2 Samuel 3 - Iñupiatun Mumiksat Uqalugiksuat

¹ Aŋuyasugruŋarut iñuŋiḷḷu Saul-gum nanmiñiq iḷaŋisa suli iñuŋich David-gum. David suaŋŋaksiiññaqtiłługu, akiḷḷiiŋich suaŋaiqsiiññaŋarut.

David-gum Iġñiġutiiŋich

² Uvva ukua David-gum itchaksrat iġñiŋich aniŋaruat Hebron-mi aŋayukłiġmiñaglaan: Amnon, aakaqaqtuaq Ahinoam-mik, Jezreel-miumik;

³ Chileab, aakaqaqtuaq Abigail-mik, Nabal-gum uiḷgaqtaŋa, Carmel-miu; Absalom, aakaqaqtuaq Maacah-mik, paniŋa Umialgum Talmai-m Geshur-mium;

⁴ Adonijah, aakaqaqtuaq Haggith-mik; Shephatiah, aakaqaqtuaq Abital-mik;

⁵ Ithream, aakaqaqtuaq Eglah-mik. Iluqatik taapkua iġñiŋich aniŋarut Hebron-mi.

Abner-m Iḷḷatigaa David

⁶ Aŋuyaktuat David-kullu Saul-guvlu iñuŋich isagunŋapkaqługich, Abner suaŋŋaksiiññaŋaruq Saul-gum maliġuaqtiŋiññi.

⁷ Uvlut iḷaŋanni Ishbosheth-gum, iġñiŋata Saul, pasiuŋagaa Abner siñiqatiqaġnivḷugu Saul-gum nukaġaŋa Rizpah-mik, panianik Aiah-gum.

⁸ Abner qinnalipiaġataŋaruq uqallautaagun Isobosheth-gum. Tavraasii kiuŋagaa: “Uvvauvaŋa qimmim niaquġivaŋa—Judah-mun? Sivuaniñ qaŋa allanuktuŋaitchuŋa avataanun aapakpich Saul, iḷaŋisalu avilaitqatiiŋisalu. Akiiḷitchaiḷiŋagikpiñ David-mun; aglaan uvva uvlupak pasiuġiŋma aġnakun!

^9-10 Atanġum unniqsuqłiiŋagaa David, umialgutaa Saul-guvlu kiŋuniiŋisalu piiġñiavnivḷugu aasii David umialiguġlugu iluqaagnun Israel-mullu Judah-mullu, nunam isuaniñ taavuŋatchiġmun isuanun. Tavraasii God-im tuqullagruaġliŋa taamna taŋŋiqtinŋitkupku!”

¹¹ Ishbosheth-gum iqsigivaił̣ł̣ugu Abner uqallaksausiiñŋaruq unnii.

¹² Abner aullaqtitchiŋaruq kiliktuiriñik David-mun, taimani uvlumi Hebron-miittuamun, inna uqallaquvlugich, “Kia aŋalanniaqpauŋ manna nuna? Sivunniuqasiŋŋa, aasii ikayuġniaġikpiñ Israel iluqaan iliŋnik umialiqaġuŋniḷutiŋ.”

¹³ “Aarigaa!” David-gum kiugaa. “Sivunniuqasiġñiaġikpiñ kisian inna piñiaġuvich: kaluqtuksraġigiñ Saul-gum paniŋa Michal uvamnun tautugiaġumŋa.”

¹⁴ Aasii David aullaqtitchiŋammiuq kiliktuiriñik Ishbosheth-mun innaquvlugich, “Utiqtirruŋ uvamnun tuvaaqatiga Michal. Akiḷiiŋaruŋa tallimakipianik (100) Philistia-ġmiut quġġiviŋisa amiŋiññik tuvaaqasiutisukługu.”

¹⁵ Tavraasii Ishbosheth-gum aullautipkaŋagaa Michal uiŋaniñ Paltiel-miñ iġñiġiraŋa Laish-gum.

¹⁶ Paltiel-gum maliqsruŋagaa inimunaglaan Bahurim-mun, qirruktuaqhuni malillaan. Aglaan Abner uqallagman inna, “Utiġiñ aiḷutin,” utiŋaruq.

¹⁷ Abner aullarriŋiññuŋaruq Israel-gum aasii uqallautivlugich, “Qaŋaniñ uvva David umialigisuŋagiksi.

¹⁸ Piviksraqsi uvva ittuq akkupak. Itqaumarusi Ataniq uqallagman, ‘Kivgamnun David-mun annautipkaġniaġitka iñutka Israel-guruat Philistia-ġmiuniñ suli allaniñ iluqaiññiñ akiḷḷiiŋiññiñ.’”

¹⁹ Abner-m suli uqaqatigiŋagaich maŋŋuuqaqtuat Benjamin-mik aasii suli Hebron-mugmivḷuni uqallautiyaqtuqługu David qanuq iñuŋich Benjamin-gum suli Israel-miut sivunniuqtilaaŋiññik.

²⁰ Abner qaimman Hebron-mun piqatiqaqhuni iñuiññaq (20) aŋutinik, David niqinaqipkaiŋaruq iluġaiññun.

