2 Samuel 18 - Iñupiatun Mumiksat Uqalugiksuat

Absalom Akiiḷirauruq suli Tuqutauruq

¹ Umialik David-gum katinŋagaich iluqaisa aŋuyaktini, avillaaŋagaich 1,000-tullu, tallimakipiatullu (100), aasii atanauraliḷḷaamivlugich.

² Aullaqtinŋagaich piŋasuułługich, Joab-miglu aniqataaniglu Abishai-mik suli Ittai-mik Gath-miumik qaukłiqallaavlugich. Aasii umialik uqallaŋaruq aŋuyaktimiñun, “Maligniaġivsi uvaŋa.”

³ “Maliktuksraġiŋitkivsigut,” kiugaat. “Allauniaŋitchuq akiḷḷiptignun uvagut utinmun qimakkupta, naaggaunnii avvavut tuqutaukpata; aglaan ilvich kisivich uvaptiktun ittutin 10,000-guvluta. Nakuułhaaġniaqtuq maaniitkuvich iniqpagmi aasii ikayuqtiksraptignik aullaqtitchiḷutin.”

⁴ “Piñiaqtuŋa ilvich iluaġniqsraunasugirapkun,” umialgum kiugaa. Tavraasii makitaŋaruq saniġaani upkuaqpaum aŋuyaktini avluġaaqtillugich aniñmun 1,000-gullaavlutiglu, tallimakipiagullaavlutiglu (100).

⁵ Piraksriġaich Joab-lu, Abishai-ḷu Ittai-ḷu: “Uvaŋa pisigiluŋa anniġñasiuŋ nukatpiaq Absalom.” Iluqaġmiŋ aŋuyaktit tusaaŋagaat David piraksriimman atanauramiñun.

⁶ David-gum aŋuyaktiŋich nunaraamuŋarut aasii aŋuyakługich Israel-miut Ephraim-gum Napaaqtuŋiññi.

⁷ David-gum aŋutiŋisa Israel-miuguruat akiiḷiŋagaich; atqunaq akiiḷiŋagaich, 20,000-tun iñugiaktigiruat tuqułługich tavrani uvlumi.

⁸ Aŋuyaŋarut nunaraami iluqaani aasii iñugiałhaaŋarut tuquruat napaaqtuni aŋuyaktuaniñ tuquruaniñ.

⁹ Tavraŋŋatchiaq Absalom-gum kasuŋagaich David-gum aŋuyaktiŋich. Absalom kakaksiqsuaq, aasii ataaguallaġmi oak-gum napaaqtuqpaum, niaquŋa naktinŋaruq qisiqsiutiŋiññun. Kakaktiŋa nutqaŋaitchuq aasii Absalom uniñŋagaa niviŋavlugu.

¹⁰ Iḷaŋata David-gum iñuŋisa qiñiŋagaa aasii quliaqługu Joab-mun, “Aŋutii, tautuktaġa Absalom niviŋaruaq napaatumi!”

¹¹ Joab-gum kiugaa, “Tautuŋaniġupku, summan tuqunŋitchan tavrauvvaa? Imma uvaŋa aitchuġayaġikpiñ qulinik qatiqtuanik manigñiglu aŋuyaktivlu tavsianik.”

¹² Aglaan aŋutim kiugaa, “Aitchuġaluaġumŋa 1,000-tun iñugiaktigiruanik qatiqtuanik manigñik, argamnik anniġumiñaitkiga umialgum iġñiŋa. Iluqata tusaaŋagikput umialik piraksriġmasi ilviḷḷu Abishai-ḷu Ittai-ḷu, ‘Uvaŋa pisigiluŋa anniġñasiuŋ nukatpiaq Absalom.’

¹³ Aglaan kamagigaluaġnagu umialik tuqunŋagupku Absalom, umialik tusaagayaqtuq—tusaasuuruq supayauranik—ilvich sapunniaġayaitkigma.”

¹⁴ “Utaqqisiññaġniaŋitchuŋa uvani iliŋni,” Absalom Joab uqallaktuq. Piŋasunik pananik tigusivḷuni kapiŋagaa satqaŋagun Absalom iñuuŋŋaan, niviŋaruaq napaaqtumi.

¹⁵ Aasii qulit Joab-gum aŋuyaktiŋisa avałługu Absalom tuqunŋagaat.

¹⁶ Joab-gum nipauqłuktaqtinŋagaa aŋuyaŋaiquvlugich, aasii aŋuyaktiŋich utiŋarut maliqataŋaiqł̣ugich Israel-miuguruat.

¹⁷ Absalom-gum timaa pivḷugu kataktinŋagaat iḷuqsraqpagmun napaaqtut iḷuanni, aasii matuvlugu uyaġagnik. Iluqaġmiŋ Israel-miuguruat qimaŋarut nunaaqqimignun.

