2 Samuel 8 - Iñupiatun Mumiksat Uqalugiksuat

David-gum Aŋuyaktuani Akimaniŋich

¹ Qakuguiḷimman Umialigum David-gum aŋuyavsaalgitkaich Philistia-ġmiut, akiiḷivḷugich, nutqaqtiłługu aŋalataġiraŋat nuna.

² Aasii suli akiiḷimmivḷugich Moab-miut. Tigutaaqtat nallaqtinŋagaich nunamun aasii malġuk piŋasuuruani iñugni tuqułługich. Tavraasii Moab-miut ilaan pigiliutiŋagaich suli akiḷiipkaliqł̣ugich akiḷiqsuaksranik.

³ Aasii suli akiiḷimmivḷugu umialiŋa Syria-mi ini Zobah, Hadadezer iġñiŋa Rehob-gum, iglaupkaqługu nunannagiaqhuni takpaanitchiani Euphrates River-m.

⁴ David piññaktaaqaŋaruq 1,700-tun kakaktiġaqtuaniñ aŋuyaktiŋiññiñ suli 20,000-tun pisuaqtuanik aŋuyaktiniñ. Iḷakuvluni tuttuqpagnik tallimakipiat (100) aksraktuurat aasii qilluutaliŋagaich piŋitchaŋich.

⁵ Syria-ġmiut Damascus-miñ qaipkaimmata aŋuyaktinik ikayuqtiksraŋiññik Umialgum Hadadezer-m, David-gum aŋuyakługich tuqunŋagaich 22,000-tun iñugiaktigiruat aŋutit.

⁶ Nappaiŋaruq aŋuyaktuat iniksraŋannik nunaŋanni, aasii ilaan iñugiliutiŋagaich aasii akiḷiipkaliqł̣ugich akiḷiqsuaksranik. Atanġum akimapkaqtaŋagaa David sumiḷiqaa.

⁷ David-gum piksraqtaaġiŋagaich kaviksuaniñ manigniñ savaat akigautit pigiraŋich Hadadezer-m atanauraŋisa aasii Jerusalem-muutivlugich.

⁸ Patukpasalagniksuli piŋammiuq Betah-miḷḷu Berothai-miḷḷu, inik aullarraŋik Hadadezer-m.

⁹ Umialiŋa Hamath-gum Toi tusaaŋaruq David-mun akiiḷiñivḷugich Hadadezer-m aŋuyaktiŋich.

¹⁰ Tavra aullaqtinŋagaa iġñiñi Joram paġlayyaquvlugu Umialik David suli nanġaġlugu akiiḷimmagich Hadadezer-tkut, Toi-m aŋuyaŋammiraŋa iñugiaktuani. Joram-gum tigumiaġutiŋagaa David aitchuutinik savaaguruanik kaviqsaamiñ manigmiñ, qatiqtaamiñ manigmiñ, suli patukpagmiñ.

¹¹ Umialgum David-gum ilaaguaŋagaich taapkua atuquvlugich aŋaiyyugumik, iḷaliutivlugich qatiqtuanun suli kaviqsuanun manigñun pisaġiramiñun nunaqpagniñ akiiḷiramiñiñ,

¹² Edom-miñ, Moab-miñ, Ammon-miñ, Philistia-miñ, Amalek-miñ suli iḷaŋiññiñ pigiliutiraġmi Hadadezer-miñ.

¹³ David qutchiksivsaaqpaŋaruq utiġami tuqutqaaqługich 18,000-tun iñugiaktigiruat Edom-miut Salt Valley-mi.

¹⁴ Ilaa nappaiŋaruq aŋuyaktuat nullaġviksraŋiññik sumiḷiqaa Edom-mi, suli iñuŋich iñugiliutiŋagaich. Atanġum akimapkaqtaŋagaa David sumiḷiqaa.

¹⁵ David aullarriŋaruq iluqaani Israel-mi suli iñugirani aŋalalluataŋagai ativlugich.

¹⁶ Joab, aakaqaqtuaq Zeruiah-mik, qaukłiurauŋaruq aŋuyaktini; Jehoshaphat, iġñiŋa Ahilud-gum, qaunaksrauŋaruq agliurrani;

¹⁷ Zadok-lu, iġñiŋa Ahitub-gum, Ahimelech-lu, iġñiŋa Abiathar-m, aŋaiyyuliqsiqpauŋaruk; Seraiah aglaktauŋaruq uqaqsitaaġmata;

¹⁸ Behaiah, iġñiŋa Jehoiada-m, qaukłiġiŋagaat David-gum munaqsriŋisa; aasii David-gum iġñiŋich aŋaiyyuliqsiqpauŋarut.