²¹ Abner-m uqallautigaa David, “Aullaġniaqtuŋa akkupak aasii iluqaan Israel iliŋnun Qutchiksuaguruatiin piññaktaaġilugu. Akuqtuaġiniaġaatin umialliutilutin, tavraasii pigisuguuran pigiliutiniaġiñ aasii aullarriġuġutin iluqaanun nunam.” David-gum aullaqtitkaa Abner navianaitchuakun.

Abner Iñuaqtauruq

²² Joab-lu allallu David-gum qaukłiuraŋich utiŋarut aŋuyagiaŋaruat, qaġġirrivḷutik suġalunnaktaamignik. Abner aglaan piiñŋaruq tavrani Hebron-mi David piqatigilugu, qanukkii David-gum aullaqtinŋavlugu navianaitchuakun.

²³ Joab-lu iñuniḷu tikiñmata, Joab uqallautiŋagaat, Abner-mun ullaŋanivḷugu Umialik David aasii aullaqtiłługu navianaitchuakun.

²⁴ Joab umialigmuŋaruq aasii uqallautivlugu, “Immaimña suruatin? Abner-m ullaktaatin—summan aullaqtittan tainna?

²⁵ Qaiŋaruaq pitqiksiġaġiaqhutin suli iḷitchuġisukługich surġautipayaatin suli igliġvipayaatin. Taamna iḷisimasugnaġiñ!”

²⁶ Uniññamiuŋ David, Joab aullaqtitchiŋaruq kiliktuiriñik aitquvlugu Abner, aasii utqutiŋagaat Sirah Well-miñ; aglaan David-gum taamna naluŋagaa.

²⁷ Abner tikiñman Hebron-mun, Joab-gum ilikkuaŋagaa upkuaqpagmi, uqautisuktuatun kisian pivḷugu, aasii tavrani kapiŋagaa narraaŋagun. Tavra Abner iñuaqtauŋaruq qanukkii ilaan tuqunŋavlugu Joab-gum aniqataa Asahel.

²⁸ David tusaagami, uqallaŋaruq, “Ataniq iḷisimaruq uvaŋalu iñutkalu iḷaksruutauŋaisilaaptignik Abner-m iñuaqtauniŋani.

²⁹ Tatavsaun taaptumuuna tutchumauq Joab-mullu iḷaŋiñullu! Kiŋuvaagullaaruani iñuqallaasaqtuq nanmiñiq iḷaŋiññi maqiruaqaqhuni timimiñi naagga uviñiŋich mamilaiḷḷutik naagga aġnat kisian savaaġisuuraŋiññik savallaluni naagga tuqutauluni aŋuyakpata naagga kaaksiuluni!”

³⁰ Tavraasii Joab-lu aniqatiniḷu Abishai akisaŋagaak Abner tuqunŋanivḷugu aniqatiktik Asahel aŋuyaktuani Gibeon-mi.

Abner Iḷuviqtauruq

³¹ Tavra David-gum piraksriiŋagaich Joab-lu iñuŋiḷu aligaquvlugich annuġaaŋich, annuġaaquvlugich aluaqsautinik, aasii qiñuaqsiḷugu Abner. Aasii aŋaiyyurrimmata Umialik David pisuaŋaruq aquani akigautim.

³² Abner iḷuviŋagaat Hebron-mi, aasii umialik qiaŋaruq nipatuvluni iḷuvvivigmi, aasii iluqaġmik iñuich qiaŋammiut.

³³ David-gum una isumaaġun atuun atuŋagaa Abner-mun: “Summan Abner tuquva isumalluaġiiḷatun?

³⁴ Argaŋich qiḷiqsruŋaitkaich, Suli isigaŋich qiḷġutaiñmiut; Tuquŋaruq iñuktun tuquttaŋatun pigiiḷḷiqirit.” Aasii iñuich qiaqpavsaaŋarut.

³⁵ Uvluq naałługu iñuich niġipkaġniatakkaluaġaat David, aglaan ilaa unniqsuqłiiŋaruq inna, “God-im anauluŋa tuqulliŋa niġiguma uvluq nuŋuŋaiñŋaan!”

³⁶ Taamna kaŋiqsiŋagaat aasii iviġaumagiŋagaat. Tavrakii supayaat umialgum piraŋich iviġagiŋagaich iñuich.

³⁷ Iluqatik David-gum iñuŋich suli iluqatik iñuich Israel-mi iḷisimaŋarut umialik iñuaqtuani Abner-mik iḷauŋaisilaaŋanik.

³⁸ Umialik uqallaŋaruq atanauramiñun inna, “Naluvisi uvlupak tuqutilaaŋanik aullarriqpauruaq Israel-mi?

³⁹ Umialgugaluaqtilluŋa piksraqtaaguvluŋa Ataniġmun, sayaitchuŋa uvlupak. Ukua iġñiŋich Zeruiah-m qinnayukpaitchut. Atanġumtuq tatavsaġligich taapkua pigiiḷḷiqirit tatavsausiaksraŋatitun!”