2 Samuel 19 - Iñupiatun Mumiksat Uqalugiksuat

Joab-gum Siḷġiqsuġaa David

¹ Joab kiliktauruaq Umialik David qirrugnivḷugu suli qiñunivḷugu Absalom pisigivlugu.

² Tavraasii quviasuutiksrakkaluamigñin akimagamik simmausiŋaruq ipiqtusuunmik iluqaiññun David-gum aŋuyaktiŋiññun tavrani uvlumi, qanukkii tusaavlutik umialik qiñunivḷugu iġñiġmiñun.

³ Utiŋarut iniqpagmun nipaiḷaaqłutiŋ, aŋuyaktitun kanŋusuutikun qimaktuatun aŋuyaktuaniñ.

⁴ Umialgum matuŋagaa kiiñani aasii nipaalaŋaruq nipatuvluni, “Araa iġñiiŋ! Iġñiġa Absalom! Absalom, iġñiġa!”

⁵ Joab umialgum igluanuŋaruq aasii uqallautivlugu, “Uvlupak uvva anmuqsruġitin aŋuyaktitin—annaurritin tuqqunmiñ suli annaurriruat iġñiġutiikpiḷḷu, paniutikpiḷḷu, tuvaaqatiikpiḷḷu, suli nukaġaqpiḷḷu iñuggutiŋiññik.

⁶ Akiḷḷiqsruġitin uvva piqpagiritin suli tunulliḷiqsruqługich uumigiritin! Nalunaiġiñ uvva atanauratillu iñuktillu suliqutigiŋisilaaŋat. Nalunaiġiñ uvamnun quviagigayaqtilaaŋa Absalom iñuukpan uvlupak aasii iluqata uvagut tuqutauŋaluta.

⁷ Aniḷutin qapiŋaisaaġiakkich aŋuyaktitin. Uqallaktuŋa takkuani Atanġum atqata tainnaŋisuaġuvich, atausim unnii itqasiġñiaŋitkaatin uvlaami. Tavra taamna piḷugniqsrauluni piaġiinñiqtauniaqtuq iñuuniqtutilaaġni.”

⁸ Tavra umialik makinŋaruq, aasii aquptaaqhuni qaniŋani iniqpaum paaŋata. Iñuŋich tusaaŋarut tavraniitilaaŋanik, aasii avanŋagaat. Taamna igliqtillugu iluqaġmiŋ Israel-miuguruat qimaaŋarut aimaaġviḷḷaamignun.

David Utiqsaŋaruq Jerusalem-mun

⁹ Nunapayaami qanaanagutiŋarut avanmun. “Umialgum David-gum annautiŋagaatigut akiḷḷiiptigniñ,” avanmun uqautirut. “Annautiŋagaatigut Phillistia-ġmiuguruaniñ, aglaan akkupak qimaŋaruq Absalom-miñ aasii nunaptigniñ aullaqhuni.

¹⁰ Absalom umialiksraqtaaġiraqput, aglaan tuqutauŋaruq aŋuyaktuani. David una umialiguqtitqiġlakput.”

¹¹ Uqausiġiraŋisa Israel-miuguruat tikiñŋagaat Umialik David. Tavraasii tiliŋagaik aŋaiyyuliqsiqpaak Zadok-lu Abiathar-lu apiqsruquvlugich aullarriŋich Judah-m inna, “Summan ilivsi aqulliuruksrauvisi utiurrisaqtuani umialigmik igluqpamiñun?

¹² Ilivsi uvva iḷagigivsi, nanmiñiq; summan aqulliuruksrauvisi utiutisaġuvsiñŋa?”

¹³ David-gum suli tilimmigaich uqallautitquvlugu Amasa inna, “Ilvich iḷagigikpiñ. Tavraŋŋaaglaan aullarriġuġniaġikpiñ aŋuyaktinun Joab-gum savaakkaluaŋanun. God-im tuqulliŋa tainna piŋitkuma!”

