2 Samuel 16 - Iñupiatun Mumiksat Uqalugiksuat

David-lu Ziba-lu

¹ David-gum qaaŋił̣auraanigmauŋ qaaŋa qimiġam, tavraŋŋatchiaq Ziba-m kasuŋagaa, kivgauruam Mephibosheth-mun, malġugnik kakaktignik kaluqsimaruam usialigaagnik qulikipiatun (200) punniġnik, tallimakipiatun (100) atautchimiituanik raisins-nik, tallimakipiatun (100) atautchimiittuanik siiġñanik, suli qisigmik puumik siḷviñŋaruamik wine-mik.

² Umialigum David-gum apiqsruġaa, “Suniaqtatin ukua?” Ziba-m kiugaa, “Kakaktit Umialguruatiin iḷakpich usiaqsiġviksrautiŋich, punniġiḷḷu siiġñallu aŋutit niqiksrautiŋich, aasii wine imiksrautaat piḷaiġumik nunagluktuami.”

³ “Nauŋ imña Mephibosheth, tutaalua umialikpich Saul-gum?” umialgum apiqsruġaa. “Jerusalem-mi ittuq,” Ziba-m kiugaa, “qanukkii isummiŋaruq Israel-miunun utiqtinniaġnivḷugu inmiñun umialgutaa aapagmi Saul-gum.”

⁴ Umialgum uqallautigaa Ziba, “Sunapayauraq pikkaluaŋa Mephibosheth piksran.” “Uvaŋa kivgaġigiŋma,” Ziba-m kiugaa. “Iviġasuŋaiññaġuulakpittuq Umialiuruatiin.”

David-lu Shimei-ḷu

⁵ Umialik David tikiñman Bahurim-mun, Saul-gum iḷaŋisa iḷaŋat, Shimei iġñiŋa Gera-mgum, aniŋaruq kasuġiaqługu, uqamaqłuutiutigillaan.

⁶ Shimei-m miḷḷuunagutigaa uyaġagnik David-lu atanauraŋiḷḷu, uvvaluuvvaa David avanŋagaluaqtillugu iñugmiñullu munaqsrimiñullu.

⁷ Shimei-m uqamaqłuutivlugu uqallautigaa, “Aullaġiñ! Aullaġiñ! Iñuaqtii! Pitquramik navgiri!

⁸ Saul-gum umialgutaa piŋagiñ, aasiiuvva Atanġum tatavsaġaatin iñuaqtuqapkich iñugiaktuat Saul-gum nanmiñiq iḷaŋich. Atanġum qaiñŋagaa umialgun iġñiġnun Absalom-mun, aasii ilvich suunġiqsutin, iñuaqtialuk!”

⁹ Abishai, aakaqaqtuaq Zeruiah-mik, uqallaktuq umialigmun, “Umialiik, summan uvva uumuŋa tuquŋaramun qimmimun uqamaqłuutipkaqpich? Taikuŋaġlaŋa aasii niaquiġḷugu!”

¹⁰ “Taamna suliqutiginasiuŋ,” umialgum uqallautigaik Abishai-ḷu aniqataalu Joab. “Uqamaqłuutikpaŋa qanukkii Atanġum tilivḷugu, kiña apiqsruiyumiñaqpa summan tainnaġmagaan?”

¹¹ Aasii David-gum uqallautigai Abishai-ḷu atanauraŋiḷḷu, “Nanmiñiq iġñiġma tuqunnialagaaŋa; summan aasiuvva tupautiginiaqpisiuŋ una Benjamin-mik kiŋuniqaqtuaq? Atanġum uqamaqłuquŋagaa; suliqutigiŋaiqsiuŋ uqamaqługli.

¹² Suagguuq Atanġum iḷitchuġiniaġaa isumaaġniġa aasii simmausiġḷugu uqamaqłuutaa ikayuunmun.”

¹³ Tavraasii David-lu iñuniḷu iglauŋarut apqutikun. Shimei-m maliġuaŋagai pisuaqhuniḷi qimiġakun; uqamaqłullaġmi pisuaŋaruq suli miḷḷuuqługich uyaġagniglu nunaminḷu.

¹⁴ Umialiglu iñuniḷu piḷaiqpaŋarut tikiññamik Jordan-mun, aasii tavrani piḷaiŋaiqsiaŋarut.

Absalom Jerusalem-mi

¹⁵ Absalom-lu iluqatiglu Israel-miuguruat piqatiŋich tikitchut Jerusalem-mun, aasii Ahithophel piqatiginiġaat.

¹⁶ Hushai-m, David-gum avilaitqatilluaŋata tikiññamiuŋ Absalom, saqłaŋaruq, “Iñuuqpagli umialik! Iñuuqpagli umialik!”

¹⁷ “Nauŋ imña nakuaqqutin avilaitqatignun David-mun?” Absalom-gum apiqsruġaa Hushai. “Summan maliŋitpiuŋ?”

¹⁸ Hushai-m kiugaa, “Susugluŋa suli? Uvaŋauvaŋa maligniaġiga piksraqtaaġiraŋa Atanġum, tamatkualu iñuich, suli iluqatik Israel-miuguruat. Tamaaniitqasiġñiaġikpiñ.

¹⁹ Uvva sulikii, kiña savautiniaqpigu, piñiaŋitkupku umialigma iġñiŋa? Savausiptun aapagnun, savagniaġmiuŋa ilignun.”

²⁰ Tavraasii Absalom saanŋaruq Ahithophel-mun aasii uqallakhuni, “Tavra tikitchugut, aasii sutquvisigut?”

²¹ Ahithophel-gum kiugaa, “Tuttaaqatigiyyakkich aapakpich tuvaaqatiŋisa nukaġaŋich tamaani uniktauŋaruat qaunagitquvlugu igluqpaŋa. Tavraasii iluqaġmiŋ Israel-mi iḷisimaniaqtut aapakpich akiḷḷiġimagaatin, suli maliġuaqtitin qapiŋaivsaaġñiaqtut.”

²² Tavraasii nappaiŋarut tupiġmik igluqpaum qaaŋanun, aasii Absalom isiŋaruq aasii tuttaaqatigivlugich aapagmi tuvaaqatiŋisa nukaġaŋich.

²³ Taimani Ahithophel-gum uqaluŋich akuqtuaġiraġigaich God-miŋŋaqtatun iḷivḷugich; iluqatik David-guvlu Absalom-guvlu maluġuaŋagaich.