2 Samuel 17 - Iñupiatun Mumiksat Uqalugiksuat

Hushai-m Aullatilluataŋitkaa Absalom

¹ Tavraasii Ahithophel-gum uqallautigaa Absalom, “Iñuksraqtinŋa 12,000-tun iñugiaktigiruanik aŋutinik aasii anaqapak aullaġniaqtuŋa David ivaġiaġlugu.

² Maksrigviginiaġiga piḷaiŋaŋŋaan suli qapiŋaŋŋaan. Iqsitchagniaqtuq suli iluqatik iñuŋich qimagniaqtut. Kisian umialik tuqunniaġiga

³ aasii iliŋnun utqutilugich iluqaisa iñuŋich, nuliaksratun utiqtuatun uiksramiñun. Tuqutchisiññaqtuksraurusi atausimik aŋunmik; allat iñuich annaummiñiaqtut.”

⁴ Taamna nakuunasugiŋagaat uqallautauruaq Absalom-mullu iluqaiññullu Israel-miuguruanun aullarriñun.

⁵ Absalom uqallaktuq, “Ququulauŋ Hushai tusaayumaugut qanuġniaġmagaan.”

⁶ Hushai tikiñman, Absalom-gum uqallautigaa, “Innauvva pitqugaatigut Ahithophel-gum; kamagilakput? Kamaginiaŋitkuptigu uqallautisigut suniaqtilaaptinnik.”

⁷ Hushai-m kiugaa, “Ahithophel-gum uqallautigiraa taamna ilignun nakuuŋisimaruq.

⁸ Iḷisimarutin aapan David iñuniḷu aŋuyaktiqpaurut suli qinnallarut aġnasallutun nannutun ivaaġiksatun. Aapan aŋuyakpaalluŋitchuq suli nayulaitkaich aŋuyaktini unnuami.

⁹ Akkupak imma iriqsimasugnaqtuq qaiġusugmi naagga allami sumi. David-gum maksrigvigipqaqpagich aŋuyaktitin, kiñaliqaa tusaaruaq taaptumiŋa uqallagniaqtuq iñuktin akiiḷiñiḷugich.

¹⁰ Tavraasii aŋuyaktit uluġiiññiqsrauruat unnii, iqsiitchuat lion-tun, iqsitchagniaqtut qanukkii iluqatik Israel-miut iḷisimagaat aapan nuimavluni aŋuyaktiqpauruaq suli aŋuyaktiŋich aŋuyalgummiut.

¹¹ Tiligayaġikpiñ uvva katitqulugich Israel-miugupayaaqtuat salliġmiñ Dan-miñ aglaan kiluanun Beersheba-mun. Aŋuyaktiqaġniaqtutin iñugiaktigiruanik qaviatun taġium siñaani. Absalom, ilvich iliŋnik aŋuyagiaġutimmiḷugich.

¹² Paqinniaġikpuk David sumiitkaluaqpan, aasii maksrigvigilugu quvipiaġataġlugu. Ilaalu iñuniḷu annagviksraiññiaqtut.

¹³ Inimun qimakpan, iñuvut akłunaaligaaŋaniaqtut aasii kalillugu iniqpak unuŋa natiġnaamun. Atausiq unnii uyaġak uniktauniaŋitchuq.”

¹⁴ Absalom-lu iluqatiglu Israel-miuguruallu uqallaktut, “Hushai-m piraksriutaa nakuułhaaqtuq Ahithophel-gum piraksriutaaniñ.” Ataniq sivunniŋaruq Ahithophel-gum piraksriutaa maliġitquŋił̣ł̣ugu, iluiḷḷiuġutiqaquvlugu Absalom.

David Iḷitchuġipkaġaat aasii Annakłuni

¹⁵ Tavraasii Hushai-m uqallautiŋagaik aŋaiyyuliqsik Zadok-lu Abiathar-lu qanuq uqautiŋatilaaŋanik Absalom suli Israel-miuguruat aullarrich suli qanuġli Ahithophel-mun uqautitilaaŋiññik.

