2 Timothy 2 - Iñupiatun Mumiksat Uqalugiksuat

Christ Jesus Aŋuyaktilluataŋa

¹ Ilivich aasii, iġñiiŋ, qapiŋairrutiqaġiñ savaaġni nagliktuusiaqpakun pigikkaptigun atausiŋŋuqatigikaptigu Christ Jesus.

² Uqaluich tusaaŋakkatin uvamniñ alġaqsruikama iñugiaktuanun iñuŋnun, ilivich qaaŋiqsitkich pigitqulugich iñuŋnun nalupqigiŋisaġnun iḷisaurriyumiñaqtuanun allaniktauq iñuŋnik.

³ Piqasiuttuiñ nagliksaaġniġmi pisigilugu tusaayugaaġiksuaq aŋuyaktigiksuaŋatun Christ Jesus.

⁴ Aŋuyakti aŋuyaktaullaġmi aptatiqalaitchuq aŋuyaktauŋitchuam savaaŋiñik, qanuq ilaan iviġagukkaa aŋuyaktini atanaurani.

⁵ Aqpaliurraqti aqpaliurraqtuaq akiññalaitchuq isagunŋaŋisuaqami nalaullugich pitqurriutit aqpaliurraġniġmi.

⁶ Nautchiriqiri siġḷiqiruaq savakami piqaqqaaqtuksrauruq sivulliġñik nauruanik.

⁷ Isumalaaġutigikkich sut uqautigikkatka uuktuutit, qanuq Atanġum kaŋiqsipkaġniaġaatin taapkunuuna uqautigikkapkun.

⁸ Itqaumauŋ Jesus Christ, aŋipkaqtauŋaruaq tuqqunmiñ, maŋŋuqaqtuaq David-miñ, alġaqsruutiptun tusaayugaaġiksuanik.

⁹ Alġaqsruutigikkaġa tusaayugaaġiksuaq pisigivlugu nagliksaaqtuŋa, tigutaaqtauruŋaunnii pitquranik navguiritun. Aglaan God-im uqalua piñaiḷutaitchuq.

¹⁰ Taamna pisigivlugu igḷutuġitka supayaat pisigivlugich God-im iñuksraqtaaŋi, iliŋitchauq annaurrautquvlugich Christ Jesus-kun, iñuutquvlugiḷḷu qiḷaŋmi isuitchuamun.

¹¹ Una uqaluk nalupqinaitchuq. “Uvagut tuquqatigiŋaguptigu Christ, iñuuqatiginiaġmigikputsuli.

¹² Igḷutuġuptigik nagliksaaqtirrusiat umialguqatiginiaġikput ilaa. Piiḷaaġiguptiŋni, ilaattauq piiḷaaġiniaġmigaatigut.

¹³ Ukpiġutaiġaluaġupta, ilaa ukpiġnaiḷaitchuk. Ilaan allaŋŋuġumiñaitkaa inmiñi irrusiñi.”

Iviġaumanaqtuaq Savakti

¹⁴ Itqaqtittaġukkich iñuktin taavrumiŋa, suli kiliglugich sivuġaani Atanġum pitchaiḷitqulugich uqaluŋnik qanaaġutiksrauruanik. Anniqsuutaulaitchut, aglaan maqutchisuurut iñuŋnik naalaġniruanik.

¹⁵ Pisuqtilaaġiñ iviġagluataġniapiaġlugu God iñuktun kanŋusuutiqaġumiñaitchuatun savaamiñik, nalaunŋaruakun iḷisaurriḷutin God-im uqaluŋiñik iḷumun ittuanik.

¹⁶ Uqavaaqatiginagich god-taitchuat asiḷiqqutikullu uqavaaqtuat. Qanuq uŋusiññaġuugaich iñuich god-taiḷaġniġmun,

¹⁷ iḷisaurrutiŋich ittut kiḷḷiġruanilġiñaqtuatun uviñik nuŋuuqtuaqługu. Malġuk tainnatchik iññuk iḷisaurrik Hymenaeus-lu Philetus-lu.

¹⁸ Taapkuak iññuk ukpiġiŋaiŋagaak iḷumun ittuaq, aasii ukpiqtuat iḷaŋich ukpiġutaiqsiłługich, iḷumun inŋitchuamik iḷisaurrivḷutik aŋŋisikput qaaŋianignivḷugu.

¹⁹ Aglaan God-im iḷumun ittuaŋa allaŋŋulaitchuq, iłłuni aulayaitchuatun maŋŋuliutitun aulayyaŋnaġumiñaitchuatun. Aasii ukua malġuich uqaluich God-im aglaaŋi aglagivlugich, “Atanġum iḷisimagai ilaan iñuŋni,” suli, “Kiñaliqaa Atanġum iñugikkaŋa piḷuusiqiugaŋaiġḷi.”

²⁰ Suġalliruam igluqpakpaŋani qanusiḷimaat utkusiich pugguttallu ittut. Tamatkua utkutchiagurut puggutchiagurullu iḷaŋich maniŋñiñ qatiqtuaniñ suli iḷaŋich kaviqsuaniñ maniŋñiñ, iḷaŋitchauq qiruŋniñ suli iḷaŋich qikumiñ. Akisuruat utkusiich puggutallu atuqługich tuyuġmiaqaqamiŋ kisianik aasii akiiññiqsrat ataramik atuqługich iḷaŋich suaqłuqaġvigivlugich.

²¹ Tainnatulli ilivsi qanupayaaq piḷuusiqilaitkuvsi inniaqtusi akisuruatun utkusiksun puggutatullu ilaaguaqtauruatun atugaksrauvlugu kisianun Christ pitqukkaŋanun, itqanaitchuatun atuggaksrauvluni qanusipayaamun savaaġiksuamun.

²² Tavra kamaginagich pigiitchuat pisuguutiŋi nutaġaunġum, aglaan sivuniqaġlutin iłuaqtualiqiniġmik ukpiġunmik, piviuttaqqunmik, tutqiunmiglu, piqatigilugich tamatkua piḷuutaitchuakun ququularuat Ataniġmun ikayuquvlutiŋ.

²³ Iḷaksianagich naluvlutiŋ isumalluaġiirrutikun qapiqtaiḷisuuruat, iḷisimarutin isagutipkaġuugaich qanaaġutit.

²⁴ Atanġum kivgaŋa qanaayuktuksrauŋitchuq, suli piaqłuktautaitchuksrauruq iñupayaamun, nakuuluni qimmaksaliyaiḷḷuniḷu iḷisaurriḷuni

²⁵ natqiksruġlugich pikałaktautairrutikun akiḷḷiḷiqsuutiruat God-mun, iḷaanni God-im isumalitqiksitaupkaqpiaġai suli iḷitchuġipkaġlugich iḷumun ittuamik.

²⁶ Aasii qauriruatun piñiaqtut annakkumiñaqsiḷutiŋ nigatchiaŋaniñ Tuunġaum kamaksripkaiyugaŋaruam iliŋiññik pisuunmiñik.