2 Samuel 5 - Iñupiatun Mumiksat Uqalugiksuat

David Umialiguqtuq Israel-mun

¹ Tavraasii iluqaġmiŋ maŋŋuġiiḷḷaat Israel-mi ullaŋagaat David Hebron-miittuaq aasii uqallautivlugu, “Nanmiñiq iḷagigivsigiñ.

² Sivuani, Saul unnii umialigiŋŋaan, ilvich aullatiŋagitin iñuŋich Israel aŋuyaktuani, aasii Atanġum unniqsuqłiiŋagaatin aullatiniaġnivḷugich iliŋnun iñuni suli aullarrauniaġnivḷutin.”

³ Tavraasii iluqatik aullarrauruat Israel-mi David-muŋarut umialguruamun Hebron-mi. Sivunniuqatigiŋagaich, aasii uqsruqtiŋagaat umialiguqługu Israel-mun.

⁴ David ukiuqaŋaruq iñuiññaq qulitun (30) umialiguġami, aasii umialguŋaruq malgukipiani (40) ukiuni.

⁵ Umialguŋaruq Judah-mun Hebron-mi tallimat malġuk ukiut suli itchaksrat tatqich, aasii Jerusalem-mi umialguvluni iluqaagnun Israel-mullu Judah-mullu iñuiññaq qulit piŋasuni (33) ukiuni.

⁶ Uvluq tikiñman Umialik David iñuniḷu aŋuyagiaġniġaich Jerusalem-miuguruat. Jebus-miut, tavrani iñuuniaqtuat, isumaŋarut David-mun akiiḷiyumiñaiññasugilugu iniktik, aasii uqallautiŋagaat, “Mauŋa isiġumiñaitchutin suuramikunnii; ayauŋaruam unnii naagga qilluutaqaqtuam isiqsaiḷiyumiñaġaatin.”

⁷ (Aglaan David-gum piññaktaaġiŋagaa annaksimaaġviŋat Zion, aasii taisuusiŋagaat inna “David-gum Iniŋa.”)

⁸ Tavrani uvlumi David-gum uqallautiŋagaich iñuni, “Uvani iñuqaqpa uumikłiqsuanik uvaptun Jebus-miunik? Uumigivaił̣ł̣ugich tuqulaallaisa? Ki, takpauŋaġitchi immam igliġviagun aasii piyuglugich ayauŋaruat qilluutaqaqtuat.” (Tainnamik inna uqallaŋarut, “Ayauŋaruat naagga qilluutaqaqtuat isiġumiñaitchut Atanġum igluanun.”)

⁹ Piññaktaaġianikkamiuŋ annaksimaaġvik, David-gum aimmavigiŋagaa suli atchiqł̣ugu “David-gum Iniŋa.” Nappaiŋaruq avataanun, isagutivluni kivalitchiani qimiqqam nunamik agraġvianiñ.

¹⁰ Suaŋŋaksaiññaŋaruq, qanukkii Atanġum God-auruam Sapiġñaqtuaguruam itqatigiŋagaa.

¹¹ Umialguruaq Tyre-mun, Hiram, David-muktitchiŋaruq uqaqtiksramiñik; qaġġirriŋaruq napaaqtuqpagnik suli kaamniġniglu uyaġaliqiriniglu igluqpaliuquvlugich umialigmun.

¹² Tavraasii David iḷitchuġiŋaruq Ataniġmun umialiguŋatilaamiñik Israel-mun suli piḷḷuataqtiłługu umialgutaa iñuich pisigivlugich.

¹³ Nuutkanikkami Hebron-miñ Jerusalem-mun, David kivganik aġnanik nuliaksravsaaŋaruq alliuruat tuvaaqatiqqaamiñiñ aasii iġñiqavsaaqhuni suli paniqavsaaqhuni.

¹⁴ Ukuniŋa miqłiqtuqaŋaruq Jerusalem-mi: Shammua, Shobab, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishama, Eliada, suli Eliphelet.

Akiiḷimmatigik Philistia-ġmiut

¹⁷ Philistia-ġmiut tusaagamik David umialiguŋanivḷugu Israel-mun, aŋuyaktiŋich aullaŋarut tigusukługu. David tusaagami, atqaŋaruq payaŋaiyaŋaruamun inimun.

¹⁸ Philistia-ġmiut tikiñŋarut Rephaim Valley-ŋanun aasii piññaktaaġivlugu.

¹⁹ David-gum apiqsruŋagaa Ataniq, “Aŋuyaglagich Philistia-ġmiut? Akimapkaġniaqpiŋa?” “Ii, aŋuyakkich!” Atanġum kiugaa. “Akimapkaġniaġikpiñ!”

²⁰ Tavraasii David Baal Perazim-muŋaruq aasii tavrani akiiḷivlugich Philistia-ġmiut. Uqallaktuq, “Atanġum uliqpaktuatun akiiḷiŋagaich akiḷḷiivut sivumni.” Tavraasii taamna ini atiqaqtuq Baal Perazim-mik.

²¹ Philistia-ġmiut qimakkamik uniñŋagaich iñuuraqpatik, aasii David-lu iñuniḷu aullautiŋagaich.

²² Tavra Philistia-ġmiut utiŋarut Rephaim Valley-ŋanun aasii piññaktaaġitqikługu.

²³ David-gum kaŋiqsiuvsaaŋagaa Ataniq. Kiuŋaruq inna, “Uvaŋŋa aŋuyaksaġnagich, aglaan kiavallaglugi tunuannin aŋuyaksaġisi, qaniŋaniñ napaaqtut balsam-git.

²⁴ Tusaaguvsiuŋ nipi avluġaaqtuatun napaaqtut qulaatigun, aŋuyaksaġisi qanukkii sivuliraġniaġivsi akiiḷisaġlugich Philistia-ġmiut aŋuyaktiŋich.”

²⁵ David-gum kamagiŋagaa Atanġum piraksriutaa, aasii qimaapkaqługich Philistia-ġmiut Geba-miñ Gezer-muaglaan.