2 Samuel 23 - Iñupiatun Mumiksat Uqalugiksuat

David-gum Aqulliich Uqaluŋi

¹ David iġñiŋa Jesse-m, God-gum kamanaqsiraupkaqtaŋa, God-iŋata Jacob-gum umialiksraqtaaġiraŋa, suli ilaa atuutilluatanik atuusiuŋammiuq Israel-mun. Uvva ukua David-gum aqulliich uqaluŋich:

² llitqusiŋa Atanġum Uqaqtuq uvapkun; ilaan kiliktuutaa qanipkuaqtuq.

³ God-iŋa Israel-gum uqaqtuq; qaunaksriŋata Israel-gum uqallautigaaŋa: “Umialik aullarriruaq ativlugich iñuich, aullarriruaq kamagivlugu God,

⁴ siqiñiqtun ittuq qaummatittuatun nuvuyaiḷaami qausaġatauraqtuami, siqiñiqtun qivliatitaiḷḷaruatun ivignik sialuanigman.”

⁵ Tavra tainna God-im ikayuġniaġaich kiŋuvaatka, qanukkii ilaan sivunniiŋagaaŋa, uvamnun sivunniuġutaa naviktauniaŋitchuaq, unniqsuqłiiñ allaŋŋuqtauniaŋitchuaq. Tavratualuk pigisuktaġa; taamna akimmatiginiaġiga, aasii God-im taŋŋiqsinniaġaa.

⁶ Aglaan god-aitchuat iñuich ittut kakiḷḷaġnaqtuatun igitatun; kia unnii aksikkumiñaitkaich argagruiññamiñik.

⁷ Atuqtuksraurutin savił̣hamik savalġutimik naaggaunnii savikpagmik; ikipkaqtauniaqtut iluqaġmik inimigni.

David-gum Suaŋaruat Aŋuyaktiŋi

⁸ Uvva atiŋich David-gum suaŋaruat aŋuyaktiŋisa: sivulliq Josheb Basshebeth Tachemon-miñ, aullarrauruaq “Piŋasunun”; naulikpagmiñik aŋuyaŋagai 800 aŋuyaktit aasii iluqaisa tuqułługich.

⁹ Tugliat taapkua piŋasut Eleazar iġñiŋa Dodo-m, kiŋuniiqaqtuaq Ahoh-mik. Uvlut iḷaŋanni ilaallu David-guvlu piyumatchiutimagaich Philistia-ġmiut kasimaruat aŋuyagumalaaqłutik. Israel-miuguruat qapiqhutik utiġniqsut,

¹⁰ aglaan qapiŋaitchuq aasii aŋuyakługich Philistia-ġmiut argaŋa qiluvaił̣ł̣uni pilillaiġataqługu savikpani. Atanġum akimapkaŋagai tavrani uvlumi. Aŋuyaŋaiġmata, Israel-miuguruat utiŋarut Eleazar-m irvianun aasii aŋuyaunnaiyaqługich tuquŋarat.

¹¹ Piŋayuat taapkua piŋasut Shammah iġñiŋa Agee-m Harar-miu. Philistia-ġmiut katinŋarut Lehi-mi, peas-nik nautchiaqaġviŋmi. Israel-miut qimaŋarut Philistia-ġmiuniñ,

¹² aglaan Shammah makitaŋaruq tavrani nautchiaqaġviŋmi, aasii tuqunŋagaich Philistia-ġmiut. Atanġum akimapkaŋagaich tavrani uvlumi.

¹³ Kivḷuiñaqsimman taapkua piŋasuuruat “Iñuiññaq Quliuruaniñ (30)” qaiġusuŋmuŋarut Adullam-miittuami David-gum irvianun, Philistia-ġmiut unnuipkaqługich Rephaim Valley-mi.

¹⁴ Taimani David inŋaruq anayanaitchuami qimiġami, aasiiḷi aŋuyaktuaqatigiich Philistia-ġmiut piññaktaaġiŋaraŋat Bethlehem.

¹⁵ David aisuliqhuni uqallaktuq, “Kiatuq imña imiksriḷḷiŋa imġaniñ nivviam paaqpaŋata Bethlehem saniġaaniittuamiñ!”

