2 Samuel 1 - Iñupiatun Mumiksat Uqalugiksuat

David Iḷitchuġimman Saul Tuqutilaaŋanik

¹ Saul tuquanigman David utiŋaruq Amalek-miut akiiḷiqqaaqługich aasii Ziklag-miiłłuni malġugni uvlugni.

² Uvlaakumman nukatpiaq tikiñŋaruq Saul-gum nullaġvianiñ. Iḷisimatquvlugich qiñuuqtilaamiñik, aligaŋagaich annuġaani suli nunamiñ niaquni nanukługu. David ullaŋagaa aasii pułłuni nunamun qiksiksrautikun.

³ David-gum apiqsruŋagaa, “Sumiñ qaivich?” “Annaksaqtuaŋaa Israel-miut nullaġvianniñ,” ilaan kiugaa.

⁴ “Quliaqtuaġutiŋŋa sutilaaŋiññik,” David uqallaktuq. “Aŋuyaktivut qimaaruat aŋuyaktuaniñ,” ilaan kiugaa, “iñugiaktuat iñuvut tuqutauŋarut. Saul-lu iġñiniḷu Jonathan tuqutaummiruak.”

⁵ “Qanuqhutin iḷisimavich Saul-lu Jonathan-lu tuquŋatilaaŋigñik?” David-gum apiġigaa.

⁶ Ilaan kiugaa, “Iġġiŋaniittuaŋaa Gilboa-m, aasii tautuktaġa Saul nayummiruaq panamiñun suli aksraktuurallu aŋuyaktillu tikitchaaġiaqtaŋat.

⁷ Aasii qiviaqtaani, tautukkamiŋa ququularaani. Kiuraġa, ‘Ii, aŋutii!’

⁸ Apiġiraani kiummagaaġma, aasii uqallautiraġa Amalek-miugunivḷuŋa.

⁹ Aasii uqallaktuaq, ‘Qaiḷutin tuqunŋa! Ikiqpaqaqtuŋa, suli tuquaqsiruŋa.’

¹⁰ Tavraasii ullakługu tuquttaġa, qanukkii iḷisimaŋagiga tuquniaqtuaq ulġukpan. Aasii pirakka niaquġutaalu tayaġniġutaalu, uvvaasii qaġġisirakka iliŋnun, aŋutii.”

¹¹ David-gum annuġaani aligaŋagaich ipiqtusuutikun, suli iluqaġmik aŋuyaktiŋi tainnaŋammiut.

¹² Qiñuŋarut suli niġiŋaiñmiut unnuksraaġataqtillugu pisigivlugich Saul-lu Jonathan-lu Israel-lu, iñugiraŋich Atanġum, qanukkii iñugiakpaił̣ł̣utik tuqutauruat aŋuyaktuani.

¹³ David-gum apiġigaa nukatpiaq qaġġirriruaq taapkuniŋa quliaqtuanik, “Sumiuguvich?” Ilaan kiugaa, “Amalek-miuguruŋa, aglaan iñuuniaqtuaŋaa nunagni.”

¹⁴ David-gum apiġigaa, “Qanuqhutin uvva tuqutpiuŋ iqsigaluaġnak Atanġum umialiksraqtaaŋa?”

¹⁵ Aasii David-gum qaipkaqługu iḷaŋat iñugmi uqallautiŋagaa, “Tuqurruŋ!” Tavraasii aŋutim kapiŋagaa Amalek-miu suli ikiḷikpakługu,

¹⁶ aasii David uqallaktuq Amalek-miumun, “Iliŋnun tavra savautiŋarutin. Iliŋnun suksraunġiqsutin quliaqavich tuqunnivḷugu Atanġum piksraqtaaŋa umialigukługu.”

David-gum Isumaaġutiqpaŋa Saul-kullu Jonathan-kullu

¹⁷ David-gum atuŋagaa isumaaġutiqpani pisigivlugik Saul-lu iġñiŋalu Jonathan,

¹⁸ aasii piraksriivḷuni iḷisaurrutigitquvlugu pisiksi iñuŋiññun Judah-m. (Agliusimaruq Makpigaaŋiññi Iluaqtuaguruam.)

¹⁹ Qimiġaaŋiññi Israel-gum aullarrivut tuquŋarut! Iqsiitchuat aŋuyaktit ulġuŋarut!

²⁰ Uqausiġinasiuŋ Gath-mi naaggaunnii apqutiŋiññi Ashkelon-gum. Quviasaaġnasigik aġnaŋich Philistia-m; nipatinnasigik quviasuunmik paniŋich ukpiġutaitchuat.

²¹ Sialuŋiḷḷi naagga arruŋiḷḷi qimiġaŋiññi Gilboa-m; nunaŋich naulaiḷḷich! Qanukkii akkuaġautiŋich iqsiitchuat tamaaniittut kanŋunaqtuakun; akkiaġautaata Saul-gum qivliqsaŋaiġaat uqsrumik.

²² Jonathan-gum pisiksiŋa tuquġairiqpauŋaruq, savikpaŋa Saul-gum naglikkutaiñŋaruq, pisikługiḷḷu kapivlugiḷḷu suaŋagaluaqtuat, tuqułługich akiḷḷiuruat.

²³ Saul-lu Jonathan-lu, qanutun nakuutigiŋavak piqpagnaqtigiŋavak; atautchikun iñuuvlutik, atautchikun tuquvlutik; sukałhaaqłutik tiŋmiaqpagniñ, saŋŋił̣haaqłutik lion-niñ.

²⁴ Aġnaŋich Israel, qiñusiuŋ Saul! Annuġaaksriñŋagaasi akisuruanik kaviqsaanik qaliġuuranik suli aitchuqłusi qiñiyunaqtuanik uyaġagnik suli manigñik kaviqsuanik.

²⁵ Iqsiitchuat aŋuyaktit ulġuŋarut, tuqutauruat aŋuyallaġmik. Jonathan nalaruq tuquŋaraq qimiqqani.

²⁶ Qiñugikpiñ aniqatiiŋ Jonathan; qanutun piqpagiraqpiñ! Qanutun piqpagnaŋava nakuaqqutin uvamnun, nakuułhaaqłuniunnii aġnam nakuaqqutaaniñ.

²⁷ Iqsiitchuat aŋuyaktit ulġuŋarut, aŋuyautiŋich suli asiñi ikayuutauŋiñmiut.