2 Samuel 22 - Iñupiatun Mumiksat Uqalugiksuat

David-gum Atuutaa Nanġautikun

¹ David-gum atuutaa Ataniġmun annautimmani Saul-miñ suli iluqaiññiñ akiḷḷiimiñiñ.

² Ataniq munaqsrigigiga; suaŋaruaq uqqisimaaġviga.

³ God-iga sapunniaqtiga, ilaaniinnama navianniuyuitchuŋa. Sapunniaġuugaaŋa akkiaġautituqtuatun; piyaqquqsaiḷivḷuŋa navianniuqtinŋił̣ł̣uŋalu. Ilaa annaurrigigiga; ilaan munaġigaaŋa suli annautivluŋa pimaqłuktairuaniñ.

⁴ Ququulakama Ataniġmun annaktittaġigaaŋa akiḷḷiimniñ. Nanġaġli Ataniq!

⁵ Navianniuġutaata tuqqutim avanŋagaluaġaaŋa; qaiḷḷiqtun suksraunġiutim ulivragvigigaanŋa.

⁶ Navianniuġutaata tuqqutim avanŋagaaŋa, suli nigatchiatun tuqqutim saatkaaŋa.

⁷ Iłuiḷḷiuġnimni ququulaaqsigiga Ataniq; Ququullavigigiga God ikayuquvluŋa. Aŋaiyyuvikpagmiñi tusaagaa iġñaga; tusaaŋagaa nipaallatiga ikayuquvluŋa.

⁸ Tavra nuna uulillaktuq aulavluniḷu; maŋŋuŋich qiḷaich aulayyakhutiŋ uulillaktut God qinnaliġman!

⁹ Avyuq aniularuq qiŋŋagniñ, igniq aniulammiuq qanġaniñ ikualaruaġlu aluaq.

¹⁰ Aligaaqługu siḷa qiḷakun atqaqtuq, nuviyyaqłuk taaqtuaq isigaŋisa ataaniiłłuni.

¹¹ Tiŋiruq siuqhuutiłłuni isaġulikun cherubim-kun; tigmiaqsiruq isaġuŋigun anuġim.

¹² Taluruq inmiñik taaqtuamik; nuviyyaqłuqpaich, siḷvinŋaruat immanik, avatkaat;

¹³ ikumaruat aluat ikualarut igniġuuqpatittuamiñ sivuġaani.

¹⁴ Tavra Ataniq kallualanagutiruq siḷamiñ, aasii iġñaŋa Qutchigñiqsrauruam tusaġnaqsivḷuni.

¹⁵ Pisiksautigaich qaġruni qimaarivḷugich aasii akiḷḷiiñi; aasii igniġuuqpatitaqtitchivḷuni pigrualapkaqługich.

¹⁶ Natqa taġium asiññiġmiuq, maŋŋuŋich nunapta qaakutaiqsaallaisa iłuaqsruutikun suakataqapkich akiḷḷitin, Ataniiq, suli qinnał̣ł̣autikun saqłautivlugich.

¹⁷ Ataniq isauqsruqhuni tatpagmaŋŋa tigugaaŋa; amuvluŋaasii mitaiḷaniñ immaniñ.

¹⁸ Annautiŋagaaŋa suaŋŋatiqaqtuaniñ akiḷḷiimniñ uumigiripayaamniḷḷu— suaŋałhaaqpaił̣ł̣utiŋ uvamniñ.

¹⁹ Iłuiḷḷiuqama, maksrigvigiraġigaanŋa, tavraaglaan Atanġum munaġiraġigaaŋa.

²⁰ Inituruamuutiŋagaaŋa; annautiŋagaaŋa atakkii iviġaumagigaaŋa.

²¹ Atanġum akiḷiusiaqaqtitchuugaaŋa savagluataġuuvluŋa; piḷḷuatausiġuugaaŋa qanukkii patchisaitchuŋa.

²² Kamaksrisuuruŋa pitquraiññik Atanġum; Tununŋaitkigalu God-iga.

²³ Kamagigitka pitqurapayaaŋich; Kamaksriŋitchuitchuŋa pitqutaiññik.

²⁴ Iḷisimaruq patchisaisilaamnik, killukuaqsaiḷitilaamnik.

²⁵ Aasii akiḷiusiaqaqtiłłuŋa iluaqtualiqisuuvluŋa, iḷisimagaaŋa patchisaisilaamnik.

