2 Samuel 14 - Iñupiatun Mumiksat Uqalugiksuat

Joab-gum Utiqtaksrigaa Absalom Jerusalem-mun

¹ Joab iḷisimaŋaruq Umialigmun David-mun piitchiqpaktilaaŋa Absalom,

² tavraasii qanniŋagaa isumaturuaq aġnaq iñuuniaqtuaq Tekoa-mi. Tikiñman, uqallautigaa, “Qiñuruatun piŋŋuaġiñ; qiñugavich annuġaakaatin atilugich, suli iḷḷaiqsuġnaq. Aġnatun taimaŋŋasugruk qiñuruatun inŋuaġutin.

³ Aasii umialigmugutin aasii uqallautilugu uqaluksrirrutimnik.” Tavraasii Joab-gum uqaluksriñŋagaa.

⁴ Aġnaq umialigmuŋaruq, pułłuniasii nunamun qiksikkutikun, aasii uqallakhuni, “Ikayuŋŋa, Umialikpaak!”

⁵ “Suqaġukpich?” apiqsruġaa. “Uiḷgaŋaruŋauvva, aŋutii,” ilaan kiugaa. “Uiga tuquŋaruq.

⁶ Aŋutii, malġugnik iġñiqaqtuaŋaa, aasii uvlut iḷaŋanni nautchiaqaġviġñi qinnautirraqsiŋaruk taavani nunani, iñuiḷaami, aasii igḷuata tuqułługu igḷuni.

⁷ Tavraasii, iluqaġmik iḷaŋma akiḷḷiqsruliŋagaanŋa suli qaitquvlugu iġñiġa iliŋiññun, tuqutchukługu iñuaŋammauŋ aniqatini. Tainnaqpata, iġñiġiġñiaqtuŋa. Niġiukkutaiġñiaġaanŋa suli tuvaaqatiga iġñiġiġmiḷugu, nanmiñiŋata atiŋa tammaquŋił̣ł̣ugu.”

⁸ “Aigguiñ,” umialigum kiugaa, “taamna qaunaginiaġiga.”

⁹ “Umialiik,” aġnaq uqallaktuq, “suyumapayauraġuvich, uvagut nanmiñiq, patchisauniaqtugut; ilviḷḷu iḷatillu patchisauniaŋitchusi.”

¹⁰ Umialigum kiugaa, “Iñuum anayasaaqpatin, qaġġisisaġiñ, aasii anayasaatqigñiaŋitkaatin.”

¹¹ Aġnaq uqallaktuq, “Umialiik, aŋaiyyuyumautin Ataniġmun God-ignun, iḷaga akisaġumaruaq iġñiġa tuqutaumman sapiġnałhaaqtuamik killukuaquŋiḷḷugu alla iġñiġa tuqullugu. “Unniqsuqłiiruŋa saaŋani iñuuruam Atanġum,” David-gum kiugaa, “iġñiġiñ anniqsauniaŋitchuq suuramikunnii.”

¹² “Umialiik, atausivsaamik uqallaglaŋa,” aġnaq uqallaktuq. “Ki,” kiugaa.

¹³ Aġnam uqallautigaa, “Summan sivunniulluataŋitpich God-im iñuŋiññun? Utiqtinŋaitkiñ nanmiñiq iġñiġiñ aninŋavianiñ, tavraasii iliŋnun isivġiqsaurutin akkupak uqalukkun.

¹⁴ Iluqata tuquniaqtugut; imaqtun ittugut kuviratun nunamun, utitqikkumiñaitchuatun. God-im unnii tuquruaq iñugutqiyuitkaa, aglaan umialgum utiqtitchumiñagaa anitaq.

¹⁵ Tavraasii, Umialiik, qaivḷuŋa uqautiyyaŋagikpiñ qanukkii iñuich sivuuġasaaġaanŋa, ‘aasii uvamnun uqallakłuŋa qairuŋa uqautiyyaqhutin naalaġniñiaġasugivluŋa apiqsriapkun.’

¹⁶ Naalaġniñiaġasugimaruŋa annautiniaġasugiluŋalu tuqutchiñiaqtuamiñ uvamniglu iġñimniglu aasii nunamiñ God-im aitchuutaaniñ piiġunuk.

¹⁷ Uvamnun uqallakłuŋa ilvich unniqsuqłiisikpich annautiniaġaaŋa, qanukkii umialik ittuq God-im isaġuliŋatun suli iḷisimaruq allagiigñiŋagnik nakuuruavlu piḷuktuavlu; Atanġumtuq God-ikpich itqatigilisin!”