¹⁴ David uqaluŋisa iñuŋich Judah-m utiqtinŋagaich ilaanun, aasii uqalugmik tuyuŋagaat utiquvlugu kaluġlugich atanauraŋich.

¹⁵ Utillaġmi umialigum kasuŋagaich iñuŋich Judah-m Kuuŋani Jordan, qaimaruat Gilgal-mun ikaaqasiġukługu kuukkun.

¹⁶ Tavraniptauq Benjamin-mik kaŋiqaqtuaq Shimei iġñiŋa Gera-m Bahurim-miu qilamiqsruŋaruq Jordan-mun kasuġukługu Umialik David.

¹⁷ Piqatiqaġniqsuq 1,000-tun iñugiaktigiruanik iñugnik kaŋiqaqtuanik Benjamin-mik. Ziba, kivgauruaq Saul-gum nanmiñiq iḷaŋiññun, qaimammiuq piqatigivlugich akimiat (15) iġñiġutini suli iñuiññauruat (20) kivgat, aasii tikił̣ł̣utik Jordan-mun sivulikługu umialik.

¹⁸ Ikaaġniġaat kuuk ikaaġutiyyaqługich umialigum qaiqatiŋich suli savautisukługu umialik qanuġliqaa. Umialik itqanaiyaqtillugu ikaaqsaqhuni, Shimei punŋaruq saaŋanun

David-gum Aŋalalluataġaa Shimei

¹⁹ aasii uqallakhuni, “Umialikpaak, suliqutigiŋaiŋŋa killukuaqama taimani uvlumi aullaqavich Jerusalem-miñ. Uvamnun killuqsruutiginagu naagga isumagitqigñagu.

²⁰ Iḷisimaruŋa, aŋutii, piḷuusiqiŋatilaamnik, aasiuvva tainnamik uvlupak sivulliuruŋa salliġmi maŋŋuqaqtuaniñ paaqsiruaniñ iliŋnik, Umialguruatiin.”

²¹ Abishai iġñiŋa Zeruiah-gum uqallaktuq: “Shimei tuqutaksrauruq qanukkii pimakłuktaġaa Atanġum umialiksraqtaaŋa.”

²² Aglaan David-gum uqallautiŋagaik Abishai-ḷu aniqataalu Joab, “Kia uqallaquraatin? Piñaiḷutaġniaqpiŋa? Uvaŋauvva paŋmapak umialiguruŋa Israel-mun, aasii kiñaunnii Israel-miuguruaq tuqutauniaŋitchuq uvlupak.”

²³ Aasii uqallautigaa Shimei, “Unniqsuqłiigikpiñ uvaŋa tuqutauniaŋitchutin.”

David-gum Qiñiqtitkaa Naglikkunni Mephibosheth-mun

²⁴ Tavra Mephibosheth, tutaalua Saul-gum, qaiŋaruq kasuġiaqługu umialik. Isigani iqaġiŋaitkaich, umŋiyaŋaitchuq, naagga iqaġiŋaitkaich annuġaani umialik qaŋa aullaġman Jerusalem-miñ utiġataqtillugu surruutaił̣ł̣uni.

²⁵ Mephibosheth tikiñman Jerusalem-miñ kasuġiaqługu umialik, umialigum uqallautigaa, “Mephibosheth, maliŋitchaġma. Summan?”

²⁶ Ilaan kiugaa, “Umialikpaak, iḷisimarutin pisualaitchuaŋa. Uqallautiraġa kivgaġa aquppiviksralluataqaquvlugu kakaktiga maligukłutin aglaan aitchuutigiŋagaaŋa.

²⁷ Sagluuġutigiŋagaaŋa iliŋnun Umialiik, aglaan ilvich ittutin God-im isaġuliŋatun, tavraasii ilvich iluaġirakkun piiñ.

²⁸ Iluqata aapaa iḷaŋich tuqutchumiñaŋagaluaġitin, Umialiik, aglaan niġipkaŋagiŋma niġġivigñi. Apiqsritqikkumiñaitchuŋa sumik iliŋniñ, Umialiik.”

