Biblia Todo Logo
Bìoball air-loidhne

- Sanasan -

2 Samuel 12 - Iñupiatun Mumiksat Uqalugiksuat


Nathan-gum Uqallautaa suli David-gum Isumalitqigñiŋa

1 Atanġum aullaqtinŋagaa God-im uqaqtaa Nathan David-mun. Nathan-gum ullaŋagaa aasii uqallautivlugu, “Malġuk aŋutik iñuuniaġniqsuk atautchimi nunaaqqimi; igḷua umialguvluni aasii tuglia iḷiappauvluni.

2 Umialguruaq iñugiaktuanik pamiqsaaqaġniqsuq suli imnaiñik,

3 taamnali iḷiappauruaq atausił̣hiñamik imnaiyaaqaqtillugu, tauqsiamiñik. Qaunagisuumagaa, suli iñuguġniqsuq iglumi iḷagivlugich miqłiqtuŋich. Niġipkaġuumagaa ilaan niqimiñiñ, imiqtiłługu qallutimiñiñ, suli saġliaqtuaġuumagaa. Imnaiyaaq panigiruatun inniġaa.

4 Uvlut iḷaŋanni iglaaq tikisaaġniqsuq umialguruam aimaaġvianun. Umialguruaq tuqutchisuŋiññiqsuq ilaan niġrutimiñik niqłiuġutisaġlugu iglaaq; taavsruma iḷiappauruam imnaiyaaŋa pisiññaŋagaa aasii niqłiuġutigivlugu iglaamiñun.”

5 David-gum uumitchautiqpaŋagaa umialguruaq aŋun aasii uqallakłuni, “Uqallaktuŋa takkuani iñuuruam Atanġum taamna aŋun inna savaktuaq tuquruksraugaluaqtuq!

6 Innatun savamaqłuŋaruaq, akiḷiiruksrauruq sisamaullugu taamna.”

7 “Taamnaurutin,” Nathan-gum uqallautigaa David. “Aasiuvva inna uqallaktuq Ataniq God-auruaq Israel-mun: ‘Umialigiliutiŋagikpiñ Israel-mun suli annautivlutin Saul-miñ.

8 Aitchuŋagikpiñ umialgutaanik suli tuvaaqatiŋiññik; umialigiliutiŋagikpiñ Israel-mullu Judah-mullu. Taamna naamaiñŋaniqpan, aitchuŋagayaġaluaġikpiñ malġuullugu.

9 Summan aasiuvva kamagiŋaitpigich piraksriutitka? Summan taavsrumiŋa pigiitchualiqiŋaviñ? Uriah tuqutinŋagiñ aŋuyaktuani; Ammon-guruanun tuqutinŋagiñ, aasii taimma tuvaaqataa ilvich piŋagiñ tuvaaqatigiliutisukługu!

10 Tavraasii, kiŋuvaaġiiḷḷaani kiŋuniitin tuquniaqtut nagliksaaġnaqtuakun qanukkii kamagiŋiñŋagiŋma suli piŋagiñ Uriah-m tuvaaqataa tuvaaqatigiliutisukługu.

11 Uqallapiaqtuŋa iliŋnun iḷaŋata nanmiñiq iḷakpich iłuiḷḷiuġutiksriññiaġaatin. Iḷitchuġiñiaġiñ tuvaaqatitin uvaŋa qaitkupkich allamun aŋunmun; aasii tuttaaqatiginiaġaich uvluġruiññami.

12 Piḷuusiqiŋarutin iriġaqtuqhutin, aglaan uvaŋa taamna nalautinniaġiga uvluqtuami iluġaiññun Israel-guruanun tautuktitchaġlugu.’”

13 “Piḷuusiqiŋaruŋa paaqłakługu Ataniq,” David uqallaktuq. Nathan-gum kiugaa, “Atanġum suliqutigiŋaiġaatin; tuquniaŋitchutin.

14 Aglaan qiñiqtinnapku kipakkutin Ataniġmun tainna pikavich, miqłiqtun tuquniaqtuq.”

15 Aasii Nathan aiŋaruq. Atanġum naŋiliqsitpaŋagaa David-gum iġñiŋa Uriah-m tuvaaqataaniñ.


David-gum Iġñiŋa Tuquruq

16 David aŋaiyyuŋaruq God-mun miqłiqtuuraq naŋinŋaiquvlugu. Niġiŋaiḷaŋaruq, suli unnuatuaġman inauramiñugaqtuq aasii unnuivḷuni natiġmi nalavluni.

