2 Samuel 24 - Iñupiatun Mumiksat Uqalugiksuat

David Kisitchipkairuq Aŋuyaktinik

¹ Tavrasuli Atanġum qinnautiŋagaa Israel, suli David-mun iluiḷḷiuqtiłługich. Atanġum uqallautigaa David, “Kisitchaqtuakkich iñuŋich Israel-guvlu Judah-vlu.”

² Tavraasii David-gum uqallautiŋagaa Joab, aŋuyaktiŋisa aullariŋat, “Aullaġitchi iluqaiññun kiŋuniġiiñun Israel-mi, Dan-miñ aglaan Beersheba-mun, aasii agliutilugich aŋuyaktit, iḷitchuġiyumauŋa qanutun iñugiaktilaaŋiññik.”

³ Aglaan Joab-gum kiuŋagaa umialik, “Umialikpaak, Atanġumtuq God-ikpich aŋuyaktiŋit Israel-gum tallimakipiatullaa (100x) iñugiaksivsaaġligich akkupak iñugiaktilaaŋiññiñ, suli iñuusaqtutin savaaŋa taamna qiñillasiḷugu. Aglaan summan Umialikpaak taamna pitquviuŋ?”

⁴ Aglaan umialgum kamagipkaŋagaich piraksriutini Joab-mullu atanauraŋiññullu; unił̣ł̣ugu aullaŋarut kisitchaqtuaqługich iñuŋich Israel-gum.

⁵ Ikaaŋagaat Jordan River aasii nullaqłutik kiluanun Aroer-m, inauruaq qitqani natiġnaam, nunaŋani Gad-gum. Tavraŋŋa salliñaamuŋarut Jazer-mun,

⁶ suli Gilead-mullu Kadesh-mullu, Hit-miut nunaŋaniittuanun. Tavraasii Dan-mugmivḷutik, aasii tavraŋŋa Dan-miñ avanitchianun Sidon-mun.

⁷ Inimun Tyre-muŋmiut anayanaitchuamun aŋuyagniñ, iniŋiññullu Hiv-miut suli Canaan-miut, suli Beersheba-muaglaan, kiluliñaaŋaniittuamun Judah-m.

⁸ Tavraasii quliŋŋuġutaiḷat tatqich iḷavlugich iñuiññanik uvlunik qaaŋianigmata utiŋarut Jerusalem-mun, igliqqaaqhutik iluqaanun nunam.

⁹ Kiliŋagaat umialik iñugiaktilaaŋannik aŋutit aŋuyaktuaniitchumiñaqtuat: 800,000 Israel-mi suli 500,000 Judah-mi.

¹⁰ Aglaan David kisitchipkaiganikkami, isumaaluliŋaruq, aasii uqallautivlugu Ataniq, “Taamna pigapku piḷuusiqipaluktuŋa! Suliqutigiŋaiŋŋa. Isumalluaġiipaluŋaruŋa.”

^11-12 Ataniq uqallaktuq Gad-mun, David-gum uqaqtaanun, “Uqallautiyyaġuŋ David aitchuġniaġniḷugu piŋasunik naliġaktaksraŋiññik. Nalliannik piksraqtaaŋanik savagniaqtuŋa.” Uvlaami, David makitanigman,

¹³ Gad-gum ullaŋagaa, uqallautivlugu Atanġum uqaluŋiññik, aasii apiġivlugu, “Nalliannik piḷi? Piŋasuni ukiuni kaaksiulich nunagiraġni naagga piŋasuni tatqiñi qimaalutin akiḷḷiiġiraġniñ naagga piŋasuni uvluni naŋirrutipak piḷi nunagiraġni? Isumalaaġutigiuŋ, aasii nallianik piguvich iḷisimapkaġluŋa uqallautisaġiga Ataniq.”

¹⁴ David-gum kiugaa, “Siġġaġnamiittuŋauvva! Aglaan tatavsaqtausuŋitchuŋa iñugniñ. Atanġum ilaata tatavsaġlisigut, qanukkii nakliksrauturuq.”

¹⁵ Tavraasii Ataniq naŋirrutiqpagmik qaipkaiŋaruq Israel-mun, isagutivluni uvlaamiñ aġiuviksrautigiramiñunaglaan. Nunam isuaniñ taavuŋatchianunaglaan 70,000-tun iñugiaktigiruat Israel-miuguruat tuquŋarut.

¹⁶ Atanġum isaġuliŋata tuqutchaġmigaiḷḷu Jerusalem-miut, Ataniq isumalitqiŋaruq tatavsaġniŋatigun iñuich aasii uqallautivlugu isaġulik tuquġairuaq, “Nutqaġiñ! Tavratualuk!” Isaġulik qaniŋaniinŋaruq amiġaiyaqsiviata palauvaksranik Araunah-m, Jebus-mium.

¹⁷ David-gum tautuŋagaa isaġulik tuquġairuaq iñugnik, aasii uqallautivlugu Ataniq, “Uvaŋa patchisauruŋa. Uvaŋauvva killukuaqtuaŋa. Suŋavat makua naglignaqtuat iñuich? Tatavsaqsigut uvaŋalu iḷatkalu.”

¹⁸ Tavrani uvlumi Gad David-muŋaruq aasii uqallautivlugu, “Araunah-m amiġaiyaqsivianugutin palauvaksranun ikipkaiviḷiuġiaġiñ Ataniġmun.”

¹⁹ David-gum kamagiŋagaa Atanġum tillisaa aasii aullaqhuni Gad-gum uqallautaatun.

²⁰ Araunah-m takanani tautuŋagaich umialiglu atanauraniḷu qairuat. Nunamun punŋaruq saaŋanun David-gum

²¹ aasii apiqsruqługu, “Umialikpaak, summan mauŋaqpich?” David-gum kiugaa, “Tauqsiġiaqługu amiġaiyaqsiviiñ palauvaksranik aasii ikipkaiviḷiuġvigilugu Ataniġmun, naŋirrutiqpak nutqaġumauq.”

²² “Piuŋ, Umialikpaak,” Araunah uqallaktuq, “aasii ikipkaiḷutin Ataniġmun sumik pisupayaaqtaġnik. Marra qimuktit ikipkaaksratin aitchuutigilugich; marra anuqaġviŋiḷḷu amiġaiqsiviumlu qiruŋich ikipkaaksrat.”

²³ Araunah-m qaitkaich iluqaisa umialigmun aasii uqallautivlugu, “Atanġumtuq God-ikpich akuqtuġliuŋ aitchuutin.”

²⁴ Aglaan umialigum kiugaa, “Naumi, akiḷiġñiaġikpiñ. Aitchuiñiaŋitchuŋa Ataniġmun God-imnun aitchuutinik akiḷiŋaisamnik.” Aasii tauqsiŋagaich amiġaiyaqsivik palauvaksranun qimuktilu sisamakipiaq qulitun (50) iñugiaktigiruanik qatiqtaanik manigñik.

²⁵ Tavraasii ikipkaiviḷiuŋaruq Ataniġmun aasii ikipkaivḷuni aitchuutiniglu iḷammiuġutiniglu aitchuutinik. Atanġum kiuŋagaa aŋaiyyutaa, aasii naŋirrutiqpak nutqaŋaruq Israel-mi.