²⁹ Umialigum kiugaa, “Uqallavsaaġnak. Suvunniŋaruŋa ilviḷḷu Ziba-vlu piginiaġiksik Saul-gum nunaŋa.”

³⁰ “Ziba-m pigiliuŋ iluqaan,” Mephibosheth-gum kiugaa. “Naamaruq uvamnun ilvich umialik aimman surruutaił̣ł̣uni.”

David-gum Qiñiqtitkaa Naglikkunmik Barzillai

³¹ Barzillai, Gilead-miu, qaiŋammiuq Rogelim-miñ ikaaqasiġiaqługu umialik Jordan-kun.

³² Barzillai utuqqanaaq sisamakipiatun (80) ukiulik. Umialgumaruq aasii niqiqaqtinŋaniġaa umialik Mahanaim-miinman.

³³ Umialigum uqallautiniġaa, “Maliŋŋa Jerusalem-mun, aasii uvaŋa qaunaginiaġikpiñ.”

³⁴ Aglaan Barzillai-m kiuniġaa, “Iñuuqpagniaŋitchuŋauvva; summan maligniaqpigiñ Jerusalem-mun?

³⁵ Uvva sisamakipiatun (80) ukiutun iñuuganiktuŋa, aasii supayaaq qaamagiŋaiŋagiga. Naisiḷḷaiŋaruŋa niġigama naagga imiġama, suli tusaallaiŋagitka atuqtuat. Piñaiḷutausiññaġniaqtuŋa iliŋnun Umialikpaak.

³⁶ Akiññaktuksrauŋitchuŋauvaŋa. Qaaŋił̣auraqsiññaġlugu kuuk Jordan piqasiġñiaġikpiñ.

³⁷ Aasii utiqtitchaġiŋma aiñmun tuquyumauŋa qaniŋagni aŋayuqaaġma iḷuviġviŋakta. Uvva iġñiġa Chimham savautiniaġaatin; aullauttuuŋ, Umialikpaak, aasii iluaġirakkun aŋalallugu.”

³⁸ Umialigum kiugaa, “Aullautiniaġiga aasii aŋalallugu qanupayaaq pitqugumŋa. Aasii suli sutqupayaaġumŋa piñiaqtuŋa.”

³⁹ Tavraasii David-lu iluqatiglu iñuŋisa ikaaŋagaat Jordan. Kuniŋagaa Barzillai suli aŋaiyyutivlugu, aasii Barzillai aiŋaruq.

Judah-mlu Israel-gumlu Qanaaġutigiŋagaak Umialik

⁴⁰ Umialik ikaaġami Gilgal-muŋaruq piqatiqaqłuni Judah-ġmiunik suli avvaŋiññik Israel-miut, suli Chimham-gum maliŋagaa.

⁴¹ Israel-miuguruat ullaŋagaat umialik aasii uqallautivlugu, “Umialikpaak, summan aniqatiivullu iñuŋiḷḷu Judah-m, isumaŋavat suiḷauriḷutin ilviḷḷu, iḷatillu, suli aŋuyaktitin, ikaaġutiyumiñaqnasugivlugi Jordan-kun?”

⁴² Iñuŋisa Judah-m kiuŋagaat, “Tainnaŋarugut qanukkii umialik iḷagigikput. Tainnaġapta summan qinnaliqpisi? Niqiptignik akiḷiutiŋaitkaatigut naaggaunnii sumik aitchuŋaitkaatigut.”

⁴³ Israel-miuguruat kiuŋagaich, “Uvagut qulitun aglaan pigiłhaaġniyumiñaġikput ilivsiññiñ Umialik David, ilivsiññun iḷaugaluaqtillugu. Summan suuŋiḷaġivisigut? Piiguġnasi uvagut utiutisukługu uqaqqaaŋarugut!” Aglaan Judah-ġmiut qanaałhaaŋarut piginivḷugu iñuŋiññiñ Israel.