2 Samuel 13 - Iñupiatun Mumiksat Uqalugiksuat

Amnon-lu Tamar-lu

¹ David-gum iġñiŋa Absalom aniqatiqaqsimaruq, aġnagiksuamik niviaqsiamik atiqaqtuamik Tamar-mik. Amnon-gum, iḷaŋata David-gum iġñiŋisa, nakuaġiliqpaksimagaa Tamar.

² Nakuaġivaił̣ł̣ugu naŋiliqsimaruq, qanukkii qanuġlugu ilaan pigiyumiñaiññiġaa; aŋusiuŋaitchuagumman, aŋutinik kasuqtitchuiññiġaat.

³ Aglaan uvva avilaitqatiqaqsimaruq Amnon, aŋunmik pitqiksiġayuktuamik atiligmik Jonadab-mik, iġñiŋa David-gum aniqataata Shammah-m.

⁴ Jonadab-gum uqallautigaa Amnon, “Umialigum iġñiġigaatin, uvvaaglaan uvlutuaġman qiñiġikpiñ ipiqtusuktuaqtuatin. Suvich imña?” “Nakuaġiqpakkiga Tamar, aniqataa aniqatigma Absalom-gum,” kiugaa.

⁵ Jonadab-gum uqallautigaa, “Naŋinŋuaġutin tuttaaġiaġiñ. Aapakpich tautugiaqpatin, uqallautisaġiñ inna, ‘Apiġiuŋ aniqatiga Tamar qaitqulugu niġipkaġiaġluŋa. Uvani kukiutqugiga qiñiġnaġlugu uvamnun, aasii suli ilaan niqiksriñmiḷuŋa.’”

⁶ Tavraasii Amnon naŋinŋuaŋaruq aasii tuttaaqhuni. Umialigum David-gum tautugiaŋagaa, aasii Amnon-gum uqallautiŋagaa, “Tamar qaipkaġuŋ aasii siiġñaqtuanik muqpauriuqulugu uvani qiñiġnaġuni, aasii suli uvamnun niġipkaqulugich.”

⁷ Tavraasii David-gum uqallautipkaŋagaa Tamar inna: “Amnon-gum igluanugutin niqłiuġiaġuŋ.”

⁸ Tavruŋaŋaruq aasii tautuŋagaa tuttaaŋaruaq. Puvlaksiamik piŋaruq aasii muqpauraliuqhuni tavrani takkuani. Uunŋagaich muqpaurat

⁹ aasii naaviłługich muqpauriuġvigmiñ Amnon-mun niġitquvlugich, aglaan niġisuŋiñŋagaich. Ilaa uqallaŋaruq, “Iluqaisa iñuich anipkakkich,” aasii iluqaġmiŋ aniŋarut.

¹⁰ Tavra uqallautiŋagaa Tamar, “Qaġġisuutilugich muqpaurat uvuŋa tuŋiutimnun niġipkaŋŋa.” Pivḷugich muqpaurat ullaŋagaa.

¹¹ Niġipkaqsaġmani tiguł̣ł̣aŋagaa uqallakhuni, “Tuttaaqasiŋŋa aniqatiiŋ!”

¹² “Naumi aapiyaaŋ!” Tamar uqallaktuq. “Nunuriḷuŋa kanŋunaqtuamik pipkaġnaŋa! Piḷuktuq!

¹³ Qanuġluŋa punŋagaluaġnaŋa piñiaqpik iñuich takkuanni? Aasii ilvich—kanŋunaqsipiaġataġniaqtutin Israel-mi. Apiġipiaġikpiñ, uqauttuuŋ Umialik, iḷisimaruŋa ilaan qaiññiaġaaŋa iliŋnun.”

¹⁴ Aglaan naalaġnisuŋiñŋagaa; aasii saŋŋiłhaaqhuni Tamar-miñ payarivḷugu allatuqatigiŋagaa.

¹⁵ Tavraasii Amnon immiŋaruq uumisuutiqpagmik Tamar-mun; uumigilił̣haaŋagaa nakuaġiniġmiñiñ sivuani. Uqallautigaa, “Anniiñ!”

¹⁶ “Naumi,” Tamar-m kiugaa. “Anitkumŋa tainna taamna piḷułhaaġniaqtuq akku payarinimniñ!” Aglaan Amnon-gum naalaġniŋiñŋagaa;

¹⁷ ququulaŋagaa inmiñun kivgauruaq aasii uqallakhuni, “Una aġnaq piiġuŋ qiñiġiamniñ! Anirruŋ aasii pitchiġiiyaġlugu upkuaq!”

¹⁸ Kivgam aninŋagaa aasii pitchiġiiyaqługu upkuaq. Tamar annuġaaqaŋaruq akuqturuamik asiqsuruamiglu, annuġaaġisuuraŋiññik aŋusiuŋaitchuat umialigich paniŋisa taimani uvluni.