¹⁶ Taapkua piŋasut aŋuyaktit puttutiŋarut Philistia-ġmiut nullaġviannun, imiksraqhutik nivviamiñ, aasii utqutivlugu David-mun. Aglaan ilaan imiġuŋiñŋagaa; aasii kuvivḷugu aitchuutigivlugu Ataniġmun

¹⁷ aasii uqallakłuni, “Ataniiq, una imiġumiñaitkiga! Inniaqtuq uvaŋa imiqtuatun auŋat taapkua aŋutit anayanaqtuakun piruat!” Tavraasii ilaan imiġuŋiñŋagaa. Tavra taapkua iqsiił̣ł̣utik savaaŋich piŋasuuruat aŋuyaktit.

¹⁸ Joab-gum aniqataa Abishai (aakaŋak Zeruiah) aullarrauŋaruq taapkunuŋa “Iñuiññaq Quliuruanun (30).” Aŋuyaŋagaich nauliġaunmik 300-guruat aŋuyaktit aasii tuqułługich, aasii nuimaruaguvluni taapkunaŋŋa “Iñuiññaq Quliniñ (30).”

¹⁹ Nuimałhaaŋaruq taapkunaŋŋa “Iñuiññaq Quliniñ (30)” aasii aullarriḷiutiŋagaat, aglaan iḷauŋaitchuq “Piŋasunun.”

²⁰ Benaiah iġñiŋa Jehoiada-m Kabzeel-miñ iḷagigaat suaŋaruat aŋuyaktit; iñugiaktuanik savaŋammiuq iqsiił̣ł̣uni, iḷaŋat uvva tuqunmagik malġuk suaŋaniqsraŋik Moab-miuk aŋuyaktik. Ilaasuli atqaŋammiuq nivvaġmun qanniktillugu aasii tuqułługu lion.

²¹ Tuqunŋammigaa suli Egypt-miu, iñuniqłuk nauligalik. Benaiah-m anauŋagaa anaullautimiñik, tigullagruaqamiuŋ Egypt-mium nauliŋa, tuqunŋagaa taaptumiŋa nauligmik.

²² Tavra taapkua savaaŋich iqsisaił̣ł̣uni Benaiah-m, nuimaruaguvluniptauq taapkunuŋa “Iñuiññaq Qulinun (30).”

²³ Nuimałhaaŋaruq taapkunaŋŋa, aglaan iḷauŋaitchuq “Piŋasunun.” David-gum aullarriġuŋagaa qaunaksrimiñun.

²⁴ Allat iḷauruat taapkunuŋa “Iñuiññaq Qulinun (30)”: Asahel, Joab-gum aniqataa Elhanan iġñiŋa Dodo-m Bethlehem-miñ

²⁵ Shammah-lu Elika-lu Harod-miñ

²⁶ Helez Pelet-miñ Ira iġñiŋa Ikkesh-gum Tekoa-miñ

²⁷ Abiezer Anathoth-miñ Mebunnai Hushah-miñ

²⁸ Zalmon Ahoh-miñ Maharai Netophah-miñ

²⁹ Heleb iġñiŋa Baanah-m Netophah-miñ Ittai iġñiŋa Ribai-m Gibeah-miñ Benjamin-miittuamiñ

³⁰ Benaiah Pirathon-miuguruaq, Hiddai natiġnaaŋiññiñ Gaash-gum

³¹ Abialbon Arabah-miñ Azmaveth Bahurim-miñ

³² Eliahba Shaalbon-miñ Iġñiŋich Jashen-gum Jonathan

³³ Shammah Harar-miñ Ahiam iġñiŋa Sharar Harar-miñ

³⁴ Eliphelet iġñiŋa Ahasbai Maacah-miñ Eliam iġñiŋa Ahithophel Gilo-miñ

³⁵ Hezro Carmel-miñ Paarai Arab-miñ

³⁶ Igal iġñiŋa Nathan Zobah-miñ Bani Gad-miñ

³⁷ Zelek Ammon-miñ Naharai Beeroth-miñ, Joab-gum tigumiaqtiŋa aŋuyaunnamiñik

³⁸ Ira-lu Gareb-lu Jattir-miñ

³⁹ Uriah Hit-miuguruaq. Iñugiaktigiŋarut iñuiññaq akimiaq malġuktun (37) taapkua suaŋaruat aŋuyaktit.