋaisaagaksrauruat, iḷisaurriḷutin qimmaksaliyaipiaġlutin.

³ Piviksraq qaiḷiqtuq iñuich naalaġnisuŋaiġñiaġmarruŋ nalaunŋaruaq iḷisaurrun, iñuusuglutiŋ ilaisa pisuunmikkun, aasii katitchiḷutiŋ inmiŋnun iḷisaurriksramiŋnik iḷisautitqulutiŋ sunik kisiiññik tusaasukkamiŋnik.

⁴ Suli naalaġnisunġiġñiaġaat iḷumun ittuaq aasii naalaġnisułhaaġlutiŋ unipkaanun.

⁵ Iliviḷḷiasii, aŋalalluataġiñ iliŋnik suna pigaluaqpan, igḷutuġuŋ nagliksaaġun, isumalitqiksitchiñiaġiñ iñuŋnik, taŋŋiqsimaaġuŋ iluqaan piraksriusian kivgauniġni God-mun.

⁶ Uvaŋaliasii tuqutauyasiruŋa Ataniġa pisigivlugu. Aullaġviksraġa qiḷaŋmun tikitchuq.

⁷ Aqpaliurraqtitun pisuqtilaaganiktuŋa naałługu iluqaan aqpaliurraġniq. Ukpiġutiqaaniktuŋa taŋŋianikługu iluqaan Atanġum pitqutaa uvamnun.

⁸ Tavraasii aitchuusiaġiyasigiga akiksraun akimaruam niaquġutiksrautaa, qanuq iñuuŋaruŋa nalaunŋaruakun. Atanġum nalaunŋaruam isivġiqsim aitchuutiginiaġaa uvamnun uvluani isivġiġvium. Aasii uvaŋa kisima aitchuġniaŋiñmigaaŋa niaquġunmik, aglaallu iluqaisa niġiupiaġataqtuat qaitqigñiksramiñik.

Iḷammiuġutit Uqaluich

⁹ Ullaŋniatapiaġumagiŋma qilamipayaaq.

¹⁰ Qanuq Demas, piviuttaqaqłuni mattumiŋa paŋmapak iñuuniaġutchimik, suksraaŋagaaŋa aullaqłuni Thessalonica-mun, Crescens aullaŋaruq Galatia-mun, Titus Dalmatia-mun.

¹¹ Luke-gum kisimi nayuġaaŋa. Piḷugu Mark qaġġisiyumagiñ qanuq ilaa anniqsuutaupiaġataqtuq savautikamiŋa.

¹² Tychicus aullaqtinŋagiga Ephesus-mun.

¹³ Qaiguvich saagaġumagiñ uligaaġa qimaŋakkaġa Carpus-mun Troas-miittuamun. Qaġġisiyumagitiñ makpiġaat, aglagvitka pił̣haaġlugich.

¹⁴ Alexander-m savił̣hiqirim atqunaqługu akiḷḷiḷiqsuŋagaaŋa. Atanġum paaqłiġñiaġaa savaaŋigun.

¹⁵ Nipuŋaitchumautin ilaanik, qanuq suamapiaġataqłuni akiḷḷiḷiqsuġaa uqalukput.

¹⁶ Rome-miut isivġiqsaannun sivuġaŋiutiqqaaqama iñuŋmik ikayuqtiksraiñŋaruŋa. Iluqaġmiŋ suksraaŋagaanŋa. God-mun pasitquyumaŋitkaluaġitka taavrumuuna.

¹⁷ Aglaan Atanġum nayuŋagaaŋa suaŋŋasiqł̣uŋa uqautigiyumiñaqsivḷugu iluqaan tusaayugaaġiksuaq, iluqaġmiŋ Jew-guŋitchuat tavraniittuat tusaayumiñaqsivḷugich. Suli God-im annautiŋagaaŋa tuqutauniksramniñ.

¹⁸ Suli Atanġum annautiniaġaaŋa iluqaaniñ pigiitchuamiñ, annautiluŋa qiḷaŋmiittuamun atanniqsimaviŋmiñun. Ilaa nanġaqtauli isuitchuamun taimuŋa. Amen.

Paġlasuiqsaaġutit

¹⁹ Paġlagikka Priscilla-lu Aquila-lu, igluqatiŋiḷu Onesiphorus.

²⁰ Erastus ittuq Corinth-mi, Trophimas qimaŋagiga naŋiłłuni Miletus-mun.

²¹ Pisuqtilaaqtun qaiñiatakkumautin ukiuŋaiñŋaan. Eubulus-lu Pudens-lu Linus-lu Claudia-vlu iluqaġmiglu aniqatiit paġlagaatin.

²² Atanġum itqatigilisin. God nagliktuutiqpaqaġli iluqavsiññun.