2 Timothy 3 - Iñupiatun Mumiksat Uqalugiksuat

Uvlut Aqulliich

¹ Aglaan kaŋiqsisiuŋ una, siġḷiġniuġutit iḷiñiaqtut aqulliġñi uvluni.

² Qanuq iñuich siŋñatusiñiaqtut piḷḷatusiḷutiŋ, kamasaaliġḷutiŋ, uqavigaaliġḷutiŋ, uqamaqłuurriḷiġḷutiŋ kamaksriḷḷaiġḷutiŋ aŋayuqaamiŋnik, quyyataiġḷutiŋ, pigiitchualiqilutiglu,

³ suli anayasuktuaŋaiġñiaqtut, nagliksrautaiġḷutiglu, tiġliraqłiḷiġḷutiglu, piaqłuktaliġḷutiglu, iqsiñaqsiḷutiglu, uumigiliġmiḷugu suna nakuuruaq.

⁴ Aitchuutiginnigniaqtut iḷauraamiŋnik, isumamiŋni sivunmuusuusiḷutiŋ, kamasaalipiaġataġlutiŋ, piviuttaġiłhaaliġḷugu aliasuŋisaaġun piviuttaqsriñiġmiñ God-mik.

⁵ Piraġausiġiniaġaluaġaich qanusipayaat aŋaiyyuliqinikun piraġausiuruat, God-im suaŋŋataanun allaŋŋuqtinniaġnagich iñuutchisiŋ. Piqataunak tainnatchiñun iñuŋnun.

⁶ Iñuich iḷaŋich tainnatchit pitqiksuat isiġuurut aimaaġviŋiññun iñuich aasii payarivḷugich piyaruat aġnat tutqiutaiḷḷuqtuat piḷuutitiŋ pisigivlugich, aŋalatiłłutiŋ qanusipayaanun god-taiḷaġnikun kipiġniuġutinun,

⁷ aġnat naalaġniyumaŋitchuat kimulliqaa uqaurrimiŋnun, suli iḷitchuqsriḷḷaigutiruat God-im iḷumun ittuaŋanik.

⁸ Jannes-tullu Jambres-tullu akiḷḷiḷiqsuiŋaruaktun Moses-mik, tainnatuttauq tamatkua iḷisaurriŋŋuat akiḷḷiḷiqsuġmigaat God-im iḷumun ittuaŋa, iñuich isumaqaqtuat pigiitchuanik ukpiġutiŋŋuamiglu.

⁹ Aglaan ayuupiaġumiñaitchut, qanuq iñupayaat iḷitchuġiniaġaich isumalluaġiirrutiŋich nalunaiqpata taipkuŋnatuttauq Jannes-tullu Jambres-tullu.

Aqulliich Iḷisaurrutit

¹⁰ Aglaan ilivich maliġuaŋagiñ iḷisaurrutiga, aullasiġalu, sivuniġalu iñuggunmi, ukpiġutigalu, qiñuirrutigalu, piviuttaqqutigalu, tuniqsimmatigalu,

¹¹ nagliksaaqtirrusiatkalu, iłuiḷḷiuġutitkalu. Iḷisimarutin sunik piruanik uvamnun Antioch-mi Iconium-miḷu Lystra-miḷu nagliksaaqtirrutiqpaich igḷutukkatka, aasii iḷisimammiutin Atanġum iñuuliŋagaaŋa iluqaiññiñ tamatkunaŋŋa.

¹² Iluqaġmiŋ god-tiliqilutiŋ iñuusiqaġuktuat atausiŋŋuqatigiŋavlugu Christ Jesus nagliksaaqtitauniaqtut,

¹³ tamatkuali pigiitchuat iñuich piŋŋuaqtillu iglaupkaġlugich piḷuktuamiñ piḷuksisaiññanmun, sagluqinniŋniaqtit allanik, sagluqiruallu inmiŋnik.

¹⁴ Aglaalli ilivich ukpiġituiññakkich sut iḷisausiaġiŋaratin. Iḷisimagitin iḷumun itilaaŋannik, ukpiġiyumiñaqłutalu ittutin uvagut iḷisaurriŋaruaguut iliŋnik.

¹⁵ Iḷisimammiutin miqłiqtuurauniġniñqaŋa iḷisausiaġiŋagitin God-im uqaluŋi. Taapkua uqaluich kaŋiqsipkaŋagaatin God-im annaurrisaanik ukpiġiruni Christ Jesus.

¹⁶ Qanuq iluqaisa Bible uqaluŋich God-im puttuqsrisiqaqtiłługich iñuich aglaktinŋagai, aasii uqaluich anniqsuutaurut iḷisaurriruni ilaan iḷumun ittuaŋanik, iḷitchuġipkaġniaqtuniḷu iñuich killukuaġutiŋiññik iñuutchimiŋni, natqiksruġniaqtuniḷu, suli iḷisaurriruni nalaunŋaruakun iñuuniaġusiksramik,

¹⁷ iñuk savaurriruaq God-mik itqanaitquvlugu piyumiñaġluni qanusipayaanik nakuurualiqiniġmik.