2 Samuel 21 - Iñupiatun Mumiksat Uqalugiksuat

Saul-gum Kiŋuvaaŋich Tuqutaurut

¹ David-gum umialguniŋani niqaiḷḷiuqpaŋarut piŋasut ukiut naałługich. Tavraasii David-gum kaŋiqsiuġutiŋagaa aŋaiyyuvluni Ataniq-mun taaptumuuna, aasii Ataniq uqallaktuq, “Saul-lu iḷaniḷu iñuaqtuŋarut; tuqunŋagaich iñuŋich Gibeon-gum.”

² Iñuŋich Gibeon-gum Israel-miuguŋitchut; Amor-miugurut. Israel-miuguruat unniqsuqłiiŋaraŋich qaunaginiaġnivḷugich, aglaan Saul-gum tuqunnialaŋagaich tavrakii suaŋatquvlugik Israel-lu Judah-lu.

³ Tavraasii David-gum qaitquŋagaich iñuŋich Gibeon-gum aasii uqallautivlugich, “Qanuq ikayuġumiñaqpisigiŋ? Aŋalamaqłuusiaqsi iluaqsisukkiga, pilluataqtitchumagisi Atanġum iñuŋich.”

⁴ Iliŋisa kiuŋagaat, “Atiŋirrutikput Saul-kullu iḷaŋigullu iluaqsiḷiġumiñaitkaat qatiqtuallu kaviqsuallu maniich, naaggaunnii tuqutchisuŋitchugut Israel-miuguruamik.” “Suutitquvisiasii uvamnun?” David-gum apiġigaich.

⁵ Iliŋisa kiugaat, “Saul-gum suksraunġiġuŋagaatigut atausimikunnii iḷakugaluaġnata nunaŋani Israel.

⁶ Ki, qaitkich tallimat malġuk aŋutit kiŋuvaaŋich, tuqunniaġivut sivuġaani Atanġum Gibeah-mi, aimaaġviani Saul-gum, Atanġum umialiksraqtaaŋata.” “Qaiññiaġitka ilivsiññun,” umialgum kiugaich.

⁷ Aglaan pisigivlugu qiksigñaqtuaq unniqsuqłiisiktik David-gumlu Jonathan-gumlu, David-gum supkaŋaitkaa Jonathan-gum iġñiŋa Mephibosheth, Saul-gum tutaalua.

⁸ Aglaan umialgum piŋagaik Armoni-ḷu Mephibosheth-lu, iġñiŋik Saul-gumlu Rizpah-mlu, paniŋata Aiah-m; piŋammigaich suli tallimauruat iġñiŋich Saul-gum paniŋata Merab-guvlu Adriel-guvlu, iġñiŋata Barzillai-m, Meholah-ġmium.

⁹ David-gum qaiñŋagaich Gibeon-miunun, aasii tuqunŋagaich iġġimi sivuġaani Atanġum—aasii iluqatik tallimat malġuuruat tuquŋarut atautchikun. Upinġaayasimman, palauvaksranik kivluiñaqsimmiuġlu tuqutauŋarut.

¹⁰ Tavra Saul-gum nukaġaŋa Rizpah, paniŋa Aiah-m, miitchuunmik uquuttaliuŋaruq uyaġagmi timit irviani, aasii tavraniinŋaruq kivluiñaqsimmanqaŋa sialugnaqsiḷġataqtillugu ukiaksraami. Uvlumi qupałuich ayaktuġaġigaich timiniñ, aasii unnuaġman niġrułługnun pitchaiḷimmivḷugich.

¹¹ David tusaagami suŋatilaaŋanik Rizpah,

¹² aiŋagai sauniŋich Saul-guvlu iġñiŋatalu Jonathan-gum iñuŋiññiñ Jabesh-gum Gilead-miittuam. (Tigliŋaraŋich kasimmaviŋmiñ Beth Shan-mi, Philistia-ġmiut niviŋŋaŋaraŋich tuqunnamirruŋ Saul Mount Gilboa-mi.)

¹³ David-gum isaŋagaich sauniŋich Saul-guvlu Jonathan-guvlu suli tallimat malġuk aŋutit tuqutauŋammiruat sauniŋich.

¹⁴ Tavra iḷuviŋagaich sauniŋich Saul-guvlu Jonathan-guvlu iḷuviŋanun Saul-gum aapaŋata Kish-gum, Zela-mi nunaŋani Benjamin-gum, umialgum tillisaatun. Taamna pianigman God-im kiuŋagaich aŋaiyyutiŋich nunamiktigun.

Aŋuyagmatigich Philistia-ġmiut Iñukpasuŋich

¹⁵ Aŋuyavsaaŋalgitchut Philistia-ġmiullu Israel-miullu, aasii David-lu aŋuyaktiniḷu aŋuyagiaŋagaich Philistia-ġmiut. Aŋuyallaġmik David piḷaiŋaruq.

¹⁶ Iñukpasuum atiqaqtuam Ishbibenob-mik, tigumiaqłuni panamik savaaguruamik patukpagmiŋ uqumaisigiruamik tallimat malġuk avvagmik iḷavlugu pounds-tun suli nutaamiglu savikpaqaqhuni, tuqutchumiñaġasugiŋagaa David.

¹⁷ Aglaan Abishai-m iġñiŋata Zeruiah-m annautiŋagaa David, aasii tuqułługu iñukpasuk. Tavra David-gum iñuŋisa David unniqsuqłiipkaŋagaat malitqigñiaŋiññivḷugu aŋuyagiaqpata. “Ilvich niġiukkutigigaatin Israel-gum, aasii tammaisuŋitkivsigiñ,” uqallautigaat.

¹⁸ Taamna pianigman aŋuyalgitkaich Philistia-ġmiut Gob-mi, aasii tavrani Sibbecai-m Hushah-ġmium tuqunŋagaa iñupasuk atiqaqtuaq Saph-mik.

¹⁹ Aŋuyavsaaŋarut Gob-mi aasii Elhanan-gum iġñiŋata Jair-m Bethlehem-mium tuqunŋagaa Goliath Gath-miu, nauligautaa siḷiktigiŋaruq kalikuliuġutit qiruatun.

²⁰ Aŋuyalgitchut Gath-mi, tavrani iñukpasuk inniqsuq. Argaŋich isigaŋiḷḷu iñugauraqallaaniqsut itchaksrallaanik.

²¹ Kipagimagaich Israel-miuguruat, aasii Jonathan-gum, iġñiŋata Shammah-m, David-gum aniqataata tuqunniġaa.

²² Taapkua sisamat kiŋuvaagumarut iñukpasuŋiññun Gath-gum, aasii David-gum aŋuyaktiŋisalu tuqunŋagaich.