17 Atanauraŋisa ullakługu makitinniaġaluaġaġigaat, aglaan makitchuŋitchaqtuq suli niġiqatigisuiñmigaich suuramikunnii.

18 Savaiññiġum akunniŋa pianigman miqłiqtuq tuquŋaruq, aasii David-gum atanauraŋich sivuuġaŋarut kiligniaġniksraŋanik. Inna uqaŋarut, “Miqłiqtuq iñuuŋŋaan, David-gum kiusuiñŋagaatigut uqautigaptigni. Qanuġlugu uqallautiniaqpisigu miqłiqtuuraŋa tuquniḷugu? Inmiñun anniġñiaġugnaqtuq!”

19 David-gum tautukkamigich isivruuraqtuat avanmun, iḷitchuġiŋaruq miqłiqtuq tuqutilaaŋanik. Tavraasii apiqsruŋagaich, “Miqłiqtuq tuquva?” “Ii, tuquruq,” kiugaat.

20 David makinŋaruq natiġmiñ, ivvaqhuni, iḷḷaiqsuqhuni, suli annuġaatqikhuni. Aasii aŋaiyyuyaqtuŋaruq igluani Atanġum. Igluqpagmun utiġami, niqinik qasiḷiŋaruq aasii niġivḷugich qaiḷḷuqqaaġaich.

21 “Kaŋiqsisuitchugut uvva,” atanauraŋisa uqallautigaat. “Miqłiqtuq iñuuŋŋaan, qiaŋagiñ suli niġisuŋiñmivḷutin; aglaan tuqupqauraġman, makiłłutin niġiŋarutin!”

22 “Ii,” David-gum kiugaich, “Niġiŋaiḷaŋaruŋa suli qiaŋaruŋa iñuuŋŋaan. Isumavluŋa Ataniġmun nagliginiaġnasugivluŋa aasii iñuupkaġlugu miqłiqtuq.

23 Aglaan akkupak tuquŋamman, susugluŋa niġiŋaiḷaġniaqpik? Aŋipkaġniaqpigu miqłiqtuq? Uvlut iḷaŋanni ullagniaġiga, aglaan ilaa uvamnun utitqikkumiñaitchuq.”


Solomon Aniruq

24 Tavra David-gum tutqiksaaŋagaa tuvaaqatini Bathsheba. Tuttaaqatigiŋagaa aasii iġñiŋaruq, David-gum atchiqsaŋanik Solomon-mik. Atanġum piqpagiqpaŋagaa aŋutaiyaaq

25 aasii tiliŋagaa God-im uqaqtaa Nathan atchiquvlugu aŋutaiyaaq Jedidiah-mik, qanukkii Atanġum piqpagiqpaŋagaa.


David-gum Piññaktaaġigaa Rabbah
( 1 Chronicles 20.1-3 )

26 Taimani Joab-gum aŋuyaŋagaa Rabbah, ini qaukłiŋa Ammon-gum, aasii piññaktaaġiŋagaa.

27 Aullaqtitchiŋaruq David-mun quliaqtuamik: “Aŋuyakkiga Rabbah suli imiqaġviat piññaktaaġiŋagiga.

28 Tavraasii atautchimuglugich aŋuyaktitin, aŋuyagiaġuŋ taamna ini aasii ilvich piññaktaaġilugu. Uvamnun akimman tunŋatquŋitkiga.”

29 Tavraasii David-gum atautchimukługich aŋuyaktini, Rabbah aŋuyagiaŋagaa, aasii akiiḷivḷugu.

30 Niaquaniñ iñuuraqpaum Molech-gum god-auruam Ammon-miuguruanun David-gum piiŋagaa niaquġutaa savaaq kaviqsuamiñ manigmiñ uqumaisigivalliqsuaq piŋasukipiaq akimiatun (75) suli piññaqutaqaqłuni akisuruamik. David-gum piiŋagaa akisuruaq piññaqutaq aasii iḷivḷugu ilaan niaquġutimiñun. Piññakpaŋammiuq suli suġauttasalagnik tavraŋŋa inimiñ

31 aasii iñuŋich savaktinagutiŋagaich atuqługich uluaqtuutit, savił̣hat nunaliqutit, suli sikł̣at, aasii nunurivḷugich qikuyyaliuqtiłługich siqquqsipkaŋaranik. Tainnasuli aŋalanŋagaich iñuŋich allat inauruat Ammon-mi. Aasii ilaalu iñuniḷu utiŋarut Jerusalem-mun.

Iñupiatun Mumiksat Uqalugiksuat (North Slope Iñupiaq Bible) © American Bible Society.

All rights reserved.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

American Bible Society
Lean sinn:



Sanasan