²⁶ Ataniiq, piŋitqataalaitchutin iḷumutuuqtuagummataptauq ilignun, nakuuġutipiaqługich iluaġniḷupiallaktuat.

²⁷ Piġuaġniġitchuagurutin iliŋiññun piġuaġniġitchuanun, aglaan piuġrugisuugitin isumatuuqhutiŋ piḷuusiqirauruat.

²⁸ Annautisuugitin piunialaitchuat, qumalluktiłługich aglaan tamatkua piunialaruat.

²⁹ Ataniiq, qaummatiqaqtitkigma; Atanġum qaummaġipsipkaġaa taaġniġa.

³⁰ Suaŋŋasiġigma maksrigvigillasipkaqługich akiḷḷiitka akiiḷiḷḷasipkaqługiḷḷu payaŋaiqsruutikkaluaŋich.

³¹ Unauvva God—qanutun naamaruagutigivat savaaŋich! nalupqinaisigivallu uqalugiraich! Arriḷiñaqtuq akkiaġaunmun ivaaruanun ikayuusiaqaġukhutiŋ Ilaaniñ.

³² Ataniq kisimi God-auruq; God kisian annaksimaaġvigigikput.

³³ Ilaata God-im suaŋŋaksaġuugaaŋa; iglauyaaġa navianniuġutaisitkaa.

³⁴ Ilaata tuttiviksraġiksitkaaŋa tuttutun; navianniuyuił̣ł̣uŋaasii iġġiqsiuġaluaqama.

³⁵ Aŋuyakkumiññaksaaġaġigaaŋa, atuġumiññaksaaqtiłługu suaŋaniqtaq pisiksi.

³⁶ Ataniiq, piyaqquutaisitkigma annautivluŋalu; qaunakkutikpich piḷgupkaġaaŋa.

³⁷ Iraqturuakuaqtitkiŋma, aasii ulġupkalaitkaaŋa.

³⁸ Maliqsraqapkich akiḷḷiitka akiiḷiraġigitka; Nutqautisuitkitka suksraaqqaaŋaunnagich.

³⁹ Ulġunnaptiŋ makitchumiñaitchut; ulġuraqtut sivuġamnun.

⁴⁰ Ilvich suaŋŋasiġigma aŋuyaksaġniksramnun akimmasiqł̣uŋalu akiḷḷiimniñ.

⁴¹ Ilvich akiḷḷiitka qimaapkaġitin uvamniñ; suksraunġiġitka uumigiritka;

⁴² Ikayuqtisiulagaluaġaqtut, aglaan annaurriksraitchut; ququulagaluaġmiraġigaat Ataniq, aglaan kiulaitkaich.

⁴³ Karugmiraġigitka, avyutun iḷipkaqługich; tuŋmalugiraġigitka aqiyatun apqutiniittuatun.

⁴⁴ Annautigigma paaqłaŋaruaniñ iñugniñ atanniqsuipkallasivḷuŋaasii nunaqpagnun; iñuich nalukkatkaa aŋalataġiliqł̣ugich.

⁴⁵ Allaniñ nunaniñŋaqtuat taluġiraġigaanŋa; tusaapqauraġamiŋ uvapkun, kamagiraġigaanŋa.

⁴⁶ Nikasuliġaqtut; uullaġruaqtun qairaqtut annaksimaaġvigmiŋniñ.

⁴⁷ Ataniq iñuuruq! Nanġaqsiuŋ sapunniaqtiga! Nivlirausiġisiuŋ kamanaqtuaguniŋa God-im annaurrigma!

⁴⁸ Akimmasiġaaŋa akiḷḷiimniñ; akiisitaġaich nunaqpauruat atanniqsuqtamni.

⁴⁹ Aasii annautivluŋa akiḷḷiimniñ. Ataniiq, akimmasiġigma akiḷḷiimniñ suli annautivluŋa pił̣ł̣aktaqtiniñ iñugniñ.

⁵⁰ Tainnamik nanġaġikpiñ akunġanni nunaqpaich; Atuqtuŋa nanġautinik iliŋnun.

⁵¹ God-im kamanaqtuanik akimmasiġaa umialiñi; maniuġaa nuŋulaiḷaaq nakuaqqunni ilaan naliġaamiñun, David-mun kiŋuvaaŋiññullu taimuŋa isuitchuamun.