¹⁸ Umialigum kiugaa, “Apiqsruutiksraqaqtuŋa, aasii iḷumun ittuamik kiusaġiŋma.” “Sumigliqaa apiqsruŋŋa, Umialiik,” kiugaa.

¹⁹ “Joab-gum tiliraatin?” apiqsruġaa aġnaq. Aġnam kiugaa, “Umialiik, piiḷḷaaġiyumiñaitkiga uqallautin kiuŋitchumiñaił̣ł̣utin; iluakkuaqtutin. Atanauraqpich Joab-gum tiliraani suli uqaluksrił̣ł̣uŋa.

²⁰ Aglaan tainnaŋaruq iluitchuaq iluaqsisaqługu. Ilvich umialiik isumaturutin isaġuliŋatun God-im suli iḷisimaruq supayauraqtuanik.”

²¹ Aaqaguilimman umialigum uqallautigaa Joab, “Isummiqsuŋa kamagisukhutin. Aigguuŋ nukatpiaq Absalom aasii qaġġisilugu.”

²² Joab nunamun kurraŋaruq saaŋanun David qiksigivlugu, aasii uqallakhuni, “God-im ikayuġlisin, Umialiik! Akkupak iḷitchuġiruŋa iliŋnun iviġaumagitilaamnik, qanukkii nalautitkiñ apiqsruusiġiraġa.”

²³ Tavra aullaqiŋaruq Geshur-mun aasii Absalom utqutivlugu Jerusalem-mun.

²⁴ Umialik aglaan piraksriiŋaruq Absalom umialigum igluaniitchumiñaiqł̣ugu. “Tautuguŋitkiga,” umialik uqallaktuq. Tavraasii Absalom iglumiñi iñuuŋaruq suli umialigum sivuanuŋaiñmiuq.

David-gum Suliqutigiŋaiġaa Absalom

²⁵ Allamik iñuitchuq Israel-mi aŋutigiksigiruamik Absalom-tun; sumik iluirrutaitchuq niaqumiñiñ putugumiñunaglaan.

²⁶ Nusaŋich turġuqpaŋarut, suli kipiraksraġisuugaich ukiutuaġman, takisivaiñmata naakka uqumaiḷivainmata. Nusaŋich uqumaisigiraqtut tallimatun uqumaisilaaġusiŋisun.

²⁷ Absalom piŋasunik iġñiqaŋaruq suli atausimik paniqaqhuni atiqaqtuamik Tamar-mik, aġnaġipiaġataŋaruq.

²⁸ Absalom iñuuŋaruq Jerusalem-mi malġuŋni ukiugni tautukkaluaġnagu umialik.

²⁹ Tavraasii qanniŋagaa Joab, apiqsrisitquvluni umialik ilaanun; aglaan Joab qaisuŋiñŋaruq. Absalom-gum qannivsaaġalualgitkaa, aglaan suli tavra Joab qaisuŋiñŋaruq.

³⁰ Tavra Absalom-gum uqallautiŋagaich kivgani, “Samma Joab-gum nautchiaqaġviŋa saniġaani nunagma ittuq, aasii palauvaksrat naurut tavrani. Ikipkaġiaqsiuŋ.” Tavra taavuŋaqhutik ikipkaŋagaat nautchiaqaġvik.

³¹ Joab igluanuŋaruq Absalom-gum aasii apiqsruqtaqługu, “Summan kivgaqpich ikipkaqparruŋ nautchiaqaġviga?”

³² Absalom-gum kiugaa, “Qanukkii qaisuŋiñŋarutin qanniksruqapkiñ. Umialiŋmuquvlutin piraqpiñ aasii inna apiqsruġlugu: ‘Summan unitpigu Geshur aasii qaivḷuŋa mauŋa? Nakuułhaaŋagayaqtuaq taamaniitkuma.’” Absalom suli uqallavsaaqtuq, “Savaaġitqugiga iliŋnun tautullasisukługu umialik, aasii patchisiqaġniġuma sumik, tavra ilaan tuqulliŋa.”

³³ Tavra Joab-gum ullaŋagaa Umialik David aasii uqallautivlugu Absalom-gum uqaluŋiññik. Umialigum qanniŋagaa Absalom, Absalom-gum ullakkamiuŋ umialik punŋaruq nunamun saaŋani. Aasii Umialgum paġlaŋagaa kunikł̣ugu.