¹⁹ Niaquni aġraḷiqsuŋagaa, aligaqługiḷḷu annuġaani, aasii kiiñani matuvlugu argagmiñik aullaŋaruq qiamigun.

²⁰ Aniqataata Absalom-gum tautukkamiuŋ, apiġiŋagaa, “Amnon-gum payarivatin? Aniqatiiŋ, iluigivaiññagu. Aniqatiksraġigiñ, tavraasii iñugnun uqausiġinagu.” Tamar iñuuŋaruq Absalom-gum igluani, ipiqtusuunmi suli alianniuġunmi.

²¹ Umialik David tusaagami taaptumuuna, qinnaliŋaruq.

²² Aasii suli Absalom-gum uumigivaił̣ł̣ugu Amnon payariŋammauŋ aniqatini Tamar uqautillaiŋagaa suuramikunnii.

Absalom-gum Akisautaa

²³ Malġuk ukiuk qaaŋianigmagnik, Absalom imnaiñi mitquiyaqtitchaŋagaich Baal Hazor-mi, qaniŋani inim Ephraim-gum, aasii aiyugaaŋagaich iluqaisa umialgum iġñiġutiiŋich.

²⁴ Umialigmun David-muŋaruq aasii uqallautivlugu, “Umialguruatiin, imnaitka mitquiyaqtitchaġitka. Ilviḷḷu atanauratillu qaiyumiñaqpisi iḷauyumausi aliasuŋisaaġniŋanni?”

²⁵ “Naumi, iġñiiŋ,” umialgum kiugaa. “Savagnaqpaiññiaqtuq iluqata qaigupta.” Absalom-gum arakkaluaġaa, aglaan umialik aŋiŋitchuq, aasii apiġiŋagaa Absalom anitquvlugu.

²⁶ Aglaan Absalom uqallaktuq, “Amiamikii, aniqatiga Amnon qaipkaġumiñaqpiuŋ?” “Summan uvva?” umialigum apiġigaa.

²⁷ Tavra Absalom qapiŋaitchuq kiisaimmaa David-gum Amnon-lu iluqaisalu aniqatiiŋich maliktitpaich Absalom-mun. Absalom itqanaiyaŋaruq niqinaqutiksranik nalliumaruanik umialigmun

²⁸ aasii kivgani piraksriŋagaich: “Naipiqtuqsaġiksi Amnon imiŋasiqpakpan, aasii kiitaaġuvsi, tuqutchaġiksi. Iqsiñasi. Uvamnun taamna tunŋaniaqtuq. Qapiġnasi naagga piñatchiasuŋaġnasi!”

²⁹ Tavraasii kivgaŋisa Absalom-gum kamagiŋagaich piraksriutiŋich aasii tuqułługu Amnon. Iluqatik David-gum iġñiġutiiŋich ikuvlutik qimuktimignun qimaŋarut.

³⁰ Aiñmuktiłługich suli, David inna uqallautiŋagaat: “Absalom-gum tuquttaich iluġaisa iġñiġutiitin—atausiqunnii mininŋaitkaa!”

³¹ Umialik makinŋaruq, aligaqługich annuġaani isumaaġunmiñi, aasii nunamun nallaqsraaqhuni. Kivgaŋich tavrani nayuqtauruat tainnaptauq annuġaatiŋ aligaŋammigaich.

³² Aglaan Jonadab, iġñiŋa David-gum aniqataata Shammah-m, uqallaktuq, “Umialiik, tuqunŋaitkaich iluqaisa iġñiġutiitin. Kisimi Amnon tuquŋaruq. Iḷisimanaŋaruq qiññaŋaniñ Absalom sivunniŋatilaaŋa tuqutchukługu Amnon taimaŋŋaqaŋa payarimmauŋ aniqatini Tamar.

³³ Ukpiġinagich uqallautiŋich iluqaisa iġñiġutiitin tuqunŋaniḷugich; kisimi Amnon tuqutauŋaruq.”

³⁴ Tainna pipkaqługich Absalom qimaŋaruq. Tavrani aŋuyaktim qaunaksriruam tautuŋagaich iñusalaich qaiñmuktuat qimiġakun Horonaim-miñ. Umialik ullakługu uqallautiŋagaa tautuamiñik.

³⁵ Jonadab-gum uqallautigaa David, “Taavva iġñiġutiitin qairut, uqaluptun.”

³⁶ Tainna uqaŋaiġḷuqqaaqtuq David-gum iġñiġutiiŋich isiŋarut; qianagutiŋarut, suli David-lu atanauraniḷu qiaqpanagutiŋammiut.

^37-38 Absalom qimaŋaruq aasii ullakługu umialiŋa Geshur-m, Talmai iġñiŋa Ammihud-gum, aasii tavraniiłłuni piŋasuni ukiuni. David-gum qiñuataŋagaa iġñini Amnon;

³⁹ aglaan qiñuanigataġamiuŋ Amnon, tautuguliqpaŋagaa iġñini Absalom.