¹⁸ Iñuuŋŋaġmi Absalom nappaiŋamaruq napaqutamik inmiñun Umialgum Natiġnaŋani, qanukkii ilaa iġñiġił̣ł̣uni kiŋuvaaksramiñik. Tavraasii atchiŋaniġaa atiġmiñik, aasii paŋmanun aglaan taiguġaat Absalom-gum Nalunaiñŋutaa Napaqutaq.

David Kilikkaat Absalom-gum Tuqutauniŋagun

¹⁹ Tavra Ahimaaz iġñiŋa Zadok-gum uqallaktuq Joab-mun, “Aqpalluŋa kiligiaġlagu umialik Ataniġmun annautitilaaŋanik akiḷḷiiŋiññiñ.”

²⁰ “Naumi,” Joab uqallaktuq, “uvlupak tusaayugaaqtitchiñiaŋitchutin. Allami uvlumi piyumiñaqtutin aglaan uvlupaŋiḷaaq, qanukkii umialgum iġñiŋa tuqutauruq.”

²¹ Tavra uqallaktuq Ethiopia-ġmiuguruamun kivgamiñun, “Aullaġiñ aasii uqallautilugu umialik tautuktaġnik.” Kivgaq putqaaqhuni aullaŋaruq aqpamik.

²² Ahimaaz qasiḷipiaqtuq, “Suna pigaluaġli; kiliksiyyaġuktuŋa.” “Summan uvva pisukpich, iġñiiŋ?” Joab-gum apiġigaa. “Akiññautiginiaŋitkiñ.”

²³ “Suna pigaluaġli,” Ahimaaz uqallavsaaqtuq, “Aullaġuqtuŋa.” “Kiami aullaġiñ,” Joab uqallaktuq. Tavraasii Ahimaaz aqpamik aullaŋaruq taunuuna apqutikun Jordan Valley-kun, aasii qaaŋiqsaaqługu kivgaq.

²⁴ David aquppimaruq akunġagni iḷulliuvlu siḷalliuvlu upkuaqpaak. Iñuk nasitchaqtuġniqsuq upkuaqpaum qulaanun aasii tautukługu aŋun aqpattuaq.

²⁵ Ququulavlugu tasamuŋa uqallautiniġaa umialik, aasii umialgum uqallautivlugu, “Kisimi qaiñiqpan, qaġġirriruq tusaayugaaġiksuanik.” Aqpattuaq qallisiiññaqtuq.

²⁶ Nasiqsruqti tautuvsaalgitchuq aŋunmik aqpattuamik, aasii tasamuŋa uqallautilgitkaa upkuamik qaunaksri, “Tautukhii! Allasuliavva aqpattuaq!” Umialgum kiugaa, “Taamnaptauq qaġġirrimmiuq tusaayugaaġiksuanik.”

²⁷ Nasiqsruqti uqallaktuq, “Avvakiaq sivulliq aŋun aqpattuq Ahimaaz-tun.” “Iñulluatauruq,” umialik uqallaktuq, “aasii qaġġirrimmiuq tusaayugaaġiksuanik.”

²⁸ Ahimaaz-gum paġlaŋagaa umialik, pułłuni nunamun sivuġaani uqallaktuq, “Nanġaġli Ataniq God-in, akimapkaqtaatin iñugniñ akiḷḷiqsruqtuaniñ iliŋnun umialiik!”

²⁹ “Nukatpiaq Absalom nakuuva?” umialik apiqsriruq. Ahimaaz-gum kiugaa, “Aŋutii, atanauraqpich Joab-gum tilimmaŋa, tautuktuami pialaruanik, aglaan iḷitchuġiŋitkitka sutilaaŋiññik.”

³⁰ “Ikuŋaqtaallagiñ,” umialgum uqallautigaa; aasii taikuŋaqhuni makitaŋaruq.

³¹ Tavra Ethiopia-ġmiu kivgaq tikiñŋaruq aasii umialik uqallautivlugu, “Tusaayugaaġiksuat uvva Umialikpaak! Uvlupak Atanġum akimapkaġaatin akiḷḷiiġiraġniñ!

³² “Nukatpiaq Absalom nakuuva?” umialik apiqsriruq. Kivgam kiugaa, “Akiḷḷiipayaatilluqaa ilaatun piraulich aŋutii, akiḷḷiqsruqtuallu ilignik.”

³³ Umialik qiñuqpaŋaruq. Inauramukhuni qulaaniittuamun upkuaqpaum qiaŋaruq. Mayuŋaruq uqallaġmi, “Iġñiġa! Iġñiġa Absalom! Absalom, iġñiġa! Uvaŋaimma inaŋiġḷutin tuqumalaŋa, iġñiiŋ! Absalom, iġñiiŋ!”