2 Samuel 20 - Iñupiatun Mumiksat Uqalugiksuat

Sheba-m Paaqłautaa David-mun

¹ Iññuqłuk Gilgal-miinniqsuq atiqaqtuaq Sheba-mik, iġñiŋa Bikri-m, maŋŋuqaqtuaq Benjamin-mik. Nipauqłuktaqqaaqłuni uqallagniqsuq, “Suliqutigiŋitkikput David! Maligniaŋitkikput! Aŋutauruasii Israel-mi, aisa!”

² Tavraasii Israel-miuguruat qimagniġaat David aasii malikługu Sheba, aglaan iñuŋisa Judah-m nayuġniġaat David aasii malikługu Jordan-miñ Jerusalem-mun.

³ David tikiññami igluqpagmiñun Jerusalem-mi, atautchimugniġaich qulit tuvaaqanmi nukaġaŋich igluqpagmik qaunaksriruat, aasii qaunaksriḷiqł̣ugich. Qaunagiŋagaich aglaan tuttaaqasiŋaitkaich. Tavraniitinŋagaich iñuuniqtutilaaŋatiktun, iñuuvlutiŋ uiḷgaŋaratun.

⁴ Umialik uqallaktuq Amasa-mun, “Katitkich iñuŋich Judah-m aasii qaġġisilugich uvlaakutqiqpan.”

⁵ Amasa-m katitchaqtuġniġaich aglaan utiŋiñŋaruq umialgum piviksriutaatun.

⁶ Tavraasii umialigum uqallautiniġaa Abishai, “Sheba-m siġġaqipkałhaaġniaġaatigut Absalom-miñ unnii. Aŋuyaktitka kaluġlugich ivaġiaġuŋ, iḷaanniuvva sapukutaqpaligaanun inillagniaqtuq aasii uvaptigniñ annaguni.”

⁷ Tavraasii Joab-gum aŋuyaktiŋich, umialgum qaunaksriŋich, suli iluqaisa aŋuyaktit aullaŋarut Jerusalem-miñ Abishai piqasiqł̣ugu ivaġiaqługu Sheba.

⁸ Tikiñmarruŋ uyaġagruaŋa Gibeon-gum, Amasa-m kasuŋagaich. Joab annuġaaqaŋaruq aŋuyaunnanik, savikpaqaġmiuq puuŋani tiġiksraŋanun ataruamik. Qaiñmuktillugu savikpaŋa kataŋaruq.

⁹ Joab-gum uqallautigaa Amasa, “Qanuġitpich avilaitqatiiŋ?” aasii tiguvlugu umiŋa taliqpimiñik kunigukługu.

¹⁰ Amasa-m qaunagiŋaitkaa savikpak Joab-gum tigumiaŋa saumimiñi, aasii Joab-gum kapiŋagaa narraaŋagun, aasii ilġaviŋich maqiŋarut nunamun. Tavraŋŋatchiaq tuquŋaruq, aasii Joab-gum kapivsaaqtuksrauŋaitkaa. Tavraasii Joab-lu aniqatiniḷu Abishai aullaŋaruk ivaġiaqługu Sheba.

¹¹ Iḷaŋat Joab-gum aŋuyaktiŋisa makinŋaruq Amasa-m timiŋata saaŋani aasii uqallakłuni, “Iluqasi Joab-mullu David-mullu piqatausuktuasii maliksiuŋ Joab!”

¹² Amasa-m timaa aukviiññaq qitqaniinŋaruq apqutim. Joab-gum aŋuyaktiŋisa iḷaŋata tautuŋagaich iluqaġmiŋ nutqaqtuat timaanun, tavraasii kalinŋagaa timaa apqunmiñ nunaraamun aasii matuvlugu uligmik.

¹³ Timaa nuunmarruŋ apqunmiñ, iluqaġmiŋ malinagutiŋagaat Joab ivaġiaqługu Sheba.

¹⁴ Sheba igliŋaruq nunapayaaŋisigun maŋŋuuruat Israel-mun aasii inimukłuni Abel Beth Maacah-mun, aasii iluqaġmiŋ kiŋuvaaguruat Bikri-mun katinŋarut aasii malikługu inimun taaptumuŋa.

¹⁵ Joab-gum aŋuyaktiŋich tusaaŋarut Sheba tavraniinnivḷugu, tavraasii taamna ini avałługu piyuaqsiŋagaat. Mayuaġaġviḷiuŋarut katchiŋanun inim aasii suli ulġupkaġnianagutiŋagaat katchiŋa.

¹⁶ Isumaturuam aġnam tavraniinniqsuam saqłautiŋagaich katchimiñ, “Atta! Atta! Joab pisiuŋ qaitqulugu; uqaqatigisukkiga.”

¹⁷ Joab-gum ullagniġaa aasii aġnam apiġigaa, “Joab ilvich?” “Ii, tavra uvaŋa,” ilaan kiugaa. “Naalaġniŋŋa, aŋutii,” aġnaq uqallaktuq. “Naalaġniruŋa,” kiugaa.

¹⁸ Isumaturuaq aġnaq uqallaktuq, “Qaŋasaaq uqallaġuuŋaruat, ‘Nunaaqqimun Abel-mugłutin iḷitchuġiyyaġiñ iḷisimasuktaġnik’—tavraasii tainna piraqtut.

¹⁹ Inikput innilluatauruq, iḷauruq tutqigñałhaaqtuanullu ukpiġnałhaaqtuanullu Israel-miittuanun. Summan siquminniaqpisiuŋ? Suksraunġiġukpisiuŋ Atanġum piŋa?”

²⁰ “Tainna piḷġataġumiñaitchuŋa!” Joab-gum kiugaa. “Maqulġataġumiñaitkiga suksraunġiġataġumiñaitkigalu iniksi!

²¹ Taamna piyummatigiŋitkikput. Aŋun atiqaqtuaq Sheba-mik iġñiŋa Bikri-m, qimiġaŋiññiñ Ephraim qaiŋaruaq, paaqłarraqsipiaġataŋagaa Umialik David. Qairruŋ taamna aŋun, aasii aullaġniaqtuŋa uvaŋŋa inimiñ.” Isumaturuaq aġnaq uqallaktuq, “Niaquŋa miḷuqsautiniaġikput katchim qulaagun ilivsiññun.”

²² Aġnaq aullaŋaruq inim iñuŋiññun isummatigiŋaramiñik, aasii niaquiqł̣ugu Sheba niaquŋa miḷuqsautiŋagaat katchim qulaagun Joab-mun. Joab nipauqłuktaŋaruq aullaquvlugich aŋutini taaptumaŋŋa inimiñ, aasii aiŋarut. Joab utiŋaruq Jerusalem-mun umialigmun David-mun.

David-gum Atanauraŋich

²³ Joab qaukłiuŋaruq aŋuyaktiŋiññun Israel-gum; Benaiah iġñiŋa Jehoiada-m qaukłiuŋaruġli David-gum qaunaksriŋiññun;

²⁴ Adoniram-li qaukłiuŋaruq nunurirauruanun savaktinun; Jehoshaphat iġñiŋa Ahilud-gum maqpiġarriqirauŋaruq;

²⁵ Sheva makpiġarriqirauŋaruq; Zadok-lu Abiathar-lu aŋaiyyuliqsiqpauŋaruk,

²⁶ aasii Ira, maŋŋuqaqtuaq Jair-miñ, David-gum aŋaiyyuliqsiqpaŋiññun iḷauŋammiuq.