2 Samuel 7 - Iñupiatun Mumiksat Uqalugiksuat

God-im Unniqsuqłiutaa David-mun

¹ Umialik David inillaŋaruq igluqpagmi, suli Atanġum annausimaaŋagaa akiḷḷiiŋiññiñ.

² Tavra umialik uqallaŋaruq God-im uqaqtaanun Nathan-mun, “Uvva uvaŋa iñuuruŋa iglumi savaaguruamik napaaqtumiñ cedar-miñ, aglaan God-im Sivunniuġutim Kiguunniŋa tupiġmiittuq!”

³ Nathan-gum kiuŋagaa, “Isumaktun piiñ, qanukkii Atanġum itqatigigaatin.”

⁴ Aglaan unnuaġman Atanġum uqallautiŋagaa Nathan,

⁵ “Ullaglugu uqallauttuuŋ kivgaġa David inna uqallautiniḷugu, ‘Ilvich savaktauniaŋitchutin aŋaiyyuvikpagmik irviksramnik.

⁶ Taimaŋŋaqaŋa annautikapkich iñuŋich Israel Egypt-miñ paŋmanunaglaan, aŋaiyyuvikpagmiiñŋaitchuŋa; iglauŋaruŋa tupiqtuqłuŋa.

⁷ Igliġnipayaamni iñuŋiññi Israel apiqsruŋaitkitka aullarrauruat piksraqtaatka summan aŋaiyyuvikpaliuŋaiñmagaaġma napaaqtumiñ cedar-miñ.’

⁸ “Tavraasii uqallauttuuŋ David kivgaġa uvaŋa, Ataniq Sapiġñaġniqsraq, inna uqallautiniḷugu, ‘Imnaiḷiqiruatiin piksraqtaaġiŋagikpiñ aasii aullarriġuqhutin iñumnun Israel-miunun.

⁹ Itqatigisuugikpiñ sumupayaaġavich, suli akiiḷipkaqługich akiḷḷipayaatin. Qutchiksipkaġniaġikpiñ aullarriqpaktun iḷiñiaġikpiñ nunapayaami.

^10-11 Piksraŋaruŋa iniksraŋannik iñugma Israel aasii inillakługich tavrani, iñuuniaquvlugich nagliksaaŋaiġlugich. Tamauŋa tikiññamik qaŋa, aŋuyaksiŋarut iñugmiñ anayaitchuaniñ, aglaan tainnatqigñiaŋitchut. Unniqsuqłiiruŋa annausimaaġniaqtusi akiḷḷiivsiññiñ suli kiŋuvaaksriññiaġivsi.

¹² Tuquguvich aasii iḷuviqpatin kiŋuniiġnun, iḷaŋat iġñiqpich umialiliutiniaġiga aasii umialgutaa suaŋapkaġlugu.

¹³ Taamna tavra nappaiñiaqtuq aŋaiyyuvikpaksramnik, suli umialguniŋa igliqtinniaġiga isuitchuamun.

¹⁴ Aapauniaqtuŋa ilaanun suli iġñiġilugu uvamnun. Killukuaqpan tatavsaġniaġiga aapauruam tatavsaiñiŋatun iġñiġmiñik.

¹⁵ Aglaan ikayuŋaiġñiaŋitkiga piḷġusiptun Saul-mun, piiqł̣ugu ilvich umialguqtinnapkiñ.

¹⁶ Kiŋuvaaqaġuuniaqtutin, suli umialgutin igliqtinniaġiga taimuŋa. Umialgutin nuŋuniaŋitchuq taimuŋaaglaan.’”

¹⁷ Nathan-gum uqallautiŋagaa David iluqaiññik God-im niptaġvigimmauŋ ilaanun.

David-gum Aŋaiyyutaa Quyanaaqhuni

¹⁸ Tavra Umialik David tupiġmuŋaruq Atanġum saaŋanun, aquviłłuni aŋaiyyuŋaruq, “Qutchigñiqsrauruatiin Ataniiq, nalliummatiŋitchuŋa ilvich pianiktaġnun uvamnun, naaggaunnii nanmiñiq iḷatka nalliummatiŋiñmiut.

¹⁹ Uvva suliaglaan savautigiŋmasuli, Qutchigñiqsrauruatiin Ataniiq; unniqsuqłiiŋarutin kiŋuvaaksrapkun ukiuni tikiññiaqtuani. Tavra tainna aŋalatchuuvigi iñuich, Qutchigñiqsrauruatiin Ataniiq!

²⁰ Qanuq uqallautivsaaġumiñaqpigiñ! Iḷisimagiŋma, ilvich kivgaŋa.

²¹ Ilvich pisuutigiŋagiñ suli sivuniġivlugu; tamatkua kamanaqtuat savaaġiŋagitin iḷisautisukłuŋa.

²² Kamanaqtutin uvva, Qutchigñiqsrauruatiin Ataniiq! Iliktun ittuamik piitchuq; iḷisimarugut taimaŋŋa qaŋa kisivich God-autilaaġnik.

²³ Allamik iñuitchuq maani nunami Israel-tun ittuamik, annautiraqpich kivgauniġmiñ ilvich iñugisukługich. Kamanaqtuallu aliuġnaqtuallu ilvich savaatin iliŋiññun siaminŋagaat suaŋŋatin nunapayaamun. Qimaktinŋagitin allat nunaqpauruat god-iŋiḷḷu, iñugiratin tikitchaġimmata, iñuktin annaktinŋaratin Egypt-miñ ilvich pigisukługich.

²⁴ Israel piññaktaaġiŋagiñ iñugiyumiñaqsivḷugu isuitchuamun, suli ilvich Ataniiq, God-iliutiŋammigaatin.

²⁵ “Tavraasii, Ataniiq God-auruatiin, taŋŋiqsirruŋ taimuŋaaglaan unniqsuqłiigutigiŋaran uvamnullu kiŋuvaaksramnullu, aasii savaaġilugu piñiaġniran.

²⁶ Qutchiksuaguniġiñ kamaniaqtuq, suli iñuich inna uqaġniaqtut isuitchuamik, ‘Ataniq Sapiġñaqtuaguruaq God-auruq Israel-mun.’ Aasii suli ilvich igliqtinniaġiñ umialgutiga isuiḷaamun.

²⁷ Ataniq Sapiġñaqtuaguruaq God-auruq Israel-mun! Sivuuqqataitchuŋa taamna aŋaiyyutigikapku iliŋnun, qanukkii iluqaan ilitchuġipkaŋagiñ uvamnun, ilvich kivgaŋa, suli uqallautiŋagiŋma ilvich umialiguqtinniaġnivḷugich kiŋuvaatka.

²⁸ “Tavraasii, Qutchigñiqsrauruatiin Ataniiq, God-aurutin; unniqsuqłiisitin taŋŋiqsitchuugitin, suli nakuuruamik unniqsuqłiiŋagiŋma.

²⁹ Apiġigikpiñ ikayuquvlugich kiŋuvaatka ikayuutitin akuqtuaġiugaqsaġaich. Ilvich, Qutchigñiqsrauruatiin Ataniq, unniqsuqłiutigiŋagiñ taamna, suli ikayuutin inniaqtuq kiŋuvaamni isuitchuamun.”