¹⁶ Hushai uqallavsaaqtuq, “Qilamik, akkupak! Aullaqtitchiiñ uqallautitqulugu David siñiktaquŋiḷḷugu kuugich ikaaġutiŋiññi nunagluktuami, aglaan ikaaqulugu Jordan qilamik, ilaalu iñuniḷu tuqutauŋitchumaut.”

¹⁷ Abiathar-m iġñiŋalu Jonathan Zadok-guvlu iġñiŋa Ahimaaz utaqqiruak maqsraluktuaŋani Enrogel-gum, qaniŋani Jerusalem-gum, qanukkii tautuquŋitpaił̣ł̣utik isiġlugu iniqpak. Kivgauruam aġnam kiliktuġiaġaġigaik sutilaaŋiññik, aasii iliŋiksali kiligiaġaġigaak Umialik David.

¹⁸ Aglaan uvlut iḷaŋanni aŋutaiyaam tautugniġaik, aasii uqallautivlugu Absalom; tavra qilamiksruqhutik iriġiaŋaruk igluanun aŋutim Bahurim-mi. Nivviaqaqtuaq siḷataani iglugmi, aasii iḷuanun atqaqhutik iriŋaruk.

¹⁹ Aŋutim tuvaaqataa uligmik piŋaruq aasii matuvlugu nivviam paaŋa suli kanġaqsruqługu palauvaksranik. Naluŋarut unnii sumi iriqsimatilaaŋiññik.

²⁰ Absalom-gum atanauraŋich tavruŋa iglumuŋarut aasii apiqsruqługu aġnaq, “Nauŋ ipkuak Ahimaaz-lu Jonathan-lu?” “Ikaaqtaŋak kuuk,” aġnam kiugai. Aŋutit ivaġaluaġaik aglaan paqinŋitkaik, aasii tavra utiŋarut Jerusalem-mun.

²¹ Aullaanigmata, Ahimaaz-lu Jonathan-lu mayuŋaruk nivviamiñ aasii quliaqtuaġiaqłutik Umialigmun David-mun. Quliaqtuaġutiŋagaak qanuq Ahithophel-gum sivunniutaanik akiḷḷiqsruqługu aasii uqallautivlugu, “Qilamik ikaaġuŋ kuuk.”

²² Tavraasii David-lu iñuniḷu ikaanagutiŋagaat Jordan, aasii uvlaaġiaġman iluqaġmiŋ ikaaganiŋagaat.

²³ Ahithophel iḷitchuġikami kamaginiaŋisilaamiñik, itqanaiqł̣ugu qimuktini utiŋaruq inimun aimaaġvigmiñun. Itqanaiyaqqaaqługich suġauttani, inmiñun qimiñŋaruq. Iḷuviŋagaat iḷamik iḷuvvivianun.

²⁴ David tikiñŋaruq iniŋanun Mahanaim ikaaqtillugich Absalom-lu Israel-miuguruallu kuuŋagun Jordan.

²⁵ (Absalom-gum qaukłiḷiutiŋaniġaa aŋuyaktinun Amasa inaŋiqł̣ugu Joab. Amasa iġñiġinigaa Jether-m Israel-miuguruam; aakagimagaa Abigail, paniŋa Nahash-gum aniqatauvluni Joab-gum aakaŋanun Zeruiah-mun.)

²⁶ Absalom-lu iñuniḷu nullaŋarut nunaŋanun Gilead-gum.

²⁷ David tikiñman Mahanaim-mun, Shobi-m kasuŋagaa iġñiŋata Nahash-gum, inimiñ Rabbah-miu Ammon-miittuamiñ, suli Machir-m iġñiŋata Ammiel-gum, Lodebar-ġmiu, suli Barzillai-m Rogelim-miñ Gilead-miu.

^28-29 Qaġġisuurriŋarut iḷutuuġuranik, qikuyyanik utkusigñik, ikuvġanik, suli niqinik David-guvlu iñuŋisalu piksraŋiññik: qanusiḷimaanik palauvaksranik, kumauranik, honey-ñik, immugniñ niqilianik, immugnik, suli imnaiñik. Iḷisimavlutik David-lu iñuniḷu kaaliġñiaqtuat, imiġuliġñiaqtuat suli piḷaiŋaniaqtuat nunagluktuami.