2 Samuel 6 - Iñupiatun Mumiksat Uqalugiksuat

Salumaruaq Kiguunniq Jerusalem-muutigaat

¹ Tavraasii David-gum atautchimuktitqiŋagaich aŋuyaktini nakuuniqsrat Israel-miittuat, 30,000-tun iñugiaktigiruat,

² aasii Baalah-muutivlugich Judah-miittuamun, God-im Sivunniuġutikun Kiguunniŋa aivḷugu, atiqaqtuaq Ataniq Sapiġñaqtuaguruaq, umialgutiqaġvia akunġagni malġuk isaġuligaak cherubim.

³ Piŋagaat Abinadab-gum aimaaġvianiñ qimiqqamiittuamiñ aasii iḷivḷugu nutaamun qamugvigmun. Uzzah-vlu Ahio-vlu, iġñiŋiksa Abinadab-gum, qamuktaŋak,

⁴ Ahio sivuaniiłłuni.

⁵ David-lu Israel-miullu kanaakkiuŋarut suli atuqhutik piḷgutilaamiktun qutchiksiḷiġukługu Ataniq. Atuqtuuraqhutik nuqaqtilignik, lyres-nik, qiḷautinik, avsaluktaqtuanik, suli savił̣hanik patakulautinik.

⁶ Tikiñmata palauvaksranik amiġaiyaqsivigmun Nacon-mi, qimukti ulġuqqayaqtuq, aasii Uzzah-m isaaqhuni Sivunniuġutim Kiguunniŋa tiguŋagaa.

⁷ Tavraŋŋatchiaq Ataniq God-im qinnautiŋagaa Uzzah aasii tuqułługu qiksiksrautaiññivḷugu. Uzzah tuquŋaruq tavrani saniġaani Sivunniuġutim Kiguunniŋata,

⁸ tavraasii taamna ini taisuugaat Perez Uzzah-mik tavraŋŋaaglaan. David qinnaliqpaŋaruq qanukkii Atanġum tatavsaŋagaa Uzzah qinnaŋaŋŋaġmi.

⁹ Tavra David iqsitchaŋaruq Ataniġmik aasii uqallakhuni, “Qanuġluguasii Sivunniuġutim Kiguunniŋa aullautiniaqpigu?”

¹⁰ Tavraasii sivunniŋaruq aullautisuŋił̣ł̣ugu Jerusalem-mun; aglaan, apqunmiñ saquvluni Obed Edom-gum igluanuutiŋagaa, Gath-miuguruamun.

¹¹ Sivunniuġutim Kiguunniŋa piŋasuni tatqiñi tavraniinŋaruq, aasii Atanġum quviasaaŋagaich Obed Edom-lu iḷaŋiḷḷu.

¹² Umialik David tusaaruq Ataniġmun quviasuusiamik aitchuġnivḷugich Obed Edom-gum iḷaŋiḷu pisigivlugu God-im Sivunniuġutiŋa Kiguunniq; tavraasii kiguunniq piŋagaa Obed-gum igluaniñ Jerusalem-muutisukługu quyyatikun quviasualalutik.

¹³ Aŋutit tigumiaqtuat Sivunniuġutim Kiguunniŋanik avluanigmata itchaksratun, David-gum nutqaqtiłługich aitchuiŋaruq Ataniġmun ikipkaqługik aŋusalluġlu quiñisipkaŋaruamiglu piayaamik.

¹⁴ David kanaakkiuqpaŋaruq piḷgutilaamisun qutchiksiḷiqsaqługu Ataniq, kalikumik tavsiamiñiñ atuqsiññaqhuni.

¹⁵ Tavraasii ilaalu iluqatiglu Israel-miuguruat Jerusalem-muutiŋagaat Sivunniuġutim Kiguunniŋa quviasuutinik nipaalavlutik suli tusaġnaqłutik nipauqłuktautit.

¹⁶ Tikiutimmigaallu Sivunniuġutim Kiguunniŋa iniŋanun David-gum, Michal, Saul-gum paniŋa, igalaurakun itchuaqtuqłuni tautuŋagaa Umialik David kanaakkiuruaq suli miñŋiqtaqtuaq sivuġaani Atanġum aasii ilaan uumisuutigiqpaŋagaa.

¹⁷ Sivunniuġutim Kiguunniŋa isiŋagaat Tupiġmun David-gum itqanaiyaŋaraŋanun. Aasii David aitchuiŋaruq iḷammiuġnikun aitchuutinik Ataniġmun.

¹⁸ Ikipkaiganikkami, anniqsuusiaksraŋiññik iñuich aitchuŋagaich atqagun Atanġum Sapiġñaqtuaguruam

¹⁹ suli aitchuqtuqługich iluqaisa niqinik. Aitchullaaŋagaich aŋutillu aġnallu Israel-miittuat punniġmik, argiqsamik niqimik, suli raisins-nik. Aasii iluqatik aiŋarut.

²⁰ Aaqagulimman, David aiŋaruq paqłayyaqługich iḷani, Michal aniŋaruq tautugiaqługu. “Umialiŋa Israel-gum qutchiksiḷiġaa atini uvlupak!” Michal uqallaktuq. “Maniuŋaruq inmiñun isumalluaġiiḷatun takkuanni aġnat kivgauruat qaukłiuraŋiññun!”

²¹ David-gum kiugaa, “Kanaakkiuruaŋa nanġaqługu Ataniq, uvamnik piksraqtuam ilvich aapan pigaluaġnagu suli aimaaviqatiiŋich aullarrautquvluŋa Israel iñuŋiññun. Suli kanaakkiuŋaiġñiaŋitchuŋa nanġaġlugu Ataniq,

²² suli kanŋusaavsaaġluŋa uvamnun. Ilvich suuŋiḷaġiniaġaluaġiŋma, aglaan taavapkua aġnat nanŋaġniaġaanŋa!”

²³ Michal, Saul-gum paniŋa, miqłiqtuqaŋaitchuq.